Buldhana: खरीप ई- पीक पाहणी नोंदणीला प्रारंभ; १० नोव्हेंबरपर्यंत पीक पाहणी पूर्ण करा,जिल्हाधिकाऱ्यांचे आवाहन

Buldhana Kharif E-Peek Survey: बुलढाणा जिल्ह्यात खरीप हंगाम २०२६-२७ साठी ‘केंद्रीय डीसीएस एमएच’ या नवीन मोबाइल अॅपद्वारे ई-पीक पाहणी व नोंदणी मोहिमेला सुरुवात झाली आहे.

• शेतकऱ्यांसाठी महत्त्वाची बातमी
• बुलढाण्यात ई-पीक पाहणीला सुरुवात
• अंतिम मुदत १० नोव्हेंबर

बुलढाणा: बुलढाणा जिल्ह्यात खरीप हंगाम २०२६-२७ साठी ‘केंद्रीय डीसीएस एमएच’ या नवीन मोबाइल अॅपद्वारे ई-पीक पाहणी व नोंदणी मोहिमेला सुरुवात झाली. जिल्ह्यातील सर्व शेतकरी बांधवांनी १० नोव्हेंबरपूर्वी आपल्या पिकांची नोंदणी गावातील नियुक्त सहाय्यकाकडून वेळेत पूर्ण करून घ्यावी, असे आवाहन जिल्हाधिकारी डॉ. प्रवीणकुमार देवरे यांनी केले.महाराष्ट्र शासनाच्या जमाबंदी आयुक्त आणि संचालक, भूमिअभिलेख कार्यालयाच्या निर्देशानुसार पीक पाहणी व नोंदणी मोहिमेला ११ ऑगस्टपासून सुरुवात झाली. ही ई-पीक पाहणी अधिक गतिमान आणि पारदर्शक करण्यासाठी प्रशासनातर्फे प्रत्येक गावासाठी विशेष ‘पीक पाहणी सहाय्यका’ची नियुक्ती करण्यात आली.

जिल्ह्यात खरीप हंगाम २०२६-२७ साठी केंद्रीय डीसीएस एमएच अॅपद्वारे एकूण ८ लाख ४१ हजार २९६ पीक पाहणी करावयाच्या मालकी प्लॉटपैकी ५ लाख ३० हजार २७९ प्लॉटवर संबंधित सहाय्यकांमार्फत ७/१२ वर पिकांची यशस्वी नोंदणी पूर्ण झाली आहे. उर्वरित क्षेत्रावर सर्व शेतकरी बांधवांनी आपल्या गावातील नियुक्त सहाय्यकाकडून ई-पीक – पाहणी अॅपद्वारे पिकांची नोंदणी करून घ्यावी, असे आवाहन करण्यात आले.

१०० टक्के ई-पीक पाहणी नोंदणी बंधनकारक

पीक पाहणीची नोंदणी ‘केंद्रीय डीसीएस एमएच’ मोबाइल अॅपद्वारे थेट शेतावर जाऊन पिकांची नोंदणी करून माहिती अपलोड करणे आवश्यक आहे. या सव्हें अंतर्गत १०० टक्के ई-पीक पाहणी नोंद करणे बंधनकारक करण्यात आले आहे. यामध्ये खरीप हंगामात शेतात उभे असलेले पीक, कायम पड अथवा चालू पड असलेल्या जमिनींची नोंद करणे आवश्यक आहे.

पीक विमा व शासकीय लाभासाठी अचूक नोंदणी आवश्यक

• खरीप हंगाम २०२६-२७ मध्ये ई-पीक पाहणीद्वारे पिकांची नोंदणी न केल्यास ७/१२ उताऱ्यावरील ‘पीक पेरा’ कोरा राहील, जो नंतर भरता येत नाही.
• यामुळे शेतकऱ्यांना पीक विमा, शासकीय अनुदान व इतर विविध योजनांचे लाभ मिळण्यास अडचणी निर्माण होऊ शकतात.
• अवेळी पाऊस किंवा इतर नैसर्गिक आपत्तीच्यावेळी पीकविम्याचा लाभ मिळवण्यासाठी ७/१२ वर अचूक पीक नोंद असणे अत्यंत आवश्यक आहे.

Washim News: पिण्याच्या पाण्याचे काटेकोर नियोजन करा; संबंधित अधिकाऱ्यांना जिल्हाधिकारी कुंभेजकर यांचे निर्देश