मोठी बातमी! आमदार शरद सोनवणे शिवसेनेत प्रवेश करणार; DCM शिंदेंच्या उपस्थितीमध्ये होणार पक्षप्रवेश

नारायणगाव: किल्ले शिवजन्मभूमी जुन्नर तालुक्याचे अपक्ष आमदार शरद सोनवणे, नारायणगावचे माजी लोकनियुक्त सरपंच व विद्यमान उपसरपंच योगेश उर्फ बाबू पाटे  कार्यकर्त्यांसह तसेच शिरूर लोकसभा मतदारसंघातील जबाबदार पदाधिकारी असे सुमारे ४०० कार्यकर्ते शिवसेनेचे नेते व विद्यमान उपमुख्यमंत्री एकनाथ शिंदे यांच्या शिवसेनेत पक्षप्रवेश करणार आहे. अशी माहिती जुन्नर चे अपक्ष आमदार शरद सोनवणे, उपसरपंच योगेश उर्फ बाबूभाऊ पाटे यांनी नारायणगाव येथे घेतलेल्या पत्रकार परिषदेत दिली.

यावेळी माजी सरपंच सचिन वाळुंज, प्रदीप देवकर, माजी उपसरपंच संतोष वाजगे, विकास तोडकरी, अजित वाजगे, आरिफ आतार, ॲड. राजेंद्र कोल्हे, गणेश पाटे, नंदू अडसरे, अक्षय वाव्हळ, संतोष दांगट आदी कार्यकर्ते उपस्थित होते.

शिवसेनेचे नेते व राज्याचे उपमुख्यमंत्री एकनाथ शिंदे शुक्रवारी (दि.२८) शिवजन्मभूमी जुन्नर तालुक्याच्या दौऱ्यावर येत असून दुपारी चार वाजता त्यांचे जुन्नर येथे आगमन होणार आहे. त्यानंतर गोद्रे (ता.जुन्नर) येथे छत्रपती शिवाजी महाराजांचा जगातील सर्वात उंच पुतळा उभारण्याचे काम चालू आहे. त्या ठिकाणी शिंदे भेट देणार असून इंजिनीयर, डिझायनर व ठेकेदार यांच्याकडून पुतळ्यासंबंधी माहिती घेणार आहे.

Pratap Sarnaik : महिला प्रवाशांच्या सुरक्षिततेत हयगय करणाऱ्या अधिकाऱ्यांचे निलंबित करा, प्रताप सरनाईक यांचे निर्देश

सायंकाळी ६ वाजता नारायणगाव येथील पूर्व वेशी जवळ आयोजित केलेल्या महामेळाव्यात शिवसेना नेते एकनाथ शिंदे मार्गदर्शन करणार असून त्यांच्या उपस्थितीत जुन्नर चे विद्यमान अपक्ष आमदार शरद सोनवणे, उपसरपंच बाबूभाऊ पाटे, अन्य पक्षातील पदाधिकारी, शेकडो कार्यकर्ते शिवसेना पक्षात प्रवेश करणार आहेत.

सर्वसामान्यांच्या भावना विचारात घेऊन तसेच भविष्यातील राजकारण पाहता पुणे जिल्हा एक विचाराने शिवसेनेच्या दिशेने दमदार पाऊल टाकणार आहे. पुढील काळात जिल्हा परिषद, नगरपंचायत, पंचायत समिती च्या निवडणुका लढविताना योग्य मांडणी करून लढविणार आहोत. जिल्ह्यात शिवसेनेचाच वरचष्मा कसा राहील असा प्रयत्न करणार असल्याचे आमदार सोनवणे यांनी सांगितले. आमच्यासाठी धनुष्यबाण महत्त्वाचा आहे. स्थानिक स्वराज्य संस्थेची निवडणूक युती म्हणून लढविली जाईल असे वाटत नाही. तर राष्ट्रवादी विरुद्ध शिवसेना अशी निवडणूक होईल असे सांगून कार्यकर्त्यांना संधी मिळेल आणि संघटना वाढीस लागेल असा विश्वास व्यक्त केला.

दरम्यान उद्वव ठाकरेंकडून कार्यकर्त्यांची दखल घेतली जात नसल्याची खंत उपसरपंच बाबुभाऊ पाटे यांनी बोलून दाखविली. कार्यकर्त्यांसह मशाल घेऊन मातोश्रीवर गेलो असता दोन तास गेटवर थांबून ठेवण्यात आले. मागील काळात आदित्य ठाकरे छत्रपती शिवाजी महाराजांचा पुतळा उभारलेल्या पूर्ववेशीला भेट देण्यासाठी येणार म्हणून ढोल ताशा, झांज पथक व कार्यकर्ते उपस्थित होते. परंतु आदित्य ठाकरे यांनी आमच्या भावनांचा विचार न करता नारायणगाव बाह्यवळण रस्त्याने परस्पर निघून गेले. नंतर ज्यावेळी आले तेव्हा आदित्य ठाकरे यांना पूर्ववेशीवर येण्याची विनंती केली परंतु त्यांनी नकार दिला. उद्धव ठाकरे व त्यांच्या पक्षाचे नेते पाठीशी उभे राहत नसल्याने भविष्यात नारायणगावच्या विकासासाठी शिवसेना नेते व राज्याचे उपमुख्यमंत्री एकनाथ शिंदे यांच्याबरोबर जाण्याचा निर्णय माझ्यासह कार्यकर्त्यांनी घेतला आहे.