कल्याण पूर्वेत पुन्हा रक्तरंजित राडा, एकाची हत्या तर तीन जखमी

कल्याण पूर्वेतील जय मल्हार हाटेलसमोर काही तरुण उभे होते. या तरुणांनी पााहिले की, प्रेम भोवाड नावाचा तरुण त्याचा मित्र यश गुप्ता आणि राहूल केणी सोबत जात होता.

कल्याण – अमजद खान : कल्याण पूर्वेत सोमवारी मध्यरात्री रक्तरंजित राडा झाल्याची धक्कादायक घटना समाेर आली आहे. तरुणांच्या दोन गटात झालेल्या हाणामारीत एकाचा मृत्यू तर तीन जण जखमी झाले आहेत. कल्याण पूर्वेतील चेतना ते आडीवली परिसरात ही घटना घडली आहे. घटनेचे कारण इतकेच होते की, एका तरुणाने दुसऱ्या तरुणाला आवाज देत थांबण्यास सांगितले. तो तरुण आवाज ऐकूनही थांबला नाही. त्यामुळे त्याची निर्घृणपणे हत्या करण्यात आली आहे. या प्रकरणी कोळसेवाडी पोलिसांनी काही तरुणांना ताब्यात घेत पुढील तपास सुरु केला आहे.

कल्याण पूर्वेतील जय मल्हार हाटेलसमोर काही तरुण उभे होते. या तरुणांनी पााहिले की, प्रेम भोवाड नावाचा तरुण त्याचा मित्र यश गुप्ता आणि राहूल केणी सोबत जात होता. या तिघांना जनकल्याण खाजगी रुग्णालयात जायचे होते. मात्र जय मल्हार हाटेलसमोर उभे असलेल्या तरुणांनी या तिघांना थांबण्यास सांगितले. तिघेही थांबले नाही. ते रुग्णालयात गेले. रुग्णालयातून ते तिघे पुन्हा त्याच रस्त्याने येत असताना योगेश पटेल जो बांधकाम व्यावसायिक आहे. याने त्याचा मित्र राहूल पाठक, संतोष यादव यांच्यासह प्रेम आणि यश या दोघांना मारहाण करण्यास सुरुवात केली. कसेबसे यश गुप्ता हा त्यांच्या तावडीतून सूटून घरी पळाला. योगेश पटेल हा त्याच्या साथीदारांना घेऊन यशचे घर गाठले.

घरासमोरच यशच्या छातीत चाकू भोसकला. यावेळी यशचा भाऊ जिगर हा मध्यस्थी करण्यासाठी आला असता त्याच्या मानेवारही चाकूने प्रहार करुन त्याला गंभीर जखमी केले. या घटनेत यश गुप्ता याचा जागीच मृत्यू झाला आहे. या हाणामारीत आरोपी योगेश पटेल आणि त्याचा साथीदार संतोष यादव हा देखील जखमी झाला आहे. या दोघांवर रुग्णालयात उपचार सुरु आहे. मात्र एका किरकोळ कारणातून एका तरुणाची हत्या करण्यात आल्याने एकच खळबळ उडाली आहे. सध्या चेतना ते आडीवली परिसर हा वादग्रस्त ठरत आहे. रात्रीच्या वेळी टोळक्यांची या रस्त्यावर गर्दी असते.