आरोग्य विभागाचा जीवघेणा निष्काळजीपणा! डिझेलअभावी शेंदूरवादा येथील रुग्णवाहिका दोन महिन्यांपासून ‘व्हेंटिलेटर’वर

शेंदूरवादा (ता. गंगापूर) येथील प्राथमिक आरोग्य केंद्राची रुग्णवाहिका गेल्या २ महिन्यांपासून डिझेलअभावी बंद आहे. प्रशासकीय दिरंगाईमुळे रुग्णांचे हाल होत असून, तात्काळ सेवा सुरू न झाल्यास आंदोलनाचा इशारा देण्यात आला आहे.

 

• रुग्णवाहिकाच ‘सलाईन ‘वर !
• आरोग्य यंत्रणा कोलमडली
• डिझेलच्या फायलीत अडकली रुग्णवाहिका सेवा

Shendurwada Ambulance Service Closed Marathi News: शेंदूरवादा प्राथमिक आरोग्य केंद्रातील शासकीय रुग्णवाहिका गेल्या दोन महिन्यांपासून डिझेलअभावी पूर्णतः बंद असल्याचा प्रकार समोर आला आहे. आरोग्य यंत्रणेच्या बेफिकीर व बेजबाबदार कारभारामुळे ग्रामीण भागातील नागरिकांच्या जीविताशी थेट खेळ सुरू असल्याचा आरोप नागरिकांकडून होत आहे. शेंदूरवादा परिसरातील ग्रामीण, गोरगरीब व गरजू रुग्णांसाठी अत्यावश्यक असलेली रुग्णवाहिका डिझेल नसल्याने रस्त्यावर उतरू शकत नसल्याचे वास्तव स्पष्ट झाले आहे. संबंधित अधिकाऱ्यांकडे विचारणा केली असता, रुग्णवाहिकेसाठी आवश्यक डिझेल उपलब्ध नसल्यामुळे सेवा देणे अशक्य असल्याचे सांगण्यात आले.

आजारी रुग्णांचे मोठे हाल

डिझेलसाठी आवश्यक निधी वेळेवर उपलब्ध न केल्याने वाहन निष्क्रय पडून असल्याची धक्कादायक बाब समोर आली आहे. या निष्काळजीपणाचा सर्वाधिक फटका शेंदूरवादा व परिसरातील ग्रामीण नागरिकांना बसत आहे. आपत्कालीन परिस्थितीत रुग्णांना वेळेत रुग्णालयात हलवता न आल्यामुळे प्रसूती रुग्ण, अपघातग्रस्त, वृद्ध व गंभीर आजारी रुग्णांचे मोठे हाल होत आहेत.

विभागाच्या कार्यपद्धतीवर गंभीर प्रश्नचिन्ह

रुग्णांना खासगी वाहनांचा आधार घ्यावा लागत असून, आर्थिक अडचणींमुळे अनेक वेळा उपचारांमध्ये विलंब होत आहे. परिणामी रुग्णांच्या जीवावर बेतण्याची शक्यता नाकारता येत नाही. केवळ डिझेलसारख्या अत्यावश्यक बाबीअभावी रुग्णवाहिका सेवा बंद राहणे हे आरोग्य विभागाच्या कार्यपद्धतीवर गंभीर प्रश्नचिन्ह निर्माण करणारे आहे.

हे देखील वाचा: QR Code Govt Document: आता सरकारी कागदपत्रांची पडताळणी होणार हायटेक! प्रशासनाचा ‘क्यू-आर कोड’ उपक्रम; बनावटगिरीला बसणार लगाम

कागदपत्रांचा घोळ की प्रशासकीय दिरंगाई?

शासनाने रुग्णवाहिकांच्या डिझेल 66 सदर्भातील कागदपत्रांची पूर्तता ही अत्यंत किचकट स्वरूपात निश्चित केली आहे. या प्रक्रियेमुळे केवळ प्रशासनच नव्हे, तर डिझेल पंपचालक देखील या कागदपत्रांना वैतागले आहेत, परिणामी रुग्णवाहिकांच्या डिझेलची बिले मंजूर होण्यास विलंब होत आहे. मात्र ही प्रक्रिया अंतिम टप्प्यात असून, लवकरच सर्व प्रलंबित बिले मंजूर करून रुग्णवाहिका सेवा पुन्हा सुरू करण्यात येईल. असे गंगापूरचे तालुका आरोग्य अधिकारीस रंगनाथ तुपे यांनी म्हटेले आहे.

नागरिकांना तीव्र आंदोलनाचा इशारा

डिझेलसारख्या साध्या कारणामुळे रुग्णवाहिका बंद असणे हे अत्यंत दुर्दैवी आहे. ग्रामीण भागात आपत्कालीन रुग्णांसाठी ही रुग्णवाहिका जीवनदायी ठरते. प्रशासनाने तात्काळ डिझेलची व्यवस्था करून रुग्णवाहिका सुरू करावी, अन्यथा नागरिकांना तीव्र आंदोलनाचा मार्ग स्वीकारावा लागेल, असा इशारा शेतकरी कृती समितीचे राहुल ढोले यांनी दिला आहे.

हे देखील वाचा: Nylon Manja Action Sambhajinagar: संभाजीनगर हादरलं! २ लाखाहून अधिक किमतीचा नायलॉन मांजा जप्त; गुन्हे शाखेची शहरात मोठी छापेमारी