आशियातील एकमेव असे हिल स्टेशन जिथे गाड्यांना नो एंट्री; इंग्रजांनी शोधले होते महाराष्ट्रातील हे सुंदर ठिकाण

Travel News : सह्याद्रीच्या कुशीत वसलेलं माथेरान हे निसर्गप्रेमींसाठी खास ठिकाण आहे. वाहनांना बंदी असल्यामुळे इथली शांतता आणि स्वच्छ वातावरण पर्यटकांना आकर्षित करतं.

• माथेरानमध्ये मोटार वाहनांना प्रवेश नसल्यामुळे प्रदूषणमुक्त आणि शांत वातावरण अनुभवता येतं.
• पावसाळ्यात हिरवाई, धुकं, धबधबे आणि सह्याद्रीच्या पर्वतरांगा माथेरानचं सौंदर्य वाढवतात.
• पॅनोरमा पॉइंट, शारलोट लेक, लुईसा पॉइंट आणि इको पॉइंट पर्यटकांची खास आकर्षणं आहेत.

सह्याद्रीच्या पर्वतरांगांमध्ये वसलेलं माथेरान हे महाराष्ट्रातील लोकप्रिय आणि निसर्गसंपन्न पर्यटनस्थळ आहे. धावपळ, वाहनांचा आवाज आणि प्रदूषणापासून दूर शांत वातावरण अनुभवायचं असेल, तर माथेरान उत्तम पर्याय ठरतो. या ठिकाणाचं सर्वात मोठं वैशिष्ट्य म्हणजे माथेरानच्या मुख्य परिसरात मोटार वाहनांना प्रवेश दिला जात नाही. त्यामुळे इथली हवा स्वच्छ असून निसर्गाचा मनमुराद आनंद घेता येतो.

Travel News : कचोरी कॅपिटलच्या नावाने फेमस आहे भारतातील शहर, तुम्हाला माहिती आहे का?

माथेरानमध्ये फिरण्यासाठी पर्यटक पायी भटकंती करतात. त्याशिवाय घोड्यावरून किंवा हाताने ओढल्या जाणाऱ्या रिक्षातूनही परिसर पाहता येतो. विशेषतः पावसाळ्यात माथेरानचं रूप अधिकच खुलून दिसतं. हिरवाईने नटलेल्या सह्याद्रीच्या डोंगररांगा, धुक्याची चादर आणि धबधबे पर्यटकांना आकर्षित करतात.

ब्रिटिश काळाची आठवण

माथेरानचा शोध १९व्या शतकाच्या मध्यात ह्यू पॉइंट्झ मॅलेट यांनी लावल्याचं मानलं जातं. ब्रिटिश अधिकाऱ्यांसाठी हे ठिकाण उन्हाळ्यातील विश्रांतीचं ठिकाण बनलं होतं. त्यामुळे आजही माथेरानच्या परिसरात ब्रिटिशकालीन वास्तू आणि त्या काळाची छाप पाहायला मिळते. माथेरानची टॉय ट्रेनदेखील पर्यटकांसाठी खास आकर्षण आहे. डोंगरातून वळणावळणाचा प्रवास करत जाणारी ही छोटी रेल्वे माथेरानच्या निसर्गसौंदर्याचा वेगळाच अनुभव देते.

माथेरानमधील पाहण्यासारखी ठिकाणं

माथेरानमध्ये निसर्गरम्य ठिकाणांची कमतरता नाही. त्यापैकी काही ठिकाणं पर्यटकांनी आवर्जून पाहावीत.

पॅनोरमा पॉइंट

पॅनोरमा पॉइंटला सनराइज पॉइंट म्हणूनही ओळखलं जातं. सकाळच्या वेळी क्षितिजावर उगवणारा सूर्य आणि त्याच्या प्रकाशात उजळून निघणाऱ्या सह्याद्रीच्या पर्वतरांगा पाहण्याचा अनुभव अविस्मरणीय असतो. इथून दूरवरचा विस्तीर्ण परिसरही पाहता येतो.

शारलोट लेक

घनदाट जंगलाने वेढलेलं शारलोट लेक हे माथेरानमधील शांत आणि निसर्गरम्य ठिकाण आहे. माथेरानच्या पाणीपुरवठ्याच्या दृष्टीनेही या तलावाला महत्त्व आहे. पावसाळ्यात तलाव पाण्याने भरून गेल्यावर परिसराचं सौंदर्य आणखी खुलतं. पक्षीनिरीक्षण आणि निवांत वेळ घालवण्यासाठी हे ठिकाण योग्य आहे. तलावाजवळ पिसारनाथ मंदिरही आहे.

प्रबळगड किल्ला

ट्रेकिंग आणि साहसाची आवड असणाऱ्यांसाठी प्रबळगड किल्ला आकर्षणाचं केंद्र आहे. या किल्ल्याचा इतिहास छत्रपती शिवाजी महाराजांच्या काळाशी जोडला जातो. किल्ल्याच्या दिशेने जाणारा ट्रेक काहीसा आव्हानात्मक असला, तरी माथ्यावरून दिसणारं सह्याद्रीचं विहंगम दृश्य थक्क करणारं आहे.

लुईसा पॉइंट

सह्याद्रीच्या डोंगररांगा, दऱ्या आणि आसपासच्या किल्ल्यांचं मनमोहक दृश्य पाहण्यासाठी लुईसा पॉइंट प्रसिद्ध आहे. स्वच्छ हवामानात इथून प्रबळगडासह परिसरातील डोंगररांगांचं सुंदर दृश्य दिसतं. सूर्योदय आणि सूर्यास्ताच्या वेळी या ठिकाणाचं सौंदर्य अधिकच खुलून दिसतं.

भारतात येणाऱ्या परदेशी पर्यटकांसाठी आनंदाची बातमी! आता अटारी बॉर्डरवरूनही मिळणार एन्ट्री; जाणून घ्या व्हिसाचे नियम’

इको पॉइंट

नावाप्रमाणेच इको पॉइंट त्याच्या प्रतिध्वनीसाठी प्रसिद्ध आहे. इथे आवाज दिल्यानंतर तो आसपासच्या डोंगरांवर आदळून पुन्हा ऐकू येतो. या अनोख्या अनुभवामुळे हे ठिकाण पर्यटकांमध्ये लोकप्रिय आहे. माथेरानची शांतता, प्रदूषणमुक्त वातावरण, हिरवाईने नटलेला सह्याद्री आणि निसर्गाच्या सान्निध्यात फिरण्याचा अनुभव यामुळे हे ठिकाण खास बनतं. त्यामुळे पावसाळ्यात सह्याद्रीचं सौंदर्य अनुभवायचं असेल, तर माथेरानला नक्की भेट देता येईल.