Ahilyanagar मध्ये पुन्हा शिवसेनेचा भगवा फडकणार! अनिल भय्या राठोडांच्या कार्यालयाला भेट देत अर्जुन खोतकरांचा मोठा दावा

Ahilyanagar News: अहिल्यानगरच्या राजकीय वर्तुळात शिवसेनेच्या पुनरागमनाची चर्चा रंगली आहे. शिवसेना नेते अर्जुन खोतकर यांनी दिवंगत माजी मंत्री व आमदार अनिल भैय्या राठोड यांच्या कार्यालयाला भेट देत अहिल्यानगरमध्ये पुन्हा शिवसेनेचा भगवा फडकणार असल्याचा विश्वास व्यक्त केला.

• अहिल्यानगरमध्ये पुन्हा शिवसेनेचा भगवा फडकणार!
• अनिल भय्या राठोडांच्या कार्यालयाला भेट देत अर्जुन खोतकरांचा मोठा दावा
• आगामी विधानसभेवर शिवसेनेचाच दावा!

 

पोपट पिटेकर,अहिल्यानगर : विधानमंडळ समितीचे अध्यक्ष तथा शिवसेना आमदार अर्जुन खोतकर यांच्या अहिल्यानगर दौऱ्यामुळे स्थानिक राजकीय वर्तुळात मोठ्या घडामोडींना उधाण आले आहे. तीन दिवसांच्या दौऱ्यावर आलेल्या खोतकर यांनी आज शहरातील प्रसिद्ध विशाल गणपतीचे दर्शन घेतल्यानंतर थेट स्व. माजी आमदार अनिल भय्या राठोड यांच्या जनसंपर्क कार्यालयाला सदिच्छा भेट दिली. या भेटीदरम्यान त्यांनी अनिल भय्या राठोड यांच्या स्मृतींना उजाळा देत अहिल्यानगर विधानसभेवर पुन्हा एकदा शिवसेनेचाच आमदार निवडून येईल, असा ठाम विश्वास व्यक्त केला.

Ahilyanagar news: अहिल्यानगरच्या कर्जतमध्ये पर्यावरणपूरक उपक्रम; आईच्या नावाने लावली ७० झाडे

हिंदुत्वाचा बुलंद आवाज आजही जनतेच्या मनात कायम

अनिल भय्या राठोड यांचे स्मरण करताना अर्जुन खोतकर भावूक झाले होते. “अहिल्यानगर जिल्ह्यातील पहिले हिंदुत्ववादी आमदार म्हणून अनिल भय्यांनी निर्माण केलेली प्रतिमा आजही जनतेच्या मनात घर करून आहे. राजकारणात अनेक चढ-उतार येत असतात, परंतु त्यांनी रुजवलेले हिंदुत्वाचे विचार आणि जनसेवेचे व्रत आजच तितकेच जिवंत आहे,” असे प्रतिपादन खोतकर यांनी केले.

आगामी विधानसभेवर शिवसेनेचाच दावा!

नगर शहर विधानसभा मतदारसंघाच्या आगामी समीकरणांवर भाष्य करताना खोतकर म्हणाले की, “या मतदारसंघाशी शिवसेनेचे आणि अनिल भय्यांचे रक्ताचे नाते राहिले आहे. येत्या काळात अहिल्यानगर शहरात शिवसेनेचाच भगवा फडकेल आणि पक्षाचाच आमदार विधानसभेत जाईल.” खोतकर यांच्या या दाव्यामुळे स्थानिक शिवसैनिकांमध्ये नवचैतन्य पसरले आहे.

“नगर जिल्ह्यातील हिंदुत्वाचा पहिला बुलंद आवाज म्हणजे स्वर्गीय अनिल भय्या राठोड. राजकारणात जय-पराजयाचे चक्र सुरूच असते, पण भय्यांचे विचार आणि नगरकरांच्या मनातील त्यांचे स्थान अबाधित आहे. अहिल्यानगर शहर हा शिवसेनेचा बालेकिल्ला राहिला आहे आणि येणाऱ्या काळात इथे शिवसेनेचाच आमदार निवडून येईल, यात शंका नसल्याचं अर्जुन खोतकर यांनी सांगितली.

मात्र, “अहिल्यानगरमध्ये पुन्हा शिवसेनेचा भगवा फडकणार” हा अर्जुन खोतकरांचा राजकीय दावा आहे; त्याला आगामी निवडणुकीतील प्रत्यक्ष निकालाची हमी म्हणून मांडता येणार नाही. अंतिम चित्र निवडणुकीतील उमेदवार, स्थानिक आघाड्या, संघटनात्मक ताकद आणि मतदारांचा कौल यावर अवलंबून असेल.

Ahilyanagar News: ‘लेडी सिंघम’ची जोरदार कारवाई: हुकूमशाही आणि अडथळ्यांना न जुमानता कारवाईचा धडाका!