Nylon Manja Action Sambhajinagar: संभाजीनगर हादरलं! २ लाखाहून अधिक किमतीचा नायलॉन मांजा जप्त; गुन्हे शाखेची शहरात मोठी छापेमारी

Chhatrapati Sambhajinagar Crime: छत्रपती संभाजीनगरमध्ये गुन्हे शाखेने २ लाख १६ हजार रुपयांचा नायलॉन मांजा जप्त केला आहे. संक्रांतीपर्यंत ही मोहीम कडक राबवली जाणार आहे.

 

• संक्रांतीपूर्वीच पोलिसांचा धडाका!
• लाखो रुपयांचा नायलॉन मांजा जप्त
• विक्रेत्यांचे धाबे दणाणले

छत्रपती संभाजीनगर: मकर संक्रांतीच्या पार्श्वभूमीवर संभाजीनगर शहरात नायलॉन मांजाची विक्री करणाऱ्यांविरुद्ध पोलिसांनी धडक मोहीम उघडली आहे. गुन्हे शाखेने शहरात तीन वेगवेगळ्या ठिकाणी धाडी टाकून तब्बल २ लाख १६ हजार ७५० रुपयांचा साठा जप्त केला आहे. यामध्ये एकूण २८९ घातक नायलॉन चक्री हस्तगत करण्यात आल्या असून, पोलिसांनी तिघांना बेड्या ठोकल्या आहेत.

पोलिसांची ‘धडक’ कारवाई

सातारा परिसर आणि पुंडलिकनगर गुन्हे शाखेचे पोलीस निरीक्षक अर्जुन कदम यांच्या पथकाला मिळालेल्या माहितीनुसार, पुंडलिकनगर येथील संकेत दीपक कानडे (२६) याला ताब्यात घेण्यात आले. त्याच्याकडे केलेल्या चौकशीनंतर सातारा परिसरातील गोदामातून १४४ चक्री जप्त करण्यात आल्या. याच परिसरातून गोविंद साळुंके याला ताब्यात घेऊन त्याच्याकडून ९७ चक्री जप्त केल्या. पोलिसांच्या भीतीने नायलॉन मांजा नष्ट करण्यासाठी गेलेल्या तुषार काथार याला पोलिसांनी राजीव गांधी स्टेडियम परिसरातून ताब्यात घेतले आणि त्याच्याकडून ४८ चक्री जप्त केल्या.

हे देखील वाचा: Chhatrapati Sambhajinagar Crime: गोदावरीत पोत्यात सापडलेले गूढ उकलले; मूकबधीर सासऱ्याची झोपेत हत्या; भाचा-जावईच निघाला मारेकरी

भोईवाड्यात क्रांती चौक पोलिसांची मोठी कारवाई

भोईवाडा परिसरात नायलॉन मांजा विक्री होत असल्याची गुप्त माहिती मिळाल्यानंतर क्रांती चौक पोलिसांनी १९ डिसेंबर रोजी दुपारी छापा टाकला. या कारवाईत केतन श्रीधर मोहिते, ऋषिकेश विठ्ठल पडोळ आणि सुरज जिनकर चरखे या आरोपींविरुद्ध गुन्हा दाखल करण्यात आला आहे. पोलीस हवालदार भावसिंग चव्हाण यांनी या प्रकरणी फिर्याद दिली आहे.

पोलिसांचा कडक इशारा

पोलीस निरीक्षक गजानन कल्याणकर यांनी सांगितले की, संक्रांतीपर्यंत ही मोहीम अशीच सुरू राहणार आहे. शहरातील सर्व पतंग विक्रेत्यांची सखोल चौकशी केली जात असून, नायलॉन मांजा विक्री करणाऱ्यांवर कठोर कायदेशीर कारवाई केली जाईल. ही कारवाई पोलीस आयुक्त प्रवीण पवार, उपायुक्त नवले आणि सपोआ राजपूत यांच्या मार्गदर्शनाखाली पार पडली.

हे देखील वाचा: Chhatrapati Sambhajinagar: घरात एकटी असताना 18 वर्षीय तरुणीची निर्घृण हत्या; एकही साक्षीदार नाही, तरी 4 तासांत आरोपी अटकेत