Gastric Cancer: धूम्रपानामुळे वाढतो पोटाच्या कर्करोगाचा धोका, कमी करण्यासाठी तज्ज्ञांच्या टिप्स

धूम्रपानामुळे फुफ्फुसांचा, तोंडाचा, घशाचा कर्करोग वाढतो हे सर्वज्ञात आहे, पण त्याचबरोबर पोटाच्या कर्करोगाचा (गॅस्ट्रिक कॅन्सर) धोका देखील मोठ्या प्रमाणात वाढतो याबाबत लोकं अनभिज्ञ असतात.

• गॅस्ट्रिक कॅन्सर का होतो 
• धुम्रपानामुळे पोटाच्या कॅन्सरचा धोका वाढतो 
• काय आहेत कारणे आणि कशी घ्याल काळजी 

पोटाचा कर्करोग ज्याला गॅस्ट्रिक कॅन्सरदेखील म्हणतात. पोटाच्या अस्तरात असामान्य पेशी अनियंत्रितपणे वाढतात तेव्हा हा कर्करोग विकसित होतो. अनुवंशिकता आणि आहाराबरोबरच धूम्रपान हा एक जोखीम घटक ठरते. दरवर्षी, पोटाच्या कर्करोगाची अनेक प्रकरणे दीर्घकालीन तंबाखूच्या सेवनाशी संबंधीत आहे. हे ज्ञात सत्य आहे की तंबाखूच्या धुरात हानिकारक रसायने असतात जी पोटाच्या आतड्यांना नुकसान पोहोचवू शकतात. तंबाखूमधील निकोटिन, टार आणि इतर रासायनिक घटक शरीरात प्रवेश करून पोटाच्या आतील आवरणावर (गॅस्ट्रिक म्यूकोसा) परिणाम करतात. या विषारी पदार्थांमुळे पोटातील पेशींच्या वाढीचा आणि पुनर्निर्मितीचा नैसर्गिक क्रम बिघडतो, ज्यामुळे कालांतराने कर्करोगजन्य बदल होऊ शकतात. 

धूम्रपान करणाऱ्यांना हेलिकोबॅक्टर पायलोरी संसर्ग होण्याची शक्यता अधिक असते, जो पोटाचा अल्सर आणि कर्करोगाशी संबंधित एक जिवाणू संसर्ग आहे. सेकंडहँड स्मोकच्या संपर्कात आल्यानेही धोका वाढतो. म्हणूनच, प्रत्येकाने आपल्या आरोग्याची काळजी घ्यावी आणि या कर्करोगाला प्रतिबंध करावा. पोटाच्या कर्करोगाची लक्षणे म्हणजे अपचन, पोटफुगी, मळमळ, भूक न लागणे आणि अस्पष्ट वजन कमी होणे. सुरुवातीला ही लक्षणे सौम्य असू शकतात, त्यामुळे बरेच लोक त्याकडे दुर्लक्ष करतात, ज्यामुळे निदान आणि उपचारांना विलंब होतो. डॉ. मनोज लोखंडे, सर्जिकल ऑन्कोलॉजिस्ट, ऑन्को-लाइफ कॅन्सर सेंटर, सातारा यांनी याबाबत अधिक माहिती दिली आहे. 

Signs of Stomach Cancer पोटाचा कॅन्सर झाल्यानंतर शरीरात दिसू लागतात ‘ही’ गंभीर लक्षणे, दुर्लक्ष केल्यास होऊ शकतो मृत्यू

गॅस्ट्रिक कॅन्सर कारणे काय आहेत?

पोटाच्या कर्करोगाची मुख्य कारणे खालीलप्रमाणे आहेत – 

• हेलिकोबॅक्टर पायलोरी (एच. पायलोरी) संसर्ग: हा जीवाणू पोटात संसर्ग होऊ शकतो, ज्यामुळे दीर्घकालीन दाह होतो आणि कर्करोगाचा एक प्रमुख धोका घटक आहे
• खाण्याच्या सवयी, अस्वस्थ आहार: जास्त खारट, मसालेदार, स्मोक्ड आणि प्रक्रिया केलेले मांस असलेले पदार्थ खाणे
• फळे आणि भाज्यांचा अभाव: फळे आणि भाज्या कमी प्रमाणात खाण्याची शिफारस केली जाते कारण त्यात असलेले अँटिऑक्सिडंट्स हानिकारक पेशींपासून संरक्षण करतात.

जीवनशैलीचे घटक:

• धूम्रपान आणि अल्कोहोल: जास्त तंबाखू आणि अल्कोहोलचे सेवन केल्याने पोटाच्या कर्करोगाचा धोका वाढतो
• लठ्ठपणा: जास्त वजन किंवा लठ्ठपणा असणे हे देखील एक जोखीम घटक आहे
• आनुवंशिक आणि कौटुंबिक इतिहास: जर तुमच्या कुटुंबातील एखाद्याला पोटाचा कर्करोग झाला असेल तर तुमचा धोका वाढतो. काही अनुवांशिक उत्परिवर्तन देखील ते होऊ शकतात.

इतर वैद्यकीय घटक:

• पोटाचे अल्सर: पोटाचे अल्सर किंवा गॅस्ट्र्रिटिससारख्या दीर्घकालीन समस्या
• पोटाची शस्त्रक्रिया: पूर्वी काही प्रकारच्या पोटाच्या शस्त्रक्रिया केल्या होत्या
• एपस्टाईन-बॅर विषाणूचा संसर्ग: हा विषाणू पोटाच्या कर्करोगाचा धोका देखील वाढवू शकतो

पोटात वाढतोय कॅन्सरचा ट्यूमर, भूक न लागण्यापासून 5 संकेत जे घेतील जीव

महत्त्वाच्या टिप्स ज्याने होऊ शकतो धोका कमी  

धूम्रपान आणि सेकंडहँड स्मोकींग टाळा. तज्ज्ञांच्या मदतीने धूम्रपानाची सवय सोडण्यासाठी विशेष थेरपीचा वापर करा. कोणत्याही प्रकारच्या कर्करोगापासून बचाव करण्यासाठी धूम्रपान टाळणे ही काळाची गरज आहे. फळे, भाज्या आणि तृणधान्यांनी समृद्ध असा संतुलित आहार घ्या. जंक फुड, तेलकट, हवाबंद डब्यातील आणि प्रक्रिया केलेल्या पदार्थांचे सेवन टाळा. 

कौटुंबिक इतिहास किंवा सतत पोटाच्या समस्या असलेल्या व्यक्तींसाठी नियमित तपासणी करणे गरजेचे आहे. अपचन, उलट्या किंवा अचानक वजन कमी होणे आणि पोटात दुखणे यासारख्या लक्षणांकडे त्वरीत लक्ष द्या. पोटाच्या कर्करोगाचे निदान झाल्यावर तज्ञ तुमच्यासाठी उपचारांची पद्धत ठरवतील ज्यामध्ये केमोथेरपी, रेडिएशन थेरपी, इम्युनोथेरपी किंवा टार्गेट्ड थेरपीसह शस्त्रक्रियेचा समावेश असू शकतो. पोटाच्या कर्करोग जागरूकता महिन्यातंर्गत निरोगी भविष्यासाठी प्रतिबंधात्मक उपाय आणि चांगल्या सवयी लावून घेण्याचा निश्चय करुया.