शनिवार, 14 नोव्हेंबर 2026
Chandrapur News: पतंग उडवताना सावधान! नायलॉन मांजा वापरल्यास २५ हजारांचा दंड; चंद्रपूर जिल्हाधिकाऱ्यांचा मोठा निर्णय
नायलॉन व सिंथेटिक मांजामुळे नागरिकांना गंभीर दुखापती होण्यासह जीवितहानीचा धोका निर्माण होतो. तसेच पक्षी व प्राण्यांनाही या मांजामुळे इजा होण्याच्या घटना घडतात. या पार्श्वभूमीवर न्यायालयाच्या निर्देशानुसार जिल्ह्यात नायलॉन मांजाच्या वापरासह विक्री व साठवणुकीवर कठोर निर्बंध लागू करण्यात आले आहेत. कोणतीही सज्ञान व्यक्ती नायलॉन मांजाने पतंग उडवताना आढळल्यास संबंधित व्यक्तीस २५ हजार रुपयांचा दंड ठोठावण्यात येईल. तसेच अल्पवयीन मुलगा किंवा मुलगी नायलॉन मांजाचा वापर करून पतंग उडवताना आढळल्यास २५ हजार रुपयांचा दंड संबंधित मुलाच्या किंवा मुलीच्या पालकांकडून वसूल करण्यात येणार आहे. (फोटो सौजन्य: Pinterest)
कोणत्याही दुकानात, ऑनलाइन प्लॅटफॉर्मवर अथवा व्यक्तीकडे नायलॉन किंवा सिंथेटिक मांजाचा साठा आढळल्यास किंवा त्याची विक्री होत असल्याचे निदर्शनास आल्यास संबंधित विक्रेत्यावर २ लाख ५० हजार रुपयांचा दंड आकारण्यात येईल. हा दंड प्रत्येक गुन्ह्यासाठी स्वतंत्रपणे लागू राहणार आहे. दंडाची रक्कम घटनास्थळी जमा न केल्यास संबंधित व्यक्तीला १५ दिवसांच्या आत दंड भरणे बंधनकारक राहिल, निर्धारित मुदतीत दंडाची रक्कम जमा न केल्यास संबंधित महसूल अधिकाऱ्यांमार्फत कायदेशीर प्रक्रिया राबवून जमीन महसुलाप्रमाणे दंडाची वसुली करण्यात येणार आहे.
जिल्ह्यात नायलॉन मांजाची विक्री, साठवणूक किंवा ऑनलाईन माध्यमातून अवैध व्यवहार होत असल्याचे निदर्शनास आल्यास नागरिकांनी तात्काळ पोलीस विभागाच्या सायबर सेल अथवा संबंधित क्रमांकावर तक्रार नोंदवावी. तक्रारदाराचे नाव गोपनीय ठेवण्यात येणार आहे. सदर सार्वजनिक सूचनेची माहिती नसल्याचे कारण पुढे करून दंडात्मक कारवाईबाबत कोणालाही आक्षेप घेता येणार नाही, असेही स्पष्ट करण्यात आले आहे.
नागरिकांनी नायलॉन व सिंथेटिक मांजाचा वापर पूर्णपणे टाळावा. पतंग उडविण्यासाठी केवळ सुरक्षित व पारंपरिक सुती (कापसाच्या) मांजाचा वापर करावा, मानवी जीविताचे तसेच पशु-पक्ष्यांचे संरक्षण करण्यासाठी सर्व नागरिकांनी नियमांचे काटेकोर पालन करून पर्यावरणपूरक पद्धतीने सण साजरा करावा.- वसुमना पंत, जिल्हाधिकारी चंद्रपूर
