सुरण खायला आवडत नसेल तर सोप्या पद्धतीमध्ये घरी बनवा कुरकुरीत सुरणाचे काप, भातासोबत लागतील चविष्ट

जेवणाच्या ताटात डाळ भातासोबत खाण्यासाठी सोप्या पद्धतीमध्ये तुम्ही सुरण काप बनवून खाऊ शकता. हा पदार्थ घरातील सगळ्यांचं खूप जास्त आवडेल.. चला तर जाणून घेऊया सुरण काप बनवण्याची सोपी रेसिपी.

निरोगी आरोग्यासाठी आहारात अनेक वेगवेगळ्या प्रकारच्या भाज्यांचे सेवन केले जाते. सुरणाच्या भाजीचे नाव ऐकल्यानंतर अनेक लोक नाक मुरडतात. सुरणाच्या भाजीला खाज असते, त्यामुळे बऱ्याच घरांमध्ये सुरण आणला जात नाही. मात्र सुरण खाल्यामुळे मूळव्याधीची समस्या दूर होते. मूळव्याधीच्या समस्येने त्रस्त असलेल्या लोकांनी आठवड्यातून दोनदा किंवा तीनदा सुरणाच्या भाजीचे सेवन करावे. म्हणूनच आज आम्ही तुम्हाला डाळ भातासोबत खाण्यासाठी सोप्या पद्धतीमध्ये कुरकुरीत सुरणाचे काप बनवण्याची सोपी रेसिपी सांगणार आहोत. सुरणाचे काप घरातील सगळ्यांचं खूप जास्त आवडतील. सुरणामध्ये फायबरचे प्रमाण जास्त असते, त्यामुळे शरीरात वाढलेली बद्धकोष्ठता आणि अपचनाची समस्या दूर होते. तसेच शरीरात वाढलेले कोलेस्ट्रॉल कमी करण्यासाठी सुरण खावे. सुरणाची भाजी किंवा सुरण काप बनवताना भाजी आधी शिजवून घ्यावी. अन्यथा ऍलर्जी किंवा खाज येण्याची शक्यता असते. चला तर जाणून घेऊया सुरणाचे काप बनवण्याची सोपी रेसिपी.(फोटो सौजन्य – pintrest)

संध्याकाळचा नाश्ता थोडा चिजी होऊन जाऊद्यात; घरी बनवा सर्वांच्या आवडीचा Mac And Cheese

साहित्य:

• सुरण
• लाल तिखट
• कोकम रस
• मीठ
• हळद
• आलं लसूण पेस्ट
• जिऱ्याची पावडर
• तांदळाचे पीठ
• रवा

भाजी काय बनवावी सुचत नाही? ५ मिनिटांमध्ये झटपट बनवा चमचमीत कांद्याची चटणी, नोट करा रेसिपी

कृती:

• सुरणाचे कुरकुरीत काप बनवण्यासाठी सर्वप्रथम, बाजारातून विकत आणलेला सुरण स्वच्छ धुवून घ्यावा. त्यानंतर साल काढून तुम्हाला हव्या त्या आकारात सुरणाच्या चकत्या करून घ्या.
• टोपात पाणी गरम करून त्यात कोकम टाकून सुरणाचे काप टाका आणि ५ मिनिट शिजवून घ्या.त्यानंतर त्यातील पाणी काढून घ्या.
• ताटात चवीनुसार मीठ, लाल तिखट, हळद, आलं लसूण पेस्ट, कोकमाचा आंबट रस, जिऱ्याची पावडर घालून व्यवस्थित मिक्स करा.
• त्यानंतर त्यात शिजवून घेतलेले सुरण काप घालून व्यवस्थित मसाला लावून घ्या. मसाला लावलेले सुरण १० मिनिटं तसेच ठेवा.
• पॅनमध्ये तेल गरम करण्यासाठी ठेवा. तांदळाचे पीठ आणि रवा एकत्र करून त्यात सुरणाचे मसाला लावलेला काप घोळवून नंतर पॅनमध्ये फ्राय करण्यासाठी टाका.
• दोन्ही बाजूने सुरणाचे काप भाजून झाल्यानंतर काढून घ्या.
• तयार आहेत सोप्या पद्धतीमध्ये बनवलेले सुरणाचे कुरकुरीत काप.