आपत्कालीन परिस्थितीसाठी पुणे जिल्हा प्रशासन सज्ज; दहा सॅटेलाईट फोनची केली व्यवस्था

हा फोन जो थेट पृथ्वीभोवती फिरणाऱ्या उपग्रहांशी संवाद साधून कॉल किंवा मेसेज पाठवतो. सामान्य मोबाईल फोन मोबाइल टॉवर्सवर अवलंबून असतो. पण सॅटेलाईट फोनला मोबाईल टॉवरची गरज लागत नाही.

पुणे : आपत्ती अथवा आणीबाणीच्या परिस्थितीत जिल्हा प्रशासनाचा संपर्क कायम राहावा यासाठी पुणे जिल्ह्यातील 10 तहसील कार्यालयांमध्ये सॅटेलाईट फोन सज्ज ठेवण्यात आले आहेत. दुर्गम, दरडग्रस्त तसेच पूरप्रवण भागांमध्ये नेहमीच मोबाईल नेटवर्कची अडचण निर्माण होते. त्यामुळे दुर्घटना घडल्यावर माहिती वेळेवर प्रशासनाकडे पोहोचत नाही आणि मदत कार्यात विलंब होतो. ही परिस्थिती टाळण्यासाठी जिल्हा आपत्ती व्यवस्थापन विभागाने हा निर्णय घेतला आहे.

सॅटेलाईट फोन थेट उपग्रहांशी संपर्क साधून काम करतो. त्यामुळे कोणतेही मोबाईल नेटवर्क नसले तरी संवाद साधता येतो. सॅटेलाईट फोनवरून मोबाईल व लँडलाईन नंबरवर थेट संपर्क साधता येतो, ज्यामुळे आपत्कालीन परिस्थितीत तत्काळ प्रतिसाद देणे शक्य होते. पुणे जिल्ह्यातील जुन्नर, आंबेगाव, खेड, मावळ, मुळशी, वेल्हा, भोर, पुरंदर, बारामती आणि दौड या १० तहसील कार्यालयांमध्ये सॅटेलाईट फोन उपलब्ध करून देण्यात आले आहेत.

यामध्ये विशेषतः दौड आणि बारामती हे पूरप्रवण तालुके असून, मे महिन्यात झालेल्या अवकाळी पावसात या भागांतील अनेक गावांचा संपर्क तुटला होता. अशा वेळी सॅटेलाईट फोनमुळे जिल्हा प्रशासनाशी संपर्क राखणे शक्य होते. मान्सून काळात भटकंतीसाठी जुन्नर ते भोर या पट्ट्यात पर्यटकांची मोठी गर्दी असते. तसेच पालखी सोहळे, उत्सव, डोंगरदऱ्यांतील यात्रा आणि दरड कोसळण्याच्या घटनाही घडतात. या पार्श्वभूमीवर सदर तालुक्यांमध्ये सॅटेलाईट फोनची उपलब्धता अत्यंत उपयुक्त ठरणार आहे.

काय आहे सॅटेलाईट फोन?

हा फोन जो थेट पृथ्वीभोवती फिरणाऱ्या उपग्रहांशी संवाद साधून कॉल किंवा मेसेज पाठवतो. सामान्य मोबाईल फोन मोबाइल टॉवर्सवर अवलंबून असतो. पण सॅटेलाईट फोनला मोबाईल टॉवरची गरज लागत नाही. या फोनची बॅटरी दीर्घकाळ टिकते त्याच कारण म्हणजे हा फोन सतत सिग्नल शोधत नाही. सामान्य फोनपेक्षा सॅटेलाईट फोन व सेवा दोन्ही महाग असते. मात्र, सॅटेलाईट फोन खरेदी व वापरासाठी शासनाची विशेष परवानगी आवश्यक असते.