Purandar Airport: पुरंदर विमानतळाच्या प्रकल्पाला मिळाली गती; येत्या बुधवारपासून सुरू होणार ‘हे’ काम

पुणे: प्रस्तावित पुरंदर आंतरराष्ट्रीय विमानतळासाठी वनपुरी, कुंभारवळण, उदाचीवाडी, एकतपूर, मुंजवडी, खानवाडी आणि पारगाव या ७ गावांमध्ये जमिनीचे ड्रोन सर्वेक्षण येत्या बुधवारपासून सुरू होईल. तत्पुर्वी ग्रामपंचायतीशी सल्लामसलत केली जात आहे. विमानतळासाठी २,८३२ हेक्टरवर पसरलेल्या, सात गावांची जमीन संपादित करावी लागणार असून पुरंदर विमानतळ प्रकल्पाला वेग येताच, काही भागात निषेध सुरू झाला आहे. या पार्श्वभूमीवर हवाई सर्वेक्षण होणार असल्याने एकूणच त्याची चर्चा पुरंदर तालुक्यात सुरू आहे.

दरम्यान, या सर्वेक्षणाबाबत माहिती देतांना अधिकाऱ्यांनी सांगितले की, प्रकल्पासाठी राखीव असलेल्या जमिनीची आणि जमिनीची सध्याची स्थिती, बांधकामांची स्थिती यांची सर्वेक्षणात नोंद घेतली जाईल. जमिनीचे पीक सर्वेक्षण केले जाईल. सर्वेक्षण करण्यापूर्वी, गावकऱ्यांना विश्वासात घेतले जाईल आणि सर्वेक्षणासाठी अधिकृत सूचना जारी केल्या जातील. योग्य प्रक्रिया पूर्ण झाल्यानंतरच नोटीसेस व नंतर सर्वेक्षण केले जाईल, असेही त्यांनी सांगितले.

जिल्हाधिकारी कार्यालयातील अधिकाऱ्यांनी गुरुवारी एकतपूर आणि मुंजवाडी गावातील रहिवाशांच्या बैठका घेतल्या आणि त्यांना ड्रोन-आधारित जमिनीचे मॅपिंग आणि अधिग्रहण प्रक्रियेबद्दल माहिती दिली. दरम्यान, विभागीय आयुक्त चंद्रकांत फुलकुंडवार यांच्यासह वरिष्ठ महसूल अधिकाऱ्यांची बैठक नुकतीच झाली. बैठकीत अधिकृत सरकारी ठराव जारी करण्याची प्रक्रिया, ड्रोन सर्वेक्षणातील बारकावे, सरकारी जमिनीची माहिती, वनजमिनी आणि इतर तांत्रिक तपशीलांवरही चर्चा झाली.

तसेच या बैठकीत अधिसूचना प्रकाशित करणे, ड्रोन सर्वेक्षण, सर्वेक्षण शुल्क, सरकारी जमिनीचे वाटप, वाटाघाटी आणि निर्णयाद्वारे दर निश्चित करणे, सक्तीचे भूसंपादन आणि वाटाघाटी अयशस्वी झाल्यास निर्णय देणे, सरकारी क्षेत्रे आणि वनक्षेत्रे महामंडळाकडे हस्तांतरित करणे, महाराष्ट्र औद्योगिक विकास महामंडळाकडून ७ गावांमध्ये संयुक्त मोजणी पूर्ण करणे यावरही चर्चा झाली.

पुरंदर विमानतळाबाबत समोर आली मोठी बातमी

गेल्या काही वर्षांपासून सुरू असलेला पुरंदर विमानतळाचा प्रश्न प्रलंबित असून, तो अखेर संपुष्टात आला आहे. महाराष्ट्र औद्योगिक विकास अधिनियमानुसार अधिसूचना जारी करण्यात आली. त्यानुसार विमानतळासाठी ठरल्याप्रमाणे सात गावांमधील सुमारे २ हजार ८३२ हेक्टर जागा संपादित करण्यात येणार आहे. या गावांना औद्योगिक दर्जा देण्यात आला आहे. गावांमधील चतुःसीमाही निश्चित केल्या असून, जमिनीची मोजणी करून भूसंपादनाची प्रक्रिया लवकरच सुरू होणार आहे.

Purandar Airport: पुरंदर विमानतळाबाबत समोर आली मोठी बातमी: MIDC ने जाहीर केला ‘हा’ निर्णय
विमानतळासाठी पुरंदर तालुक्यातील वनपुरी, पारगाव मेमाणे, कुंभारवळण, एखतपूर, उदाची वाडी, मुंजवडी, खानवडी या सात गावांमधील एकूण २ हजार ८३२ हेक्टर जमिनीचे संपादन करण्यासाठी अधिसूचना जारी करणे गरजेचे होते. त्यानुसार उद्योग विभागाने महाराष्ट्र औद्योगिक विकास अधिनियमानुसार हे क्षेत्र निश्चित केले आहे. या गावांना आता औद्योगिक क्षेत्राचा दर्जा देण्यात आला असून, रस्ते, पाणंद, ओढा या जागाही संपादित केल्या जाणार आहेत.