Hair Care: विकतचा शाम्पू वापरण्याऐवजी 10 मिनिटांमध्ये घरच्याघरी बनवा हर्बल शाम्पू! केस स्वच्छ होण्यासोबतच कोंड्यापासून मिळेल सुटका

hair Care: केस स्वच्छ करण्यासाठी महिला सतत वेगवेगळ्या शाम्पूचा वापर करतात. पण वारंवार केमिकल शाम्पू वापरण्याऐवजी घरी तयार केलेल्या शाम्पूचा वापर करावा, यामुळे केस मुळांपासून स्वच्छ होतात आणि केसांमधील कोंडा कमी होतो.

Hair Care: वातावरणात सतत होणारे बदल, मानसिक तणाव, पोषक घटकांची कमतरता, वांरवार केमिकल शाम्पूचा वापर इत्यादी अनेक गोष्टींचा परिणाम केसांच्या वाढीवर लगेच दिसून येतो. केसांची खराब झालेली गुणवत्ता सुधारण्यासाठी कायमच बाजारात उपलब्ध असलेल्या महागड्या हेअर केअर प्रॉडक्टचा वापर केला जातो. पण तरीसुद्धा केसांची गुणवत्ता सुधारत नाही. केस कोरडे किंवा निस्तेज झाल्यनंतर हेअर ट्रीटमेंट करून केस अतिशय स्मूथ आणि चमकदार करून घेतले जातात. याचा फारसा परिणाम केसांवर दिसून येत नाही. त्यामुळे केसांची खराब झालेली गुणवत्ता सुधारण्यासाठी बाजारात महागड्या शाम्पूचा वापर करण्याऐवजी घरीच तयार केलेल्या नॅचरल शाम्पूचा वापर करावा. या शाम्पूच्या वापरामुळे केसांची वाढ होण्यास मदत होईल आणि केस चमकदार दिसून लागतील. (फोटो सौजन्य – istock)

Hibiscus Flower Powder: केस कोरडे आणि निस्तेज झालेत? जास्वंद पावडरचा ‘या’ पद्धतीने करा वापर, केस होतील चमकदार

शाम्पू बनवण्यासाठी लागणारे साहित्य:

रिठ्याच्या साली
शिकेकाई
आवळा पावडर
पाणी

कृती:

शाम्पू बनवण्यासाठी सर्वप्रथम, मोठ्या वाटीमध्ये रिठ्याच्या साली घालून रात्रभर भिजत ठेवा. त्यामध्येच शिकेकाई, आवळा पावडर सुद्धा घाला. सर्व मिश्रण रात्रभर भिजल्यानंतर टोपात ओतून गॅसवर गरम करून घ्या. १५ ते २० मिनिटे उकळून आल्यानंतर पदार्थांचा अर्क पाण्यात उतरेल. त्यानंतर तयार केलेले मिश्रण थंड करून चमच्याने किंवा हाताने मॅश करा. तयार केलेले मिश्रण गाळून घ्या आणि काचेच्या बाटलीमध्ये भरून ठेवा. तयार आहे झटपट बनवलेला नॅचरल शाम्पू.

केस धुवताना मिश्रण सर्वप्रथम केस पाण्याने ओले करून घ्या. त्यानंतर केसांवर थोडासा शाम्पू ओता आणि हलक्या हाताने मसाज करा. मसाज केल्यामुळे टाळूवर चिकटलेला कोंडा कमी होण्यासोबतच केस आतून स्वच्छ होतील. त्यानंतर साधे पाणी ओतून केस पाण्याने स्वच्छ करा. रिठ्याच्या सालींचा वापर केल्यामुळे केसांना जास्त फेस येणार नाही. त्यामुळे अतिप्रमाणात शाम्पूचा वापर करू नये. केस खूप कोरडे किंवा गुंतणारे असतील तर शाम्पूचा वापर केल्यानंतर कंडिशनर लावणे आवश्यक आहे. अन्यथा केस खूप जास्त कोरडे होऊन जातील. नैसर्गिक घटकांनी समृद्ध असलेल्या शाम्पूच्या वापरामुळे केसांची खराब झालेली गुणवत्ता सुधारण्यास मदत होईल.

Benefits Of Amla Powder: केसांपासून त्वचेपर्यंत आरोग्यासाठी गुणकारी ठरेल आवळ्याची पावडर! जाणून घ्या खाण्याची योग्य पद्धत

तयार केलेला शाम्पू दोन आठवड्यांपेक्षा जास्त दिवस वापरू नये. आठवडाभर पुरेल एवढाच शाम्पू तयार करावा. घरी बनवलेल्या शाम्पूमध्ये कोणतीही प्रिझर्व्हेटिव्ह नसल्यामुळे तो खराब सुद्धा होऊ शकतो. त्यामुळे शाम्पूचा वापर करताना योग्य ती काळजी घ्यावी. संवेदनशील त्वचा असलेल्यास टाळूवर कोरडेपणा किंवा जळजळ वाढू शकते. त्यामुळे शाम्पू तयार करताना योग्य प्रमाण वापरूनच शाम्पू बनवावा.

टीप – हा लेख केवळ सामान्य माहितीसाठी लिहिण्यात आला असून कोणत्याही प्रकारच्या उपचाराचा दावा यामध्ये करण्यात आलेला नाही. कोणताही उपाय करण्यापूर्वी आपल्या डॉक्टरांचा सल्ला घ्या.