Kabab: चटपटीत, कुरकुरीत अन् स्वादिष्ट! संध्याकाळच्या स्नॅक्ससाठी परफेक्ट हरा-भरा कबाब; रेसिपी नोट करा

Veg Hara Bhara Kabab Recipe: जर तुम्हालाही संध्याकाळच्या स्नॅक्ससाठी काहीतरी टेस्टी आणि झटपट डिश बनवायची असेल तर ही व्हेज हरा-भरा कबाब रेसिपी नक्की ट्राय करा.

• संध्याकाळच्या स्नॅक्सला द्या देसी ट्विस्ट
• कमी साहित्य, कमी वेळ अन् चव जबरदस्त
• अशी बनवा हरा-भरा कबाबची सोपी रेसिपी

संध्याकाळची वेळ झाली की गरमागरम चहासोबत काहीतरी चटपटीत आणि कुरकुरीत खावेसे वाटते. मात्र, दररोज समोसा, भजी किंवा पॅकेटमधील स्नॅक्स खाणं आरोग्यासाठी योग्य नाही. त्याऐवजी घरीच चटपटीत व्हेज हरा-भरा बनवू शकता. हिरव्या भाज्या, मटार, बटाटा आणि स्वादिष्ट मसाल्यांपासून तयार होणारा हा कबाब चवीला अप्रतिम लागतो. बाहेरून कुरकुरीत तर आतून मऊ कबाब लहानांपासून मोठ्यांपर्यंत प्रत्येकाला तो आवडू शकतो. विशेष म्हणजे ही रेसिपी बनवण्यासाठी फार वेळ किंवा तयारीची गरज नाही. अचानक पाहुणे आले, चहाची वेळ झाली किंवा संध्याकाळी काहीतरी वेगळे खाण्याची इच्छा झाली, तर कमी वेळात तयार होणारा हा स्नॅक उत्तम पर्याय ठरू शकतो. चला तर जाणून घेऊयात व्हेज हरा-भरा कबाबची सोपी रेसिपी.

Belching: सतत ढेकर येतात? शरीर देतंय ‘हा’ इशारा; दुर्लक्ष करणं पडू शकतं महागात

हरा-भरा कबाबसाठी साहित्य

• पालक – २ कप
• उकडलेले बटाटे – २
• मटार- १ कप
• हिरवी मिरची – २
• आले – १ छोटा तुकडा
• बेसन – ३ ते ४ चमचे
• ब्रेडक्रम्ब्स – अर्धा कप
• जिरे – अर्धा चमचा
• गरम मसाला – अर्धा चमचा
• चाट मसाला – अर्धा चमचा
• लाल तिखट – अर्धा चमचा
• मीठ
• तेल

कबाब बनवण्याची कृती

सर्वप्रथम पालक स्वच्छ धुऊन घ्या. त्यानंतर पालक आणि मटार थोडे शिजवून घ्या. त्यातील अतिरिक्त पाणी पूर्णपणे काढून टाका. अन्यथा कबाबाचे मिश्रण पातळ होऊ शकते. आता पालक, मटार, हिरवी मिरची आणि आले एकत्र करून बारीक वाटून घ्या. एका मोठ्या भांड्यात उकडलेले बटाटे घेऊन चांगले मॅश करुन घ्या. त्यात तयार केलेली पालक-मटारची पेस्ट, बेसन, ब्रेडक्रम्ब्स, जिरे, गरम मसाला, चाट मसाला, लाल तिखट आणि मीठ घाला. सर्व साहित्य व्यवस्थित एकजीव करून घ्या.मिश्रण हाताला जास्त चिकटत असल्यास थोडे ब्रेडक्रम्ब्स किंवा बेसन घालू शकता.

आता या मिश्रणाचे छोटे-छोटे गोळे करून हाताने कबाबाचा आकार द्या. यानंतर, तवा चांगला गरम करून त्यावर थोडे तेल घालून पसरवा. तयार कबाब तव्यावर ठेवून मध्यम आचेवर बाजून घ्या. कबाब दोन्ही बाजूंनी सोनेरी आणि कुरकुरीत होईपर्यंत चांगले भाजून घ्या. कबाब उलटताना काळजी घ्या, जेणेकरून ते तुटणार नाहीत. तयार व्हेज हरा-भरा कबाब हिरवी चटणी, टोमॅटो सॉस किंवा दह्यासोबत सर्व्ह करा. संध्याकाळच्या चहासाठी तसेच छोट्या घरगुती पार्टीसाठीही हा झटपट स्नॅक नक्की ट्राय करा.

Healthy Vegetable: हृदय निरोगी, हाडे मजबूत अन् मेंदूलाही फायदा! ‘ही’ हिरवी भाजी शरीरासाठी ठरते वरदान