'या' जिल्ह्यामध्ये 'हीट वेव्ह'चा इशारा, उष्माघात टाळण्यासाठी जिल्हा आरोग्य यंत्रणा अलर्ट
अमरावती : विदर्भात उन्हाचा तडाखा दिवसेंदिवस तीव्र होत असून तापमानाने ४० अंश सेल्सिअसचा टप्पा ओलांडला आहे. पुढील काही दिवस ‘हीट वेव्ह’चा इशारा हवामान विभागाने दिल्यामुळे अमरावती जिल्ह्यात आरोग्य यंत्रणा अलर्ट मोडवर आली आहे. उष्माघाताच्या संभाव्य धोक्याचा विचार करून जिल्हा सामान्य रुग्णालयात (इर्विन) विशेष तीन वॉर्ड सुरू करण्यात आले आहेत. सध्या दुपारच्या वेळेत रस्ते शुकशुकाट दिसत असून नागरिक घराबाहेर पडणे टाळत आहेत. मार्च महिन्याच्या सुरुवातीपासूनच उन्हाची तीव्रता जाणवली असल्याने उष्माघाताच्या रुग्णसंख्येत वाढ होण्याची भीती व्यक्त केली जात आहे.
जिल्हा सामान्य रुग्णालयात महिलांसाठी वॉर्ड क्रमांक १. पुरुषांसाठी वॉर्ड क्रमांक ६, आणि लहान मुलांसाठी वॉर्ड क्रमांक ५ आरक्षित करण्यात आले आहेत. या वॉर्डमध्ये उष्माघाताच्या रुग्णांवर तत्काळ उपचार करता येतील, अशी व्यवस्था केली गेली आहे. तसेच, ग्रामीण भागातील प्राथमिक आरोग्य केंद्रे आणि उपजिल्हा रुग्णालयांमध्ये स्वतंत्र ‘कोल्ड रूम’ वॉर्ड तयार करण्यात आले आहेत. आवश्यक औषधांचा साठा उपलब्ध करून देण्यात आला असून वैद्यकीय पथकेही सज्ज ठेवण्यात आली आहेत. आरोग्य विभागाने नागरिकांना दुपारच्या कडक उन्हात बाहेर पडणे टाळावे, भरपूर पाणी प्यावे आणि लक्षणे दिसताच त्वरित उपचार घ्यावेत असे आवाहन केले आहे.
प्रत्येक तालुक्यागे सरासरी सुमारे ४ प्राथमिक आरोग्य केंद्रे आहे. ग्रामीण भागांत आरोग्य सुविधा उपलब्ध असल्या तरी उष्णतेच्या वाढत्या संकटात ही संख्या मर्यादित ठरू शकते. प्रत्येक प्राथमिक आरोग्य केंद्रामागे सुमारे २८ गावे आहेत. एका केंद्रावर मोठा लोकसंख्येचा ताण वाढत आहे. प्रत्येक आरोग्य पथकावर सुमारे १३८ गावे आहेत. पथकांची संख्या तुलनेने कमी असून तातडीच्या प्रतिसादात अडचणीची शक्यता आहे. वैद्यकीय पथकांची तालुकानिहाय जवळपास प्रत्येक तालुक्यास १ पथक उपलब्धता आहे.
विभागाकडून आवश्यक त्या उपाययोजना करण्यात येत आहेत. उपचारासोबतच जनजागृती आणि कर्मचाऱ्याऱ्यांना प्रशिक्षण देण्याचे नियोजन करण्यात आले आहे, अशी माहिती अमरावती डॉ. प्रवीण पारिसे यांनी दिली.
एकूण तालुके – 14
प्रा. आरोग्या केंद्रे – 59
आरोग्य उपकेंद्रे – ३३९
आरोग्य पथके – १२
वैद्यकीय पथके – १४
एकूण गावे – १६६३
जि. विशेष पथक – 30
.png "Videos"){kind=small}
