चिकन, मटण खाऊन कंटाळा आलाय? मग घरी बनवा मसालेदार अंडा बिर्याणी

अंड्याची भाजी खायला आवडत नसेल तर तुम्ही अशावेळी याची मसालेदार आणि गरमा गरम बिर्याणी तयार करू शकता. तांदळाचे सुगंध, मसाल्यांचे मिश्रण आणि परतलेली अंडी यांचा अप्रतिम संगम असलेली अंडा बिर्याणी चवीला अप्रतिम लागते. खास करून तुमच्या विकेंड मेन्यूमध्ये तुम्ही याला सामील करू शकता आणि तुमच्या विकेंडची मजा आणखीन द्विगुणित करू शकता. चला लगेच नोट करूयात अंडा बिर्याणीसाठी लागणारे साहित्य आणि कृती.

साहित्य

अंडी शिजवण्यासाठी:

• अंडी – 4 ते 6 (उकडलेली)
• हळद – ¼ टीस्पून
• लाल तिखट – ½ टीस्पून
• तेल – १ टेबलस्पून

• बासमती तांदूळ – २ कप (१ तास भिजवलेले)
• पाणी – ४ कप
• मीठ – चवीनुसार
• तमालपत्र, लवंग, दालचिनी, मोठी वेलदोडा – प्रत्येकी १

• कांदा – २ मोठे (स्लाइस केलेले)
• टोमॅटो – १ मोठा (चिरलेला)
• हिरव्या मिरच्या – २
• आले-लसूण पेस्ट – १½ टेबलस्पून
• दही – ½ कप
• लाल तिखट – १ टीस्पून
• हळद – ¼ टीस्पून
• गरम मसाला – ½ टीस्पून
• बिर्याणी मसाला – १ टीस्पून (ऐच्छिक)
• मीठ – चवीनुसार
• बारीक चिरलेली कोथिंबीर व पुदिना – प्रत्येकी २ टेबलस्पून
• तेल – ३ टेबलस्पून
• तूप – १ टेबलस्पून

कृती

• अंडा बिर्याणी बनवण्यासाठी सर्वप्रथम बासमती तांदळाला पाणी, मीठ व गरम मसाले घालून ८०% शिजवा व गाळून थंड होऊ द्या.
• उकडलेली अंडी सोलून त्यावर हळद व तिखट लावून तेलात थोडी कुरकुरीत होईपर्यंत परतून बाजूला ठेवा.
• कढईत तेल गरम करून कांदे सोनेरी रंगावर परतून घ्या. नंतर त्यात हिरव्या मिरच्या, आले-लसूण पेस्ट घालून परता.
• टोमॅटो घालून मऊ होईपर्यंत परता. मग हळद, तिखट, मीठ, गरम मसाला, बिर्याणी मसाला घालून परतावे.
• त्यात दही, कोथिंबीर, पुदिना घालून मिश्रण एकजीव करा.
• परतलेली अंडी या तयार मसाल्यात घालून २-३ मिनिटे परता.
• एका मोठ्या भांड्यात आधी भाताचा थर, मग अंड्याचा मसाला, पुन्हा भात, थोडे तूप, पुदिना आणि कोथिंबीर अशा थरांनी बिर्याणी सेट करा.
• झाकण लावून १०-१५ मिनिटे मंद आचेवर दम द्या.
• गरमागरम एग बिर्याणी रायता, कोशिंबीर किंवा पापडासोबत सर्व्ह करा.
• अधिक झणझणीत हवी असल्यास अंड्याला थोडा चाट मसाला लावूनही परतता येते.
• तुमच्याकडे वेळ कमी असल्यास कुकरमध्ये एकत्रित एक पॉट बिर्याणीही करता येते.

संबंधित बातम्या