Satara News: साताऱ्यात डॉ. बाबासाहेब आंबेडकर जयंती उत्साहात; ‘फुले-शाहू-आंबेडकर साहित्य सदना’चे थाटात लोकार्पण

साताऱ्यात डॉ. बाबासाहेब आंबेडकर यांची १३५ वी जयंती उत्साहात साजरी करण्यात आली. याप्रसंगी यशवंत उद्यानात 'फुले-शाहू-आंबेडकर साहित्य सदना'चे लोकार्पण मान्यवरांच्या हस्ते पार पडले.

 

• साताऱ्यात डॉ. बाबासाहेब आंबेडकर जयंती उत्साहात
• ‘फुले-शाहू-आंबेडकर साहित्य सदना’चे थाटात लोकार्पण

सातारा, दि. १४ (प्रतिनिधी): भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त सातारा नगरपरिषदेच्या वतीने यशवंत उद्यान येथे अभिवादनाचा कार्यक्रम मोठ्या उत्साहात पार पडला. यावेळी विविध मान्यवरांच्या उपस्थितीत डॉ. आंबेडकर यांच्या पुतळ्यास पुष्पहार अर्पण करून त्यांना अभिवादन करण्यात आले.

कार्यक्रमास खासदार श्रीमंत छत्रपती उदयनराजे भोसले, नामदार श्रीमंत छत्रपती शिवेंद्रसिंहराजे भोसले, नगराध्यक्ष अमोल मोहिते, उपनगराध्यक्ष अॅड. डी. जी. बनकर, गटनेते अविनाश कदम, पक्षप्रतोद निशांत पाटील, विविध सभापती, नगरसेवक-नगरसेविका तसेच रिपब्लिकन पार्टी ऑफ इंडियाचे अशोक गायकवाड (बापू) व संजय गाडे आदी मान्यवर उपस्थित होते.

याच वेळी यशवंत उद्यान परिसरात उभारण्यात आलेल्या ‘फुले-शाहू-आंबेडकर साहित्य सदना’चेही लोकार्पण करण्यात आले. या उपक्रमामुळे सामाजिक विचारांची जपणूक आणि वाचन संस्कृतीला चालना मिळणार असल्याची भावना व्यक्त करण्यात आली.

ऐतिहासिक सुवर्णक्षण! जेव्हा महामानव डॉ. बाबासाहेब आंबेडकर नाथांच्या पैठणला आले होते; ७५ वर्षांपूर्वीच्या आठवणींना उजाळा

कार्यक्रमात बोलताना नगराध्यक्ष अमोल मोहिते व उपनगराध्यक्ष अॅड. डी. जी. बनकर यांनी डॉ. आंबेडकर यांच्या कार्याचा गौरव करताना सांगितले की, त्यांनी समानता, स्वातंत्र्य आणि बंधुता या मूल्यांवर आधारित समाजरचना घडवून देशाला भक्कम संविधान दिले. त्यांचे विचार आजही समाजासाठी प्रेरणादायी आणि मार्गदर्शक आहेत.

तसेच नव्याने सुरू झालेल्या साहित्य सदनाच्या माध्यमातून युवकांमध्ये वाचनाची आवड वाढेल व सामाजिक जागृतीस चालना मिळेल, असा विश्वासही त्यांनी व्यक्त केला. कार्यक्रमास नागरिकांची मोठ्या संख्येने उपस्थिती लाभली.

DR. Babasaheb Ambedkar : शहरात जाण्यासाठी पैसै चोरणारा भिवा ते अर्थतज्ज्ञ डॉ.बाबासाहेब आंबेडकर; महामानवाच्या संघर्षमय गाथा