Washim News: पैनगंगा नदीची पाणीपातळी घटली; रिसोडच्या मसलापेन परिसरावर दुष्काळाचे सावट

Painganga River Risod Water Shortage: रिसोड तालुक्यातील मसलापेन परिसरातून वाहणाऱ्या पैनगंगा नदीची पाणीपातळी पावसाळ्यातही मोठ्या प्रमाणात खालावल्याने शेतकरी आणि नागरिकांची चिंता वाढली आहे.

• पैनगंगा नदी ठरतेय चिंतेचा विषय
• सिंचनासह पशुधनाच्या पाण्याचाही प्रश्न गंभीर
• पावसाकडे लागल्या नजरा

रिसोड: तालुक्यातील मसलापेन परिसरातून वाहणाऱ्या पैनगंगा नदीची पाणीपातळी यंदा मोठ्या प्रमाणात खालावली आहे. पावसाळ्याच्या कालावधीतही नदीपात्रात अपेक्षित पाणीसाठा उपलब्ध नसल्याने परिसरातील शेतकरी आणि नागरिकांच्या चिंतेत वाढ झाली आहे. यावर्षी अपेक्षित प्रमाणात पाऊस न झाल्याने नदीपात्रात पाण्याची आवक अत्यल्प राहिली असून, आगामी काळात पाणीटंचाईची परिस्थिती निर्माण होण्याची शक्यता व्यक्त केली जात आहे. पैनगंगा नदी परिसरातील अनेक गावांसाठी शेतीच्या सिंचनाचा महत्त्वाचा जलस्रोत आहे. नदीपात्रात पुरेसा पाणीसाठा असल्यास शेतकरी नदीतून पाणी उपसा करून खरीप पिकांना आवश्यकतेनुसार सिंचन करतात. मात्र सध्या नदीपात्रातील पाणीपातळी मोठ्या प्रमाणात घटल्याने पाणी उपसा करणेही अडचणीचे ठरत आहे. त्यामुळे पावसाच्या प्रतीक्षेत असलेल्या शेतकऱ्यांची चिंता अधिकच वाढली आहे.

Buldhana News: ‘लेक लाडकी’ योजनेचा १२ हजार कुटुंबांना लाभ, मुलींच्या शिक्षणाला बळ; १४ हजार कुटुंबांची नोंदणी

कमी पावसाचा फटका

दरवर्षी पावसाळ्यात नदीपात्रात समाधानकारक पाणीसाठा निर्माण होतो. मात्र यंदा पावसाचे प्रमाण कमी राहिल्याने त्याचा थेट परिणाम नदीच्या पाणीपातळीवर झाला आहे. पाणीपातळी अशीच खालावत राहिल्यास खरीप पिकांसह रब्बी हंगामातील शेतीवरही त्याचा परिणाम होण्याची शक्यता आहे.

परिसरात पाणीटंचाईची समस्या

पावसाने आगामी काळात समाधानकारक हजेरी लावली नाही, तर मसलापेन परिसरात पाणीटंचाईसह दुष्काळसदृश परिस्थिती निर्माण होण्याची शक्यता नाकारता येत नाही. त्यामुळे पैनगंगा नदीच्या पाणीपातळीवर प्रशासनाने लक्ष ठेवून आवश्यक त्या उपाययोजना करण्याची गरज निर्माण झाली आहे.

पशुधनालाही फटका

• शेतीबरोबरच पशुधनासाठीही पैनगंगा नदी महत्त्वाचा पाण्याचा स्रोत आहे.
• नदीपात्रातील पाणीसाठा आणखी कमी झाल्यास जनावरांच्या पिण्याच्या पाण्याचा प्रश्न गंभीर होऊ शकतो.
• त्यामुळे प्रशासनाने सद्यस्थितीची दखल घेऊन परिसरातील जलस्रोत व पाणी उपलब्धतेचा आढावा घेण्याची मागणी शेतकरी व नागरिकांकडून होत आहे.

Washim News: दिव्यांगांना थकीत मासिक मानधन लवकरच मिळणार; आ. भावना गवळी यांची जनता दरबारात माहिती