Weekend Special : घरी बनवा केरळ स्टाईल मलबार चिकन फ्राय, मसालेदार आणि कुरकुरीत चव; लगेच तोंडाला आणेल पाणी

Malabar Chicken Fry Recipe : मसालेदार, खमंग आणि करकरीत चवीची ही डिश कुणाच्याही तोंडाला पाहता क्षणी पाणी आणू शकते. अजूनही चिकनची ही डिश जर तुम्ही ट्राय केली नसेल तर तुम्ही खु मिस करत आहात.

केरळच्या मलबार किनाऱ्यावरील खाद्यसंस्कृती भारतभर प्रसिद्ध आहे. मलबार मसाले, नारळाचे तेल, तिखटपणा आणि खास सुगंधी मसाल्यांचा वापर ही या पाककृतीची वैशिष्ट्ये आहेत. यातीलच एक फेमस डिश म्हणजे मलबार चिकन फ्राय जो चवीला एकदम मसालेदार आणि कुरकुरीत असा लागतो. विकेंडला घरी काही खास बनवायचं असल्यास ही डिश तुमच्यासाठी एक उत्तम पर्याय आहे.

दसऱ्यानिमित्त घरी बनवा चमचमीत शाही व्हेज पुलाव! मऊ आणि मोकळा भात शिजण्यासाठी फॉलो करा ‘या’ सोप्या टिप्स

मलबार चिकन फ्राय ही डिश मसालेदार, खमंग आणि करकरीत असते. यामध्ये चिकनला लालसर रंग आणण्यासाठी काश्मिरी मिरच्या वापरल्या जातात, तर मसाल्यांमध्ये आले, लसूण, कांदा, लिंबाचा रस आणि सुगंधी मसाले घालून चिकन तळले जाते. केरळमध्ये ही डिश परोट्टा, नीर दोसा किंवा साध्या भातासोबत नेहमी सर्व्ह केली जाते. दक्षिण भारतीय घराघरात ही रेसिपी खास पार्टी किंवा सणावारी बनवली जाते. कोणत्या खास प्रसंगी कुटुंबाला खुश करण्यासाठी तुम्ही ही रेसिपी घरी ट्राय करु शकता.चला तर मग मलबार चिकन फ्राय बनवण्यासाठी लागणारे साहित्य आणि कृती जाणून घेऊया.

साहित्य

• चिकन – ५०० ग्रॅम (मध्यम तुकडे)
• कांदा – २ (बारीक चिरलेले)
• आले-लसूण पेस्ट – २ चमचे
• काश्मिरी लाल मिरची पावडर – २ चमचे
• हळद – ½ चमचा
• धने पावडर – १ चमचा
• गरम मसाला – १ चमचा
• मिरी पावडर – ½ चमचा
• लिंबाचा रस – २ चमचे
• मीठ – चवीनुसार
• कढीपत्ता – १०-१२ पाने
• नारळाचे तेल (किंवा साधे तेल) – तळण्यासाठी

व्हेज पदार्थाला द्या शाही तडका, घरच्या घरी बनवा रेस्टॉरंट स्टाईल परफेक्ट ‘पनीर बिर्याणी’

कृती

• यासाठी सर्वप्रथम एका मोठ्या भांड्यात चिकनचे तुकडे घ्या. त्यात आले-लसूण पेस्ट, मिरची पावडर, हळद, धने पावडर, मिरी, लिंबाचा रस व मीठ घालून
• व्यवस्थित मिक्स करा. किमान १ तास मॅरिनेट होऊ द्या.
• कढईत नारळाचे तेल गरम करून त्यात बारीक चिरलेले कांदे सोनेरी होईपर्यंत तळा.
• कांद्यात सुगंधासाठी कढीपत्ता टाकून १ मिनिट परता.
• मॅरिनेट केलेले चिकन थोडेथोडे करून कढईत टाका आणि मध्यम आचेवर तळा.
• चिकन पूर्णपणे तळून घेताना अधूनमधून झाकण ठेवून वाफ आणा, त्यामुळे मसाला आतपर्यंत जाईल.
• चिकन बाहेरून लालसर आणि करकरीत दिसू लागले की ते तयार झालेले असते.
• गरमागरम मलबार चिकन फ्राय कांदा, लिंबाचे फोडी आणि भात/परोट्टा सोबत सर्व्ह करा.
• ही डिश केरळच्या खासियतपैकी एक असून मसालेदार खाणाऱ्यांसाठी उत्तम पर्याय आहे.