Chandrapur News: चंद्रपुरात दुष्काळाचे संकट, आता जनावरांच्या चाऱ्याची चिंता! जिल्हाधिकाऱ्यांनी दिले महत्त्वाचे निर्देश

जिल्हाधिकारी वसुमना पंत यांनी आवाहन केले आहे की, चंद्रपूर जिल्ह्यातील दुष्काळी परिस्थिती लक्षात घेता पशुधनासाठी आतापासूनच चारा उत्पादनाचे नियोजन करावे. डॉ. निशांत नांदेश्वर यांनी विदर्भ-मराठवाडा दुग्धविकास प्रकल्पांतर्गत उपलब्ध योजनांची माहिती दिली.

• चारा उत्पादनातून शेतकरी व पशुपालकांना अतिरिक्त उत्पन्न मिळण्याच्या संधीही शोधाव्यात – जिल्हाधिकारी
• डॉ. निशांत नांदेश्वर यांनी विदर्भ-मराठवाडा दुग्धविकास प्रकल्पांतर्गत उपलब्ध योजनांची माहिती दिली

चंद्रपूर: जिल्ह्यातील दुष्काळी परिस्थिती लक्षात घेता पशुधनासाठी भविष्यात चारा टंचाई निर्माण होऊ नये, यासाठी आतापासूनच चारा उत्पादनाचे नियोजन करावे, असे आवाहन जिल्हाधिकारी वसुमना पंत यांनी केले. चारा लागवडीसाठी योग्य जागांची निवड करून शासकीय योजनांच्या माध्यमातून मोठ्या प्रमाणात चारा उत्पादनाला प्राधान्य द्यावे, असेही त्यांनी सांगितले.

Raigad News: १५८ कोटींच्या भुयारी गटार योजनेवरून माणगाव नगरपंचायतीत खडाजंगी! सत्ताधारी-विरोधक आमनेसामने, नेमकं काय घडलं?

नियोजन भवन येथे कृषी व पशुसंवर्धन विभागाच्या वतीने शुक्रवारी दुष्काळी परिस्थितीत चारा पिकांची लागवड व नियोजन या विषयावर आयोजित एकदिवसीय कार्यशाळेत त्या बोलत होत्या. यावेळी मुख्य कार्यकारी अधिकारी पुलकित सिंह, प्रकल्प संचालक मंजिरी टकले, पाटबंधारे विभागाचे अधीक्षक अभियंता जलेश सिंह, जिल्हा अधीक्षक कृषी अधिकारी शंकर तोटावार, पशुसंवर्धन व दुग्धविकास विभागाचे जिल्हा उपायुक्त डॉ. सुरेश कुंभरे आदी उपस्थित होते. महात्मा गांधी राष्ट्रीय ग्रामीण रोजगार हमी योजना आणि जिल्हा नियोजन समितीच्या निधीचा समन्वयातून वापर करून चारा उत्पादन वाढवावे. (फोटो सौजन्य – AI Created) 

केवळ यंदाच्या दुष्काळापुरते नियोजन न करता नियमित आणि शाश्वत चारा उत्पादनाची व्यवस्था निर्माण करावी. चारा उत्पादनातून शेतकरी व पशुपालकांना अतिरिक्त उत्पन्न मिळण्याच्या संधीही शोधाव्यात, असे जिल्हाधिकाऱ्यांनी स्पष्ट केले. चारा उत्पादनासाठी आधुनिक तंत्रज्ञान, उपलब्ध संसाधने आणि विविध शासकीय योजनांचा प्रभावी वापर करावा. कार्यशाळेत मिळालेल्या मार्गदर्शनाच्या आधारे संबंधित अधिकारी व कर्मचाऱ्यांनी प्रत्यक्ष क्षेत्रभेटी देऊन शेतकरी आणि पशुपालकांना मार्गदर्शन करावे. यासाठी सर्व विभागांमध्ये समन्वय आवश्यक असल्याचेही त्यांनी सांगितले.

डॉ. निशांत नांदेश्वर यांनी विदर्भ-मराठवाडा दुग्धविकास प्रकल्पांतर्गत उपलब्ध योजनांची माहिती दिली. दुष्काळी व कमी पाण्याच्या परिस्थितीत ज्वारी, बाजरी, मका, नेपियर गवत आणि लसूणघास यांसारख्या चारा पिकांची लागवड, चारा संवर्धन व साठवणूक, अतिरिक्त चाऱ्यापासून मुरघास निर्मिती, कडबा कुट्टी तसेच चाऱ्याची नासाडी रोखण्याच्या उपाययोजनांवर कार्यशाळेत चर्चा करण्यात आली.

Mumbai News: गरीबनगरमधील ९४ बांधकामांवर हातोडा! पात्र कुटुंबांचे पुनर्वसन; रेल्वेच्या पायाभूत सुविधांचा होणार विस्तार

तज्ज्ञांकडून चारा व्यवस्थापनाचे धडे

कार्यशाळेत जिल्हा उपायुक्त डॉ. सुरेश कुंभरे यांनी चंद्रपूर जिल्ह्यातील चारा टंचाई व्यवस्थापन व शाश्वत चारा विकास, तर डॉ. विलास गावखरे यानी चाऱ्याचे भौतिक प्रक्रियेद्वारे मूल्यवर्धन या विषयावर मार्गदर्शन केले. डॉ. सतीश अधळते यांनी चारा व्यवस्थापन व कृषी वनीकरणाची माहिती दिली. उपमुख्य कार्यकारी अधिकारी गिरीश बायगुडे यांनी ग्रामीण रोजगार व आजीविका अभियानाच्या माध्यमातून चारा लागवड आणि अझोला उत्पादनाच्या संधी स्पष्ट केल्या.

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)