आनंदाची बातमी ! म्हाडाकडून बांधली जाणार तब्बल 19497 घरे; ‘अशी’ असते अर्ज प्रक्रिया…

मुंबई आणि कोकण मंडळांसोबतच, म्हाडाने नाशिक, पुणे, छत्रपती संभाजी नगर आणि नागपूर येथे घरे बांधण्याची योजना आखली आहे. मुंबईतील घरांची मागणी लक्षात घेऊन, म्हाडाने मुंबई मंडळाची विशेष काळजी घेतली आहे.

मुंबई : आपलं स्वत:चं हक्काचं घर असावं अशी अनेकांची इच्छा असते. त्यानुसार, अनेक प्रयत्नही केले जातात. पण, घरांच्या वाढत्या किमतीमुळे घराचं स्वप्न हे स्वप्नच राहून जातं. मात्र, आता तुम्हाला यातून मोठा आधार मिळणार आहे. कारण, म्हाडाकडून तब्बल 19497 घरे बांधली जाणार आहेत. त्यात म्हाडाचे मुंबई बोर्ड नागरिकांना परवडणारी घरे उपलब्ध करून देण्यासाठी 5749.49 कोटी रुपये खर्च करणार आहे.

मुंबई आणि कोकण मंडळांसोबतच, म्हाडाने नाशिक, पुणे, छत्रपती संभाजीनगर आणि नागपूर येथे घरे बांधण्याची योजना आखली आहे. मुंबईतील घरांची मागणी लक्षात घेऊन, म्हाडाने मुंबई मंडळाची विशेष काळजी घेतली आहे. घर बांधणीसाठी देण्यात आलेल्या एकूण रकमेपैकी सुमारे 36 टक्के रक्कम मुंबईत घरे बांधण्यासाठी ठेवण्यात आली आहे. म्हाडाने अर्थसंकल्पात राज्यभरात 19497 घरे बांधण्याची योजना आखली आहे.

मुंबई तसेच ठाणे, कल्याण, डोंबिवली, मीरा रोड, विरार येथे घर घेण्याचे स्वप्न पाहणाऱ्यांसाठी कोकण मंडळाने 2025-26 मध्ये 9902 घरे बांधण्याची योजना आखली आहे. ही घरे बांधण्यासाठी कोकण मंडळाकडून 140.85 कोटी रुपये खर्च केले जातील.

महाराष्ट्र गृहनिर्माण क्षेत्र विकास प्राधिकरण (म्हाडा) पुढील एका वर्षात मुंबईत 5199 घरे बांधणार आहे. म्हाडाचे मुंबई बोर्ड नागरिकांना परवडणारी घरे उपलब्ध करून देण्यासाठी 5749 कोटी रुपये खर्च करणार आहे. वाढत्या मालमत्तेच्या किमतींमध्ये नागरिकांना परवडणारी घरे उपलब्ध करून देण्यासाठी, म्हाडाने 2024-25 चा सुधारित अर्थसंकल्प आणि 2025-26 चा अर्थसंकल्प सादर केला. त्यात ही तरतूद करण्यात आली आहे.

जोगेश्वरी पूर्वसाठी 350 कोटी रुपये

जोगेश्वरी पूर्व येथील पीएमजीपी कॉलनी पुनर्विकास प्रकल्पासाठी 350 कोटी रुपये, वांद्रे पश्चिम येथील परिध खाडी पुनर्विकास प्रकल्पासाठी 205 कोटी रुपये, गोरेगाव सिद्धधार्थ नगर येथे सदनिका उभारणीसाठी 573 कोटी रुपयांची तरतूद करण्यात आली आहे. जोगेश्वरी पूर्वेतील पीएमजीपी कॉलनी प्रकल्पासाठी 350 कोटी रुपये, वांद्रे पश्चिमेतील परिधान खाडी पुनर्विकास प्रकल्पासाठी 205 कोटी रुपये, गोरेगाव येथील सिद्धार्थ नगर येथे घरे बांधण्यासाठी 573 कोटी रुपयांची तरतूद आहे.

विरार बोळींज येथे क्लब हाऊस

विरार बोळींज येथे क्लब हाऊस, जलतरण तलाव व भूखंड विकसित करण्याच्या कामासाठी ३३.८५ कोटी रुपये, वर्तकनगर-ठाणे पोलिस वसाहत इमारतींचा पुनर्विकास कामासाठी ९० कोटी रुपये, गोठेघर प्रधानमंत्री आवास योजना (शहरी) योजनेसाठी ११५ कोटी रुपयांची अर्थसंकल्पात तरतूद करण्यात आली आहे.

चंद्रपूर विशेष नियोजन प्राधिकरण

नागपुर मंडळांतर्गत चंद्रपुर विशेष नियोजन प्राधिकरण योजनेसाठी ३७१.२० कोटी रुपये, टेक्सटाइल पार्क एम्प्रेस मिल योजनेसाठी ३५० कोटी रुपये अर्थसंकल्पात तरतूद करण्यात आली आहे.

ठाण्यात होणार हेल्थ केअर सेंटर

कोकण मंडळांतर्गतच्या पाचपाखाडी-ठाणे सावरकर नगर येथे दोन मजल्यांचे हेल्थ केअर सेंटर व निवासी घरकुल योजनेसाठी १५ कोटी रुपये, माजिवाडे-ठाणे विवेकानंद नगर येथे १०० बेडचे वृद्धाश्रम व काम करणाऱ्या महिलांसाठी वसतिगृह उभारणीसाठी ३० कोटी रुपयांची तरतूद केली आहे.

पुण्यात उभारणार १८३६ सदनिका

पुणे मंडळाअंतर्गत १८३६ सदनिकांचे बांधकाम करण्याचे उद्दीष्ट आहे. त्यासाठी सन २०२५-२६ च्या अर्थसंकल्पात ५८५.९७कोटी रुपयांची तरतूद करण्यात आली आहे. तसेच नागपूर मंडळाअंतर्गत ६९२ सदनिकांचे बांधकाम करण्याचे प्रस्तावित आहे. त्यासाठी १००९.३३ कोटींची तरतूद केली आहे.

अशी असेल अर्ज प्रक्रिया…

• म्हाडाचे अधिकृत संकेतस्थळ housing.mhada.gov.in ला भेट द्या.
• नोंदणी करा : जर तुम्ही आधी नोंदणी केली नसेल, तर नोंदणी करा.
• लॉग इन करा : तुमच्या नोंदणीकृत ई-मेल आयडी आणि पासवर्डने लॉग-इन करा.
• अर्ज करा : तुम्हाला ज्या योजनेसाठी अर्ज करायचा आहे, ती योजना निवडा आणि आवश्यक माहिती भरा.
• आवश्यक कागदपत्रे अपलोड करा : आवश्यक कागदपत्रांची स्कॅन केलेली प्रत अपलोड करा.
• फी भरणा : अर्ज शुल्क भरा.
• अर्जाची प्रत डाउनलोड करा : अर्ज यशस्वीरित्या सबमिट झाल्यावर, त्याची प्रत डाउनलोड करा आणि जपून ठेवा.