छत्रपती संभाजीनगरमध्ये उन्हाचा कहर! पारा ४० अंशांच्या पार; भाजीपाला महागला तर पशुधनासमोर चारा-पाण्याचं संकट

छत्रपती संभाजीनगरमध्ये उन्हाचा पारा ४० अंशांच्या पार गेल्याने भाजीपाला महागला आहे. जाधववाडी भाजीमंडईत आवक घटली असून ग्रामीण भागात चारा व पाण्याचे संकट ओढवले आहे.

• छत्रपती संभाजीनगरमध्ये उन्हाचा कहर!
• पारा ४० अंशांच्या पार
• भाजीपाला महागला तर पशुधनासमोर चारा-पाण्याचं संकट

छत्रपती संभाजीनगर: मे महिन्याच्या सुरुवातीलाच सूर्याने आग ओकायला सुरुवात केली असून छत्रपती संभाजीनगर जिल्ह्याचा पारा ४० अंशांच्या पुढे गेला आहे. या तीव्र उष्णतेचा थेट परिणाम सर्वसामान्यांच्या खिशावर आणि ग्रामीण भागातील पशुधनावर झाला आहे. पाण्याचे स्रोत आटल्याने भाजीपाल्याची आवक घटली असून, बाजारपेठेत दर गगनाला भिडले आहेत.

भाजीमंडईत आवक १०-१२ टक्क्यांनी घटली

तीव्र उन्हामुळे विहिरी आणि कूपनलिकांचे पाणी कमी झाल्याने भाजीपाल्याची पिके जळून खाक होत आहेत. परिणामी, शहरातील जाधववाडी कृषी उत्पन्न बाजार समितीत होणारी भाजीपाल्याची आवक १० ते १२ टक्क्यांनी घटली आहे. आवक कमी झाल्यामुळे गेल्या आठवड्याच्या तुलनेत भाजीपाल्याचे दर प्रतिकिलो १० ते २० रुपयांनी वाढले आहेत. यामुळे गृहिणींचे बजेट कोलमडले असून सर्वसामान्यांच्या ताटातून भाजी आणि लिंबू गायब झाले आहे.

बाजारातील सध्याचे भाजीपाल्याचे दर (प्रतिकिलो):

• भेंडी: १०० ते ११० रुपये
• लसूण व लिंबू: २०० रुपये
• हिरवी मिरची: १२० ते १४० रुपये
• अद्रक: १०० रुपये
• वांगी: ५० ते ६० रुपये
• टोमॅटो व फ्लॉवर: ४५ ते ५० रुपये
• कोथिंबीर/मेथी: २० ते ३० रुपये (एक जुडी)

Census 2026 Maharashtra: शिक्षक आणि कर्मचाऱ्यांनो सावधान! जनगणनेच्या कामात हलगर्जीपणा केल्यास थेट गुन्हे दाखल होणार

पशुधनावर संकट: चारा आणि पाणी टंचाई गंभीर

ग्रामीण भागात उन्हाच्या तीव्रतेमुळे हिरवा चारा नष्ट झाला आहे. वाळलेला चारा आणि मका कुट्टीचे दर प्रचंड वाढले असून, जालना जिल्ह्यासारख्या शेजारील भागातून चारा आणावा लागत आहे. ट्रॅक्टरने कडबा कुट्टी आणण्यासाठी शेतकऱ्यांना सुमारे साडेपाच हजार रुपये मोजावे लागत आहेत. पाणी आणि चाऱ्याच्या टंचाईमुळे दुभत्या जनावरांच्या दूध उत्पादनातही घट झाली आहे.

पशुसंवर्धन विभागाचे आवाहन

उन्हाची वाढती तीव्रता लक्षात घेता, जिल्हा उपआयुक्त डॉ. नानासाहेब कदम यांनी पशुपालकांना महत्त्वाच्या सूचना दिल्या आहेत:

• जनावरांना दुपारच्या वेळी उन्हात बाहेर न सोडता थंड ठिकाणी बांधावे.
• जनावरांना पिण्यासाठी स्वच्छ आणि मुबलक पाणी द्यावे.
• ज्या शेतकऱ्यांकडे सिंचनाची सोय आहे, त्यांनी वैरणीसाठी नवीन बियाण्याची लागवड करावी.

विक्रेत्यांची व्यथा

वाढत्या महागाईमुळे किरकोळ बाजारात भाजीपाला विकणे कठीण झाले आहे. “उन्हामुळे भाजीपाल्याचे भाव वाढले आहेत, पण ग्राहकांकडून दोन-पाच रुपये नफा कमावणेही आता अवघड झाले आहे,” अशी प्रतिक्रिया भाजी विक्रेते संताजी सातपुते यांनी दिली आहे.

छत्रपती संभाजीनगरकरांची तहान भागणार! नव्या योजनेतून जॅकवेलचे पंपिंग सुरू; १२ जूनपर्यंत शहराला मिळणार अतिरिक्त पाणी