यशवंत माने हा मूर्ख माणूस, गांजा पितो अन्…; शरद पवार गटाच्या बड्या नेत्याची जीभ घसरली

सोलापूर जिल्ह्यातील मोहोळ विधानसभा मतदारसंघाचे शरद पवार पक्षाचे आमदार राजू खरे यांनी माजी आमदार सध्याचे भाजप नेते यशवंत मानेंवर सडकून टीका केली आहे.

• आगामी निवडणुकांसाठी सर्व पक्षांची तयारी सुरु
• मोहोळमधील राजकारण तापलं
• राजू खरे यांची यशवंत मानेंवर टीका

पंढरपूर : आगामी निवडणुकांसाठी सर्व राजकीय पक्षांनी जोरदार तयारीला सुरुवात केली आहे. निवडणुका लवकरच होणार आहेत. राजकीय नेत्यांचे विविध भागात दौरेही वाढले आहेत. महायुती आणि महाविकास आघाडीकडून कार्यकर्त्यांना कामाला लागण्याचे आदेशही दिले आहेत. विविध पक्षांतील नेत्यांमध्ये आरोप- प्रत्यारोपही केले जात आहेत. अशातच आता सोलापूर जिल्ह्यातील मोहोळ विधानसभा मतदारसंघाचे शरद पवार पक्षाचे आमदार राजू खरे यांनी माजी आमदार सध्याचे भाजप नेते यशवंत मानेंवर सडकून टीका केली आहे. यशवंत माने हा मूर्ख माणूस आहे, दारू पितो की गांजा पितो काय कळत नाही, त्यामुळेच तो नेहमी बेताल वक्तव्य करतो अशा भाषेत विद्यमान आमदार राजू खरे यांनी यशवंत मानेंवर टीका केली आहे.

मोहोळ नगरपरिषद आणि अनगर नगरपरिषदेची निवडणूक रंगली आहे. आजी- माजी नेते एकमेकांवर आरोप प्रत्यारोप करत आहेत. मोहोळ नगरपरिषदेची निवडणूकीची जबाबदारी माझ्यावर नाही, माढ्याचे खासदार धैर्यशील मोहिते पाटील यांच्यावर जबाबदारी सोपविण्यात आलेली आहे. शरद पवार पक्षाचे खासदार हे रमेश कदम यांना सोबत घेऊन प्रचार करत आहेत, याच रमेश कदम यांनी विधानसभा निवडणुकीत शरद पवारांच्या पक्षाविरोधात काम केल होते, असेही राजू खरे म्हणाले.

उरली सुरली त्याची पाटीलकी काढतो

राष्ट्रवादी शरद पवार पक्षाचे मोहोळ विधानसभा मतदार संघाचे विद्यमान आमदार राजू खरे यांनी जिल्हा परिषद आणि ग्रामपंचायत निवडणुकीबाबत माजी आमदार व भाजप नेते राजन पाटील यांना देखील ओपन चॅलेंज दिलं आहे. आगामी जिल्हा परिषद आणि ग्रामपंचायतीच्या निवडणुकीत सर्वच नेत्यांना सोबत घेऊन निवडणूका लढवणार, त्या पाटलाची उरली सुरली पाटीलकी काढू, असा इशारा दिला आहे.