Chandrapur News: चंद्रपुरात वाहतूक नियम तोडणाऱ्यांवर पोलिसांचा बडगा; 19 हजारांहून अधिक जणांवर कारवाई

चंद्रपुर शहरात रस्त्यावर उच्छाद मांडणाऱ्या तळीराम, विनाहेल्मेट सुसाट धावणारे आणि नियमांना पायदळी तुडवणाऱ्यांवर पोलिसांचा बडगा उगारला. वाहतूक पोलिसांच्या पथकाने चौका-चौकात उभे राहून उल्लंघन करणाऱ्यांवर कारवाई सुरु केली.

• विनाहेल्मेट वाहन चालवणाऱ्या ४,४२७ जणांवर कारवाई करत ४१ लाख २६ हजार रुपयांचा दंड वसूल करण्यात आला.
• ट्रिपल सीट, अस्ताव्यस्त पार्किंग आणि वाहन चालवताना मोबाईल वापरणाऱ्यांवरही मोठ्या प्रमाणात कारवाई करण्यात आली.
• ड्रंक अँड ड्राईव्ह आणि राँग साईडच्या ४९७ केसेस न्यायालयात वर्ग करण्यात आल्या आहेत.

चंद्रपूर: शहरातील चौकाचौकात नियमांची पायमल्ली करणाऱ्या बेफिकीर वाहनचालकांना शिस्त लावण्यासाठी चंद्रपूर वाहतूक पोलिसांनी कंबर कसली असून, संपूर्ण शहरात दंडात्मक धडक मोहीम सुरू केली आहे. रस्त्यावर उच्छाद मांडणाऱ्या तळीराम, विनाहेल्मेट सुसाट धावणारे आणि नियमांना पायदळी तुडवणाऱ्यांवर पोलिसांचा बडगा उगारला गेला. जुलै महिन्यात तब्बल १९ हजार ६२० जणांवर कारवाई करत, पोलिसांनी १ कोटी ६६ लाख रुपयांहून अधिकचा दंड वसूल केला.

Raigad News: महाडकरांना अखेर मोठा दिलासा! पाणीटंचाई दूर, नियमित पाणीपुरवठा पूर्ववत

जिल्ह्यातील वाढत्या अपघाताच्या संख्येला आळा घालण्याच्या अनुषंगाने पोलिस अधीक्षक आयुष नोपानी यांनी वाहतूक नियमांचे उल्लंघन करणाऱ्यांवर कारवाई करण्याचे निर्देश वाहतूक पोलिस निरीक्षक अमोल बारापात्रे यांना दिले आहे. त्यानुसार वाहतूक पोलिसांचे पथक चौका-चौकात उभे राहून उल्लंघन करणाऱ्यांवर कारवाई सुरु केली. वाहतूक पोलिसांनी दिलेल्या आकडेवारीनुसार, डोक्यावर हेल्मेट न घालता दुचाकी चालवणाऱ्या चालकांची संख्या सर्वाधिक आहे.  (फोटो सौजन्य – AI Created) 

जुलै महिन्यात विनाहेल्मेट प्रवास करणाऱ्या ४ हजार ४२७ चालकांवर कारवाई करत सर्वाधिक ४१ लाख २६ हजार रुपयांचा दंड वसूल करण्यात आला. तर दुचाकीवर तिघे बसून (ट्रिपल सीट) धोकादायक प्रवास करणाऱ्या १ हजार ७०७ चालकांकडून १७ लाख ५ हजार रुपये दंडापोटी वसूल करण्यात आले. शहरातील मुख्य रस्ते व चौकात अस्ताव्यस्त वाहने उभी करून वाहतुकीस अडथळा निर्माण करणाऱ्या २ हजार ९१३ वाहनचालकांवर दंडात्मक कारवाई करत २४ लाख ४८ हजार रुपये दंड आकारण्यात आला. तसेच वाहन चालवताना फोनवर बोलणाऱ्या ९१६ जणांना १० लाख ९९ हजार, तर सीटबेल्ट न वापरणाऱ्या २०६ चारचाकी चालकांना ९ लाख ६ हजार रुपयांचा दंड ठोठावण्यात आला.

दारूच्या नशेत वाहन चालवून स्वतःचा व इतरांचा जीव धोक्यात घालणाऱ्या ४४५ तळीरामांवर ‘ड्रंक अँड ड्राईव्ह’ अंतर्गत कडक कारवाई करण्यात आली. याशिवाय अत्यंत धोकादायक पद्धतीने विरुद्ध दिशेने (राँग साईड) वाहन चालवणाऱ्या ५२ चालकांवरही कारवाई करण्यात आली आहे. हे दोन्ही गुन्हे गंभीर स्वरूपाचे असल्याने या सर्व ४९७ केसेस दंडासाठी थेट न्यायालयात वर्ग करण्यात आल्या आहेत.

Someshwar Sugar Factory Politics: सोमेश्वर कारखाना निवडणुकीत मोठा ट्विस्ट! शहाजी काकडे सुनेत्रा पवारांच्या पाठीशी राहणार

शहरातील वाढते अपघात रोखणे आणि वाहतुकीला योग्य शिस्त लावणे हाच या धडक मोहिमेमागचा मुख्य उद्देश आहे. दंडात्मक कारवाई करणे हा पोलिसांचा हेतू नसून, नागरिकांनी स्वतःच्या सुरक्षेसाठी वाहतूक नियमांचे पालन करावे हा संदेश देणे आहे. विनाहेल्मेट प्रवास, ड्रंक अँड ड्राईव्ह आणि राँग साईड वाहन चालवणे हे थेट जीवावर बेतू शकते, त्यामुळे चालकांनी दंडाच्या भीतीपोटी नव्हे, तर स्वतःच्या व इतरांच्या सुरक्षिततेसाठी नियमांचे तंतोतंत पालन करावे. – अमोल बारापात्रे, वाहतूक पोलिस निरीक्षक,
चंद्रपूर

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)