परभणी : महाराष्ट्र राज्य माध्यमिक व उच्च माध्यमिक बोर्ड (Maharashtra Board Exam) बारावीची परीक्षा सुरु झाली आहे. कॉपीमुक्त परीक्षा हे धोरण परीक्षा विभागाकडून राबविले जात आहे. असे असताना आता बारावी बोर्ड परीक्षेचा गणित या विषयाचा पेपर फुटला (HSC Maths Paper Leaked) आहे. आज होणाऱ्या परीक्षेपूर्वी पेपर फुटल्याची बातमी समोर आली आहे. हा गणित विषयाचा पेपर सोशल मीडियावर व्हायरल झाला आहे. या घटनेने विद्यार्थ्यांमध्ये एकच चर्चा सुरु आहे.
बारावी बोर्ड परीक्षेच्या हिंदी विषयाच्या पेपरमध्ये चुका झाल्याचे आढळून आले होते. तसेच इंग्रजीचा पेपर फोडून विद्यार्थ्यांना कॉपी पुरवणाऱ्या परभणीतील सहा शिक्षकांवर गुन्हा दाखल करण्यात आला. असे असतानाच आता बारावीचा पेपर फुटल्याने पुन्हा एकदा परीक्षेवर प्रश्नचिन्ह निर्माण झाले आहे. बुलढाण्याच्या सिंदखेडराजा येथे सकाळी साडे दहा वाजल्यापासून गणिताचा पेपर सोशल मीडियावर व्हायरल झाला. परीक्षेपूर्वी पेपरचा फोटो व्हायरल झाल्याने खळबळ उडाली आहे. दरम्यान, हा गणिताचा पेपर कोणी फोडला ? पेपर व्हायरल करण्यामागे कोण? यामागे काही सक्रिय रॅकेट आहे का? त्यादृष्टीने तपासणी केली जात आहे. मात्र, नुकत्याच झालेल्या इंग्रजीच्या पेपरनंतर आता गणिताच्या पेपरमध्ये नवा गोंधळ उडण्याची चिन्हे आहेत. पेपरफुटीला अद्याप बोर्डाच्या सूत्रांकडून दुजोरा मिळालेला नाही.
दरम्यान, बारावीच्या परीक्षेसाठी राज्यभर कॉपीमुक्त अभियान राबविण्यात येत असताना, शिक्षकच या मोहिमेला अपयशी ठरत असल्याचे समोर आले आहे. मराठवाड्यातील परभणीत बारावीचा इंग्रजीचा पेपर फुटल्याचे समोर आले आहे.
इंग्रजीच्या प्रश्नपत्रिकेत चुका
इंग्रजीच्या प्रश्नपत्रिकेत चूक झाल्यानंतर हिंदी विषयाच्या प्रश्नपत्रिकेत चुका झाल्याचे समोर आले. हिंदी विषयाच्या पेपरमध्ये दोन प्रश्नांमध्ये उपप्रश्न क्रमांक चुकीचा देण्यात आला होता. या गोंधळातच गणिताचा पेपर फुटल्याने प्रामाणिक उमेदवारांवर अन्याय का? असा प्रश्न उपस्थित होत आहे.
