छ. संभाजीनगर मनपाचा सावळा गोंधळ! मालमत्ता कर सवलतीसाठी झुंबड (Photo Credit- Ai)
महापालिकेकडून दरवर्षी एप्रिल ते जून या कालावधीत मालमत्ता कर भरणाऱ्यांना १० ते ५ टक्क्यांपर्यंत सवलत दिली जाते. यंदाही ही सवलत कायम ठेवण्यात आल्याने अनेक मालमत्ताधारकांनी १ एप्रिलपासूनच कर भरण्यास सुरुवात करण्याचा प्रयत्न केला.
परंतु ऑनलाइन अॅप आणि वेबसाईटवर लॉगिन करताच तांत्रिक अडथळे येऊ लागले. अनेकांनी वारंवार प्रयत्न करूनही साइट उघडत नसल्याने कर भरणा शक्य झाला नाही. परिणामी, सवलतीचा लाभमिळविण्यासाठी केलेली घाई नागरिकांसाठी त्रासदायक ठरली.
ऑनलाइन सेवा बंद असल्याचे लक्षात आल्यानंतर काही नागरिकांनी बँक किंवा इतर माध्यमांतून कर भरण्याचा पर्याय निवडण्याचा प्रयत्न केला. मात्र त्यातही आवश्यक प्रक्रिया पूर्ण होत नसल्याने अडचणी निर्माण झाल्या. यामुळे करदात्यांनी महापालिकेच्या नियोजनावर प्रश्नचिन्ह उपस्थित करत संताप व्यक्त केला. सवलतीची घोषणा केली, पण त्यासाठी आवश्यक सुविधा मात्र उपलब्ध नाहीत, हा सर्वसामान्य नागरिकांना आस देण्याचा मनाचा डाव आहे, अशी प्रतिक्रिया नागरिकांतून उमटली.
महापालिकेच्या अधिका-यांच्या माहितीनुसार, ३१ मार्चला आर्थिक वर्ष संपल्यानंतर नवीन आर्थिक वर्षासाठी कराची मागणी (डिमांड) अद्ययावत करणे, तसेच तांत्रिक दुरुस्त्या करणे आवश्यक असते. या प्रक्रियेमुळेच वेबसाईट तात्पुरती बंद ठेवण्यात आली आहे. त्यातच ३ एप्रिल रोजी गुड फ्रायडेची सुटी आणि त्यानंतर शनिवार-रविवारची सुटी असल्याने ऑनलाइन सेवा थेट ६ एप्रिलपासून सुरू होणार असल्याचे प्रशासनाने स्पष्ट केले आहे.
पहिल्याच दिवशी कर भरण्याची घाई नागरिकांना महागात पडली असली, तरी सवलतीचा कालावधी अजून शिल्लक आहे. एप्रिल, मे आणि जून या तीन महिन्यांत टप्याटप्याने सवलत मिळणार असल्याने करदात्यांनी घाई न करता प्रणाली सुरळीत झाल्यानंतर भरणा करावा, असे आवाहन प्रशासनाकडून करण्यात येत आहे.
.png "Videos"){kind=small}
