संग्रहित फोटो
सातारा : राजवाड्यावरून पोवई नाक्याकडे जात असताना चालकाचे नियंत्रण सुटल्याने भरधाव कार दुभाजकाला धडकली आहे. अपघातानंतर कारने पेट घेतला. मात्र, नागरिकांनी तीन जखमींना तातडीने कारमधून बाहेर काढून रुग्णालयात दाखल केले. हा अपघात शुक्रवारी रात्री अकरा वाजता झाला.
सागर गाडे, शुभम पवार (रा. करंजे पेठ, सातारा), साहील जमादार (बुधवार नाका, सातारा) अशी जखमींची नावे आहेत. हे तिघे रात्री कारमधून राजवाड्यावरून पोवई नाक्याकडे निघाले होते. यावेळी साहील जमादार कार चालवत होता. महाराजा सयाजीराव शाळेसमोर आल्यानंतर कारचालक साहील याचे कारवरील नियंत्रण सुटले. त्यामुळे कार दुभाजकाला जाऊन जोरदार आदळली. अपघातानंतर मोठा आवाज झाल्याने नागरिक घटनास्थळी धावले. कारने पेट घेतल्याचे निदर्शनास येताच नागरिकांनी जखमी तरूणांना तातडीने कारमधून बाहेर काढले. त्यानंतर सातारा नगर पालिकेच्या अग्निशमन दलाला याची माहिती देण्यात आली. हवालदार कारळे अधिक तपास करीत आहेत.
अग्निशमन दलाची घटनास्थळी धाव
पालिकेच्या अग्निशमन दलाने तातडीने घटनास्थळी धाव घेऊन आग आटोक्यात आणली. त्यामुळे कारचेही फारसे नुकसान झाले आहे. जखमी तरूणांना साताऱ्यातील खासगी रुग्णालयात दाखल करण्यात आले आहे. त्यांची प्रकृती स्थिर असल्याचे पोलीस सूत्रांनी सांगितले. सातारा शहर पोलिस ठाण्यात या अपघाताची नोंद झाली.
दीर- भावजयचा मृत्यू
पुण्यातील जेल रोडवरील एका रुग्णालयासमोर भरधाव कारने दिलेल्या धडकेत दीर भावजयीचा मृत्यू झाल्याची घटना घडली आहे. लोहगाव परिसरातील जेल रस्त्यावरील संजय पार्क येथे हा अपघात गुरूवारी सकाळी झाला. याप्रकरणी चालकावर गुन्हा दाखल करण्यात आला आहे. आशीर्वाद गोवेकर (वय ५२), रेश्मा गोवेकर (वय ४७) असे अपघातात मृत्युमुखी पडलेल्या दाम्पत्याचे नाव आहे. याप्रकरणी कारचालक अचलकुमार (वय ४३) याच्यावर गुन्हा दाखल करण्यात आला. याबाबत प्रसाद गोवेकर (वय ५४, रा. शिव पार्वती मंगल कार्यालयाजवळ, गोकुळनगर, कात्रज-कोंढवा रस्ता) यांनी विमानतळ पोलीस ठाण्यात तक्रार दिली आहे.
महिला पोलिसाला कारने उडवले
राज्यात अपघाताचे प्रमाण मोठ्या प्रमाणात वाढले आहे. दरम्यान गेल्या काही दिवसाखाली ड्रंक अँड ड्राईव्हच्या कारवाईनिमित्त नाकाबंदी करून कारवाई करत असताना एका भरधाव आलिशान कारने कर्तव्य बजावणाऱ्या वाहतूक विभागातील महिला कर्मचाऱ्याला उडविल्याची धक्कादायक घटना घडली. यात महिला कर्मचारी गंभीररित्या जखमी झाल्या असून, त्यांच्यावर खासगी रुग्णालयात उपचार सुरू आहेत. दरम्यान, आलिशान कारमध्ये चौघेजन असल्याचे माहिती समोर आली. महिला अंमलदार दीपमाला राजू नायर (वय ३५) असे गंभीर जखमी झालेल्या महिला कर्मचाऱ्याचे नाव आहे. याप्रकरणी बंडगार्डन पोलीस ठाण्यात अज्ञात चालकाविरोधात गुन्हा दाखल करण्यात आला आहे.
