बुधवार, 23 सप्टेंबर 2026
अकोल्यात 'मिशन सुधार'चा दणका; तब्बल 10 हजारांवर शिधापत्रिका अपात्र, रेशनचा धान्य पुरवठा होणार बंद
अकोला : राज्य शासनाने सार्वजनिक वितरण व्यवस्थेत पारदर्शकता आणण्यासाठी आणि अपात्र लाभार्थ्यांना आळा घालण्यासाठी ‘मिशन सुधार’ अभियान हाती घेतले आहे. या मोहिमेंतर्गत आधार डेटाबेस आणि शिधापत्रिकेवरील माहितीचा मेळ घालून लाभार्थ्यांची व्यापक पडताळणी करण्यात येत आहे. अकोला जिल्ह्यात राबवण्यात आलेल्या या मोहिमेत १० हजार ७२८ शिधापत्रिका अपात्र ठरविण्यात आल्या असून, त्यावरील धान्याचा पुरवठा बंद करण्यात आला आहे, अशी माहिती पुरवठा विभागाने दिली.
अकोला जिल्ह्यातील रेशन धान्य दुकानांमार्फत पात्र लाभार्थ्यांना शासनाकडून नियमित धान्य वितरित केले जाते. मात्र, काही शिधापत्रिकांवर पात्रतेच्या निकषांत न बसणाऱ्या व्यक्तींची नावे कायम असल्याचे आढळून आले होते. तसेच दुबार नोंदणी, स्थलांतर, मृत व्यक्तींची नावे, उत्पन्नातील बदल आणि अन्य पात्रता निकषांच्या आधारे शिधापत्रिकांची पडताळणी करण्यात आली आहे.
Ration Card e-KYC : रेशन कार्डधारकांनो, ही बातमी तुमच्यासाठी ! घरबसल्या मोबाईलवरून करा eKYC
‘मिशन सुधार’ अंतर्गत शिधापत्रिकांवरील माहिती उपलब्ध शासकीय नोंदी आणि आधार डेटाबेसशी पडताळण्यात आली, या प्रक्रियेत अपात्र आढळलेल्या शिधापत्रिका निश्चित करण्यात आल्या असून, संबंधित शिधापत्रिकांवरून धान्याची उचल करण्यास प्रतिबंध करण्यात आला आहे. या कारवाईमुळे सार्वजनिक वितरण व्यवस्थेवरील अनावश्यक भार कमी होऊन पात्र लाभाथ्यापर्यंत धान्य अधिक प्रभावीपणे पोहोचण्यास मदत होणार आहे.
पुढील काळातही मोहीम सुरूच
अपात्र ठरविण्यात आलेल्या शिधापत्रिकाधारकांना आपल्या पात्रतेबाबत आक्षेप असल्यास आवश्यक पुराव्यांसह पुरवठा विभागाशी संपर्क साधता येणार आहे. सादर करण्यात आलेल्या कागदपत्रांच्या आधारे संबंधित प्रकरणाची फेरतपासणी केली जाणार आहे. ‘मिशन सुधार च्या माध्यमातून शिधापत्रिकामधील त्रुटी दूर करण्यासोबतच धान्य वितरणात पारदर्शकता वाढविण्यावर भर देण्यात येत आहे. त्यामुळे आगामी काळातही शिधापत्रिकांची पडताळणी सुरू राहणार आहे.
धान्य पुरवठा करण्यात आला बंद
मिशन सुधार मोहिमेतर्गत तपासणी करण्यात आलेल्या शिधापत्रिकाधारकांना धान्य पुरवठा बंद करण्यात आला आहे. मात्र, शिधापत्रिकेवर मिळणारे इतर लाभ त्यांना चालूच राहणार आहेत.
– रवींद्र यन्नावर, जिल्हा पुरवठा अधिकारी, अकोला.
मोठी बातमी ! कागदी शिधापत्रिका होणार आता इतिहासजमा; 1 लाख शिधापत्रिका ‘ऑनलाईन’
