टिळक चौकात वाहतूक पोलीस महिलेला चप्पलने मारहाण..!

प्रतिनियुक्तीवर असलेल्या महिला पोलीस शिपायाला टिळक चौकात भरदुपारी महिलेने अश्लील भाषेत शिवीगाळ करत चप्पलने मारहाण करून त्यांच्या अंगावरील वर्दी फाडल्याचा धक्कादायक प्रकार घडला आहे. केवळ गाडीबाबत माहिती न दिल्यावरून या महिलेने हा गोंधळ घालत मारहाण केली आहे.

पुणे : प्रतिनियुक्तीवर असलेल्या महिला पोलीस शिपायाला टिळक चौकात भरदुपारी महिलेने अश्लील भाषेत शिवीगाळ करत चप्पलने मारहाण करून त्यांच्या अंगावरील वर्दी फाडल्याचा धक्कादायक प्रकार घडला आहे. केवळ गाडीबाबत माहिती न दिल्यावरून या महिलेने हा गोंधळ घालत मारहाण केली आहे. एका महिलेला भररस्त्यात दुसऱ्या महिलेने चप्पलने मारहाण केल्याने शहरात खळबळ उडाली आहे.

पोलिसांनी महिलेला अटक केली आहे. या प्रकरणी विश्रामबाग पोलीस ठाण्यात मारहाण, सरकारी कामात अडथळानिर्माण करणे व इतर कलमानुसार गुन्हा नोंद केला आहे. याबाबत ३६ वर्षीय महिला पोलीस शिपाई यांनी तक्रार दिली आहे. त्यानूसार, ३५ वर्षीय महिलेला अटक केली आहे.

पोलिसांनी दिलेल्या माहितीनुसार, तक्रारदार या विश्रामबाग वाहतूक विभागात कर्तव्यास असून, त्या प्रतिनियुक्तीवर येथे आहेत. दरम्यान, बुधवारी दुपारी त्यांना टिळक चौकात कर्तव्य देण्यात आले होते. त्या टिळक चौकात दुपारी दीड वाजण्याच्या सुमारास वाहतूक नियमन करत होत्या. दरम्यान, यातील आरोपी महिला ताडीवाला रस्ता परिसरात राहत आहे.

संबंधित महिला मध्यवस्थीत आली होती. त्या दरम्यान, या महिलेची दुचाकी वाहतूक पोलिसांनी उचलून आणली होती. त्यामुळे संबंधित महिला दुचाकीसाठी या ठिकाणी आली होती. तक्रारदार या उभारल्या असताना महिला त्यांच्याजवळ आली व माझी गाडी येथे का आणली अशी विचारणा केली. तक्रारदारांनी त्यांची गाडी उचलली नसल्याने तसेच त्या विश्रामबाग विभागात असल्याने त्यांनी महिलेला मला माहित नाही. मी दुसऱ्या विभागात कर्तव्यास आहे. तुम्ही शेजारी असलेल्या फरासखाना वाहतूक विभागात चौकशी करा. त्याचा राग या महिलेला आला. तिने थेट अरेतुरेवर येत “तु पोलीस खात्यात असून, तुला माहिती नाही का”, असे म्हणत वाद घातला.

ही महिला इतकी चिडली की तिने अश्लील भाषेत शिवीगाळ करत त्यांना पायातील चप्पल काढून थेट मारहाण करण्यास सुरूवात केली. भरदुपारी गजबजलेल्या चौकात तिने महिला कर्मचाऱ्यांना चप्पलने बेदम मारहाण केली. तर, त्यांचा ड्रेस फाडून त्यांच्या चेहऱ्यावर नख देखील ओरखाडले. त्यानंतर महिला पोलीस कर्मचाऱ्यांनी मदत मागविली. तरीही ही महिला शांत झाली नाही. तिने अश्लील शिवीगाळ सुरूच ठेवली. पोलिसांनी तिला ताब्यात घेऊन पोलीस ठाण्यात नेले. तिच्यावर गुन्हा दाखल करून तिला अटक केली. अधिक तपास विश्रामबाग पोलीस करत आहेत.

मारहाण सीसीटीव्हीत कैद..!

टिळक चौक परिसर सतत गर्दीने भरलेला असतो. तर, टिळक चौकात सीसीटीव्ही देखील आहेत. वाद सुरू झाल्याने या महिला कर्मचारी वाद नको म्हणून तेथून निघून पुढे जाऊन थांबल्या होत्या. तरीही या महिलेने तिथे जाऊन त्यांच्याशी वाद घातला व त्यांना चप्पलने मारहाण केली. हा सर्व प्रकार सीसीटीव्हीत कैद झाला असल्याचे पोलिसांनी सांगितले. दरम्यान, एका महिला कर्मचाऱ्याला चप्पलने मारहाण झाल्याने शहर पोलीस दलात खळबळ उडाली आहे.