बुधवार, 7 ऑक्टोबर 2026
अकोल्यात वाढतोय डेंग्यू, चिकनगुनियाचा धोका; डेंग्यूचे 155 तर चिकनगुनियाचे 130 रुग्ण
ग्रामीण भागात डेंग्यूच्या ६०४ तपासण्यांत ७४, तर चिकनगुनियाच्या ६०४ तपासण्यांत ४५ रुग्ण आढळले. महापालिका क्षेत्रात १ हजार ४७ तपासण्यांत ८१ डेंग्यू आणि ५८ चिकनगुनियाचे रुग्ण आढळले. सध्या तिन्ही आजारांची स्थिती नियंत्रणात असल्याचे आरोग्य विभागाने स्पष्ट केले आहे. पावसाळ्यानंतर डासांची उत्पत्ती वाढण्याची शक्यता लक्षात घेता आरोग्य विभागाने आरोग्य संस्थांना औषधे व उपचार साहित्य उपलब्ध ठेवण्याच्या सूचना दिल्या आहेत. संशयित रुग्णांची रक्त तपासणी करून उपचार केले जात आहेत.
दारूच्या नशेत बापाचा मुलीवर बळजबरी करण्याचा प्रयत्न; संतापलेल्या मुलीने थेट बॅट घातली डोक्यात अन्…
सध्या ग्रामीण भागात डेंग्यूसाठी जलपात सर्वेक्षण करून रक्त नमुने घेण्यात येत आहे. तसेच एखाद्या रूग्णाला पाच दिवसांहून अधिक ताप असल्यास त्याचे रक्तजल नमुने घेण्यात येत आहेत. यासोबतच ज्या ठिकाणी डास जास्त आढळल्यास धूळ फवारणी केल्या जात आहे. तसेच त्या ठिकाणी टेलिपॉस टाकल्या जात आहे. अधिक डासांची संख्या असलेल्या ठिकाणी धूळ फवारणी मोठ्या प्रमाणात करण्यात येत आहे. काही ठिकाणी डबके किंवा पाणी साचल्यास गप्पी मासे सोडले जात आहे, ही माहिती आरोग्य विभागाकडून देण्यात आली.
1047 चिकनगुनिया तपासण्या
तसेच डेंग्यू, मलेरिया व चिकनगुनियाबाबत नवरात्रोत्सवातील विविध मंडळांसमोर स्टॉल लावून जनजागृती केली जाणार आहे. ग्रामपंचायतींनी साचलेले पाणी हटविणे, नाल्यांची स्वच्छता, डासांची उत्पत्तीस्थळे नष्ट करणे आणि आवश्यकतेनुसार फवारणी करणे अपेक्षित आहे. शहरात डेंग्यूचे ८१ आणि चिकनगुनियाचे ५८ रुग्ण आढळल्याने बाधित परिसरात विशेष खबरदारी घेऊन फवारणी केली जात असल्याचे प्रशासनाने सांगितले. २०२५ मध्ये जिल्ह्यात डेंग्यूचे ३०६ आणि मलेरियाचे १७ रुग्ण आढळले होते. कीटकजन्य आजारांचे ६ उद्रेकही नोंदवण्यात आले होते. शहरात 1047 चिकनगुनिया तपासण्या केल्या जात आहेत.
मलेरियाच्या २ लाख ९८ हजारांवर तपासण्या
आरोग्य विभागाकडून मलेरियासाठी आतापर्यंत २ लाख ९८ हजारी २५६ तपासण्या करण्यात आल्या असून, ३० मलेरियाचे रुग्ण आढळल्याची माहिती आहे. आरोग्य विभागाकडून नियमित तपासणी व प्रतिबंधात्मक उपाययोजना केल्या जात आहेत. नागरिकांनी घराभोवती पाणी साचू देऊ नये. ताप किवा अंगदुखीची लक्षणे दिसताच रक्त तपासणी करून घ्यावी. ग्रामपंचायतींनाही स्वच्छता व डास नियंत्रणाच्या उपाययोजना प्रभावीपणे राबविण्याच्या सूचना देण्यात आल्या आहेत.
