बाळासाहेब ठाकरे स्मारकाचे सुशोभीकरण करा; महाबळेश्वर शिवसेनेचे मुख्याधिकाऱ्यांना निवेदन

सध्या हिंदुहृदयसम्राट बाळासाहेब ठाकरे यांचे जन्मशताब्दी वर्ष सुरू आहे. या वर्षाचे औचित्य साधून या स्मारकाच्या सुशोभीकरणाचे काम प्राधान्याने हाती घेणे गरजेचे आहे.

महाबळेश्वर : शहरातील हिंदुहृदयसम्राट बाळासाहेब ठाकरे चौकातील स्मारकाचे प्रलंबित असलेले सुशोभीकरण आणि दुरुस्तीचे काम तातडीने मार्गी लावावे. अन्यथा तीव्र आंदोलन छेडले जाईल, असा इशारा शहर शिवसेना (उद्धव बाळासाहेब ठाकरे) पक्षाच्या वतीने महाबळेश्वर गिरीस्थान नगरपरिषदेला देण्यात आला आहे. यासंदर्भात नगरपरिषदेचे नगराध्यक्ष सुनील शिंदे उपनगराध्यक्ष नासिरभाई मुलाणी आणि मुख्याधिकारी योगेश पाटील यांना लेखी निवेदन सादर करण्यात आले आहे.

शिवसेनेने दिलेल्या निवेदनात म्हटले आहे की, स्व. बाळासाहेब ठाकरे चौकातील स्मारकाच्या सुशोभीकरणाबाबत गेल्या अनेक वर्षांपासून नगरपालिकेकडे पाठपुरावा सुरू आहे. यापूर्वी ५ नोव्हेंबर २०१९, ११ नोव्हेंबर २०१९, ११ जानेवारी २०२० आणि १६ फेब्रुवारी २०२१ अशा विविध तारखांना वारंवार निवेदने देऊनही प्रशासनाकडून अद्याप कोणतीही ठोस कार्यवाही झालेली नाही. प्रशासनाच्या या दिरंगाईमुळे शिवसैनिकांमध्ये मोठी नाराजी पसरली आहे.

सध्या हिंदुहृदयसम्राट बाळासाहेब ठाकरे यांचे जन्मशताब्दी वर्ष सुरू आहे. या वर्षाचे औचित्य साधून या स्मारकाच्या सुशोभीकरणाचे काम प्राधान्याने हाती घेणे गरजेचे आहे. मात्र, वारंवार मागणी करून सुद्धा पालिका प्रशासन दुर्लक्ष करीत असल्याने प्रशासनाच्या भूमिकेवर शहरातून प्रश्नचिन्ह उपस्थित केले जात आहे.

“प्रशासनाने या निवेदनाची गंभीर दखल घेऊन स्मारकाचे काम त्वरित सुरू करावे. जर याकडे दुर्लक्ष झाले, तर शिवसेनेच्या वतीने तीव्र आंदोलन करण्यात येईल,” असा इशारा या निवेदनातून देण्यात आला. यावेळी नगरसेवक अफजल सुतार, शरद बावळेकर, आर. डी. मोरे हे देखील उपस्थित होते. या निवेदनावर शिवसेना शहर प्रमुख महेश (राजा) वसंत गुजर, जिल्हा प्रमुख यशवंत घाडगे, विभाग प्रमुख शंकर ढेबे, शाखा प्रमुख शहानवाज खारकडे, तेजस बोधले बाळासाहेब ढेबे यांच्या सह्या असून यावेळी ते देखील उपस्थित होते.