गुरुवार, 1 ऑक्टोबर 2026
बजरंग सोनावणेंचे वाल्मिक कराड वर गंभीर आरोप
बीड : केज तालुक्यातील विलास घुले हत्या प्रकरणाला (Vilas Ghule Murder Case) आता नवं वळण मिळालं आहे. खासदार बजरंग सोनवणे यांनी पत्रकार परिषद घेत वाल्मीक कराड आणि सुग्रीव कराड यांच्यावर गंभीर आरोप केले आहेत. आपल्या मुलाला म्हणजेच सौरभ सोनवणे याला या प्रकरणात अडकवण्यासाठी कट रचण्यात आल्याचा दावा त्यांनी केला. या आरोपांच्या समर्थनार्थ सोनवणे यांनी ऑडिओ क्लिपही पत्रकारांना ऐकवली.
सोनवणे यांच्या दाव्यानुसार, वाल्मीक कराडने कारागृहातून सुग्रीव कराडला फोन केला आणि सौरभ सोनवणे याला विलास घुले हत्या प्रकरणात अडकवण्यासाठी प्रयत्न करण्याच्या सूचना दिल्या. मृतदेह पोलीस ठाण्यासमोर ठेवणे, पाण्याच्या टाकीवर चढून आंदोलन करणे आणि रास्ता रोको करण्यास सांगितल्याचाही दावा त्यांनी केला.
या संभाषणाची ऑडिओ क्लिप सोनवणे यांनी पत्रकार परिषदेत ऐकवली. संबंधित रेकॉर्डिंगची सत्यता तपासण्यासाठी ती फॉरेन्सिक लॅबमध्ये पाठवावी, अशी मागणीही त्यांनी केली आहे.
बजरंग सोनवणे यांनी दावा केला की, विलास घुले यांच्या हत्येच्या सुरुवातीच्या एफआयआरमध्ये आपल्या मुलाचं नाव नव्हतं. मात्र, नंतर पुरवणी जबाबात सौरभ सोनवणे यांचं नाव आल्याने त्यांनी यावर प्रश्न उपस्थित केले. आपल्या मुलाचा या हत्येशी कोणताही संबंध नसल्याचं सोनवणे यांनी पुन्हा स्पष्ट केलं. यापूर्वीही त्यांनी मुलाचा सहभाग सिद्ध झाल्यास त्याला स्वतः पोलिसांच्या ताब्यात देण्याची भूमिका मांडली होती.
दरम्यान, या प्रकरणात सौरभ सोनवणे यांची एसआयटीने चौकशीही केली होती. त्यामुळे आता सोनवणे यांनी केलेल्या नव्या आरोपांमुळे या प्रकरणातील राजकीय आणि तपासाच्या चर्चेला पुन्हा उधाण आलं आहे.
सोनवणे यांनी बीड कारागृह प्रशासनावरही प्रश्न उपस्थित केले असून, कारागृहातून मोबाईल आणि सिमच्या वापराबाबत चौकशी करण्याची मागणी केली आहे. तसेच या संपूर्ण प्रकरणातील कथित कॉल रेकॉर्डिंग, कारागृहातील हालचाली आणि आपल्या मुलाचं नाव पुरवणी जबाबात कसं आलं, याची चौकशी व्हावी, अशी मागणी त्यांनी केली.
सोनवणे यांनी केलेल्या आरोपांमुळे राज्यात खळबळ उडाली असून कथित ऑडिओ क्लिपची सत्यता आणि त्यातील आवाज नेमका कोणाचा आहे, याची अधिकृत पुष्टी अजून झालेली नाही. हि पुष्टी झाल्यानंतरच या दाव्यांबाबत अंतिम निष्कर्ष निघू शकतो. त्यामुळे आता तपास यंत्रणा या आरोपांकडे कशा पद्धतीने पाहते आणि पुढे काय कारवाई होते, याकडे लक्ष लागलं आहे.
