शुक्रवार, 11 सप्टेंबर 2026
(Photo - X)
Maratha Reservation : मराठा आरक्षणाच्या मुद्द्यावरून पुन्हा एकदा राजकीय आणि सामाजिक वातावरण तापण्याची शक्यता आहे. मनोज जरांगे पाटील यांनी मुंबईत आंदोलन करण्याचा इशारा दिल्यानंतर आता या आंदोलनाबाबत हायकोर्टाने महत्त्वाचे निर्देश दिले आहेत. परवानगीशिवाय मुंबईत आंदोलन करता येणार नाही, असं न्यायालयाने स्पष्ट केलं आहे. त्यामुळे मुंबईकडे कूच करण्याआधी आंदोलनासाठी आवश्यक परवानगी घ्यावी लागणार आहे.
मनोज जरांगे पाटील यांच्या मुंबई आंदोलनामुळे कायदा आणि सुव्यवस्थेचा प्रश्न निर्माण होऊ शकतो, असा दावा करत हायकोर्टात याचिका दाखल करण्यात आली होती. या याचिकेवर झालेल्या सुनावणीदरम्यान न्यायालयाने आंदोलनाबाबत भूमिका स्पष्ट केली. आधी परवानगी घ्या आणि त्यानंतरच मुंबईत येऊन आंदोलन करा, असे निर्देश कोर्टाने दिले आहेत.
दरम्यान, न्यायालयाने मनोज जरांगे पाटील यांच्या तब्येतीबाबतही चिंता व्यक्त केली आहे. त्यांच्या आरोग्याची तपासणी करण्याच्या सूचना देण्यात आल्या असून गरज भासल्यास त्यांना रुग्णालयात दाखल करण्याचे निर्देशही देण्यात आले आहेत. त्यामुळे आता जरांगे पाटील यांच्या प्रकृतीकडेही लक्ष लागलं आहे.
दरम्यान, मनोज जरांगे पाटील यांनी उद्या अंतरवाली सराटी येथे मराठा बांधवांची राज्यव्यापी बैठक बोलावली आहे. या बैठकीत पुढील आंदोलनाची दिशा आणि रणनीती ठरण्याची शक्यता आहे. मुंबईत आंदोलन करण्याच्या भूमिकेवर जरांगे पाटील ठाम असल्याचं सांगितलं जात असल्याने बैठकीत नेमका काय निर्णय होतो, याकडे सर्वांचं लक्ष लागलं आहे.
हायकोर्टाच्या आदेशानंतर आता जरांगे पाटील यांच्या भूमिकेकडे लक्ष लागलं आहे. मुंबईत आंदोलन करायचं असल्यास परवानगीची प्रक्रिया पूर्ण करावी लागणार आहे. त्यामुळे अंतरवाली सराटीतील बैठकीनंतर जरांगे पाटील काय घोषणा करतात, आंदोलनाची तारीख आणि स्वरूप काय असेल, याबाबत उत्सुकता निर्माण झाली आहे.
मराठा आरक्षणाच्या मुद्द्यावर याआधीही जरांगे पाटील यांनी सरकारवर दबाव आणण्यासाठी आंदोलनाचा मार्ग स्वीकारला आहे. आता हायकोर्टाच्या या आदेशानंतर त्यांच्या पुढील भूमिकेला विशेष महत्त्व प्राप्त झालं आहे.
