Farmer News: रब्बी हंगाम पीकविम्यासाठी १५ डिसेंबरपर्यंत मुदत; गहू, हरभरा, कांदा पिकाचा समावेश, कृषी विभागाचे आवाहन

Buldhana Pradhan Mantri Fasal Bima Yojana 2026: बुलढाणा जिल्ह्यात खरीप २०२६ आणि रब्बी २०२६-२७ हंगामासाठी सुधारित प्रधानमंत्री पीक विमा योजना लागू करण्यात आली असून, गहू, हरभरा, रब्बी कांदा आणि उन्हाळी भुईमूग या पिकांचा समावेश करण्यात आला आहे.

• बुलढाण्यातील शेतकऱ्यांसाठी महत्त्वाची बातमी
• गहू, हरभरा, कांदा पीकविम्याची मुदत जाहीर
• शेतकऱ्यांसाठी कृषी विभागाची महत्त्वाची सूचना

बुलढाणा: नैसर्गिक आपत्ती, प्रतिकूल हवामान आणि विविध कारणांमुळे पिकांचे नुकसान झाल्यास शेतकऱ्यांना आर्थिक संरक्षण मिळावे. तसेच त्यांचे आर्थिक स्थैर्य अबाधित रहावे, यासाठी राज्य शासनामार्फत सुधारित प्रधानमंत्री पीक विमा योजना राबविण्यात येत आहे. खरीप २०२६ आणि रब्बी हंगाम २०२६-२७ या एक वर्षाच्या कालावधीसाठी ही योजना अधिसूचित क्षेत्रातील अधिसूचित पिकांसाठी लागू करण्यात आली. रब्बी हंगामात जिल्ह्यातील जास्तीत जास्त शेतकऱ्यांनी या योजनेत सहभागी होऊन आपल्या पिकांचा विमा उतरवावा, असे कृषी अधीक्षक संतोष डाबरे यांनी आवाहन केले.

IND vs PAK: भारताची विजयी गर्जना! SAFF चॅम्पियनशिपमध्ये पाकिस्तानला लोळवलं; सुहेल भट्ट ठरला विजयाचा हिरो

रब्बी हंगाम २०२६-२७ मध्ये गहू (बागायत), हरभरा, रब्बी कांदा आणि उन्हाळी भुईमूग या चार पिकांचा योजनेत समावेश करण्यात आला आहे. अधिसूचित महसूल मंडळ अथवा क्षेत्रातील शेतकऱ्यांना या योजनेत सहभाग घेता येणार आहे. कर्जदार तसेच बिगर कर्जदार शेतकऱ्यांसाठी योजनेतील सहभाग ऐच्छिक ठेवण्यात आला आहे. गहू (बागायत), हरभरा आणि रब्बी कांदा या पिकांसाठी विमा योजनेत सहभागी होण्याची अंतिम मुदत १५ डिसेंबर २०२६ आहे. तर उन्हाळी भुईमूग पिकासाठी ३१ मार्च २०२७ पर्यंत नोंदणी करता येणार आहे. योजनेसाठीचे प्रधानमंत्री पीक विमा पोर्टल करण्यात आले.

कार्यान्वित कर्जदार शेतकऱ्यांना पीक विमा योजनेत सहभागी होण्यासाठी संबंधित कर्ज मंजूर करणाऱ्या बँकेमार्फत विहित नमुन्यात अर्ज सादर करणे आवश्यक आहे. योजनेत सहभागी व्हायचे नसल्यास नोंदणीच्या अंतिम मुदतीच्या किमान सात दिवस आधी संबंधित बँकेला लेखी स्वरूपात कळविणे बंधनकारक आहे.

दुष्काळसदृश परिस्थितीत विमा संरक्षण महत्त्वाचे

अल निनोच्या प्रभावामुळे निर्माण झालेली दुष्काळसदृश परिस्थिती लक्षात घेता, पिकांचे संभाव्य नुकसान आणि त्यातून उद्भवणारे आर्थिक संकट टाळण्यासाठी पीक विमा संरक्षण महत्त्वाचे आहे. त्यामुळे शेतकऱ्यांनी अंतिम मुदतीची प्रतीक्षा न करता वेळेत नोंदणी करून योजनेचा लाभ घ्यावा. अधिक माहितीसाठी संबंधित पीक विमा कंपनीचे कार्यालय, तहसीलदार कार्यालय किंवा तालुका कृषी अधिकारी कार्यालयाशी संपर्क साधावा, असे आवाहन कृषी विभागाने केले आहे.

जिल्ह्यासाठी बजाज जनरल इन्शुरन्स

बुलढाणा जिल्ह्यासाठी प्रधानमंत्री पीक विमा योजनेची अंमलबजावणी बजाज जनरल इन्शुरन्स कंपनी लिमिटेडमार्फत करण्यात येत आहे. जिल्ह्यातील शेतकऱ्यांसाठी प्रति हेक्टर विमा हप्ता गहू (बागायत) पिकासाठी ११२ रुपये ५० पैसे, हरभरा पिकासाठी १८० रुपये, तर रब्बी कांदा पिकासाठी ४ हजार ७५० रुपये विमा हप्ता निश्चित करण्यात आला आहे. उन्हाळी भुईमुगासाठी दिलेल्या माहितीत विमा हप्त्याचा दर नमूद नाही.

IPL 2027 आधी CSK-SRH चा गेमप्लॅन? ‘या’ चार खेळाडूंची ट्रेड डील फिक्स; कोणाचा पत्ता कट?