Uday Samant : ‘गटबाजी सोडा, संघटना मजबूत करा; ही शेवटची संधी!’ उदय सामंतांचा शिवसेना पदाधिकाऱ्यांना घरचा आहेर

Uday Samant : शिवसेना शिंदे गटातील अंतर्गत गटबाजीवरून उद्योगमंत्री उदय सामंत यांनी पदाधिकाऱ्यांचे कान टोचले. “मित्रपक्ष काय करतो यापेक्षा शिवसेनेत काय चाललंय ते पाहा,” असं सांगत त्यांनी धुळ्यातील पदाधिकाऱ्यांना शेवटची संधी असल्याचा इशारा दिला.

• धुळ्यातील शिवसेना गटबाजीवरून उदय सामंत नाराज
• “ही शेवटची संधी”; नवीन टीम उभी करण्याचा थेट इशारा
• “कार्यकर्त्यांना तुमच्या राजकारणात भरडू नका”; पदाधिकाऱ्यांना सुनावलं

Uday Samant : शिवसेना शिंदे गटातील अंतर्गत गटबाजी पुन्हा एकदा चव्हाट्यावर आली असून, यावरून उद्योगमंत्री आणि शिवसेना नेते उदय सामंत यांनी पदाधिकाऱ्यांचे चांगलेच कान टोचले आहेत. मित्रपक्ष काय करतो यापेक्षा आधी आपल्या पक्षात काय सुरू आहे, याकडे लक्ष द्या, असा स्पष्ट संदेश सामंत यांनी दिला. इतकंच नाही तर “ही शेवटची संधी आहे”, असा थेट इशाराही त्यांनी दिला.

धुळ्यात बोलताना उदय सामंत यांनी स्थानिक पदाधिकाऱ्यांना घरचा आहेर दिला. गटबाजी सोडून संघटना मजबूत करा. कार्यकर्त्यांना तुमच्या आपापसातील राजकारणात भरडू नका, असं त्यांनी सुनावलं.

“आपणच दुसऱ्यांना संधी देतोय”

शिवसेनेच्या बालेकिल्ल्यात आज पक्षाचा फक्त एक आमदार आहे आणि आपणच दुसऱ्यांना संधी देत असल्याचं सामंत म्हणाले. नंदुरबारमध्ये दोन हजार पदाधिकारी उपस्थित राहतात, मात्र धुळ्यात ५० कार्यकर्तेही आणता आले नाहीत. “आपण साहेबांना फसवतोय का?” असा सवाल करत पदाधिकाऱ्यांनी आत्मचिंतन करण्याची गरज असल्याचं त्यांनी सांगितलं. महाराष्ट्रात पक्षासंदर्भातील सर्वाधिक तक्रारी धुळ्यातून येत असल्याचंही सामंत यांनी नमूद केलं.

‘महाराष्ट्र आहे का तालिबान? मंत्र्यांचे कुटुंब सुरक्षित नसेल तर सामान्य जनतेचं काय?’ हर्षवर्धन सपकाळांचा फडणवीसांवर हल्लाबोल

“ही शेवटची संधी; नाहीतर नवीन टीम”

“चांगलं काम करा, ही तुम्हाला शेवटची संधी आहे. अन्यथा धुळ्यात नवीन प्रयोग करून नवीन टीम उभी करण्यात येईल,” असा इशारा उदय सामंत यांनी दिला.

डीपीसीमध्ये शिवसेनेचे चार सदस्य आणि विरोधी पक्षनेतेपद शिवसेनेकडे असायला हवं, अशी अपेक्षाही त्यांनी व्यक्त केली. मनोज मोरे आणि सतीश महाले यांनी एकत्र येऊन संघटनेचं काम करण्याचा सल्ला त्यांनी दिला.

Maratha Reservation : जरांगे पाटलांना मुंबईत आंदोलनासाठी परवानगी घ्यावीच लागणार; हायकोर्टाचा मोठा आदेश

“कार्यकर्ते आहेत म्हणून आपण आहोत”

सामंत यांनी पदाधिकाऱ्यांना कार्यकर्त्यांचं महत्त्वही पटवून दिलं. कार्यकर्ते आहेत म्हणून आपण आहोत. साहेबांसोबत कार्यकर्त्यांचे फोटो काढा. संपूर्ण हॉल शिवसैनिकांनी भरला तरच पक्षाची खरी ताकद दिसेल, असं ते म्हणाले.

तसंच, “एकनाथ शिंदेंमुळेच तुमचं अस्तित्व आहे,” असं सांगत कार्यकर्त्यांना अंतर्गत राजकारणात भरडू नका, असा स्पष्ट संदेश त्यांनी दिला. त्यामुळे धुळ्यातील शिवसेना शिंदे गटातील अंतर्गत वादावर आता पक्षश्रेष्ठी काय भूमिका घेतात, याकडे राजकीय वर्तुळाचं लक्ष लागलं आहे.