Maharashtra Breaking News Updates Today: गेल्या १० दिवसांत चौथ्यांदा पेट्रोल-डिझेल महाग

25 May 2026 09:20 AM (IST)

MS Dhoni: लेफ्टनंट कर्नल महेंद्रसिंह धोनीला लष्कराकडून पगार मिळतो का?  

MS Dhoni Salary From Army: भारतीय क्रिकेट संघाचा माजी कर्णधार महेंद्रसिंह धोनी (MS Dhoni) मैदानातील आपल्या उत्कृष्ट कामगिरीसोबतच देशप्रेमासाठीही ओळखला जातो. वर्ष २०११ मध्ये भारताला वर्ल्ड कप जिंकवून दिल्यानंतर, भारतीय प्रादेशिक सेनेने (Territorial Army) धोनीला 'लेफ्टनंट कर्नल' ही मानद पदवी देऊन गौरवले होते. लष्करातील या मानाच्या पदवीनंतर धोनीला सैन्यदलाकडून किती पगार मिळतो, असा प्रश्न अनेकदा चाहत्यांच्या मनात येतो.

लष्कराकडून धोनीला पगार मिळतो का?

भारतीय लष्करात नियमित सेवा बजावणाऱ्या लेफ्टनंट कर्नल पदावरील अधिकाऱ्याचा मासिक पगार साधारणपणे १.२१ लाख रुपयांपासून ते २.१२ लाख रुपयांच्या दरम्यान असतो, ज्यामध्ये विविध भत्त्यांचाही समावेश असतो.

25 May 2026 09:15 AM (IST)

Pune Crime: पुण्यात हॉटेलमधील वादातून गोळीबार; दोघे गंभीर जखमी,  

Pune Crime:  पुणे जिल्ह्यातील राजगड तालुक्यातून एक खळबळजनक घटना समोर आली आहे. राजगड तालुक्यातील कोदवडी फाटा परिसरातील एका हॉटेलमध्ये किरकोळ वादातून थेट फायरिंग (गोळीबार) झाल्याची घटना घडली आहे. या गोळीबाराच्या घटनेत दोन जण गंभीर जखमी झाले असून, परिसरात प्रचंड खळबळ उडाली आहे.

मिळालेल्या प्राथमिक माहितीनुसार, कोदवडी फाटा येथील एका हॉटेलमध्ये काही लोकांमध्ये वाद झाला. हा वाद पाहता पाहता इतका विकोपाला गेला की, आरोपींनी थेट बंदुकीतून गोळ्या झाडल्या. या गोळीबारात दशरथ शिळीमकर आणि मस्कु दसवडकर हे दोघेजण गोळ्या लागल्याने गंभीर जखमी झाले आहेत. त्यांना तातडीने जवळच्या रुग्णालयात दाखल करण्यात आले असून, सध्या त्यांच्यावर उपचार सुरू आहेत.

25 May 2026 09:10 AM (IST)

Solapur Rain Update: सोलापूर जिल्ह्यात अवकाळी पावसाचा हाहाकार 

Solapur Rain Update:  गेल्या दोन दिवसांपासून सोलापूर जिल्ह्यातील अनेक भागांना अवकाळी पावसाचा आणि वादळी वाऱ्याचा मोठा फटका बसला आहे. या नैसर्गिक आपत्तीमुळे शेतीसह व्यावसायिक प्रतिष्ठानांचे प्रचंड नुकसान झाले असून जनजीवन विस्कळीत झाले आहे.

 जिल्ह्यातील मोहोळ तालुक्यातील लांबोटी गावात वादळी वाऱ्याने भीषण रूप धारण केले होते. या वादळामुळे येथील प्रसिद्ध 'जयशंकर' हॉटेल आणि एका पेट्रोल पंपाच्या छताचे मोठे नुकसान झाले आहे. वादळाचा वेग इतका तीव्र होता की, हॉटेल जयशंकरचे छताचे पत्रे अक्षरशः हवेत उडून गेले. वादळी वाऱ्याची ही भयानक दृश्ये तेथील सीसीटीव्ही (CCTV) कॅमेऱ्यातही कैद झाली आहेत.

25 May 2026 09:03 AM (IST)

Pimpri Chinchwad: चिंचवडमध्ये तरुणीची छेडछाड करणाऱ्या विकृताला २४ तासांत बेड्या 

Pimpri Chinchwad Crime: पुणे जिल्ह्याच्या पिंपरी-चिंचवडमधून महिलांच्या सुरक्षेचा प्रश्न ऐरणीवर आणणारी एक धक्कादायक घटना समोर आली आहे. चिंचवड येथील मदर तेरेसा उड्डाणपुलावरील (Flyover) एम्पायर इस्टेट बीआरटी बसथांब्यावर एका २४ वर्षीय तरुणीची अश्लील हावभाव करत छेडछाड करण्यात आली. मात्र, पीडित तरुणीने दाखवलेले विलक्षण धाडस आणि पिंपरी पोलिसांचा तात्काळ तांत्रिक तपास यामुळे या विकृत आरोपीला २४ तासांच्या आत बेड्या ठोकण्यात आल्या आहेत. जाकीर हमीद शेख असे अटक करण्यात आलेल्या आरोपीचे नाव आहे.

भररस्त्यात अश्लील चाळे याबाबत मिळालेल्या माहितीनुसार, २२ मे रोजी सकाळी ७:४५ वाजण्याच्या सुमारास पीडित २४ वर्षीय तरुणी तिच्या कंपनीच्या बसची वाट पाहत एम्पायर इस्टेट बीआरटी स्टँडवर उभी होती. सकाळी कामावर जाणाऱ्यांची मोठी वर्दळ असतानाही, आरोपी जाकीर शेख तिथे आला आणि त्याने तरुणीला पाहून अश्लील चाळे व हावभाव करण्यास सुरुवात केली.