गुरुवार, 13 ऑगस्ट 2026
फोटो सौजन्य- सोशल मीडिया
Granthapal Din: आजच्या काळात ग्रंथाचे व ग्रंथालयाचे महत्व कालातीत आहे. व्यक्तिने जर ग्रंथ वाचनाचे ठरवले तर त्याचे महत्व हे आपोआप कळते. ग्रंथ वाचनातून व्यक्ति विद्वान होतो, असे प्रतिपादन श्रीमती दानकुँवर महिला महाविद्यालयाच्या सेवानिवृत्त प्राध्यापिका व पी.एच.डी. मार्गदर्शक डॉ. अलका नाचेकर यांनी येथे केले.
ग्रंथालयशास्त्राचे जनक पद्मश्री डॉ. एस. आर. रंगनाथन यांची जयंती ग्रंथपाल दिन ग्रंथ संग्रहालय श्रीराम वाचनालयात बुधवारी साजरा करण्यात आली. यावेळी त्या बोलत होत्या. कार्यक्रमाच्या अध्यक्षस्थानी ग्रंथालय भारतीचे केंद्रीय अध्यक्ष डॉ. राजशेखर बालेकर हे होते. तर प्रमुख पाहुणे म्हणून प्रा. डॉ. अलका नाथेकर, ग्रंथ संग्रहालय श्रीराम वाचनालयाचे अध्यक्ष कैलास वियाणी, जालना जिल्हा ग्रंथालय असोसिएशनचे अध्यक्ष देविदास देशपांडे यांची उपस्थिती होती.
मान्यवरांच्या हस्ते डॉ. एस. आर. रंगनाथन यांच्या प्रतिमेस पुष्पहार अर्पण करून अभिवादन करण्यात आले. राजशेखर बालेकर म्हणाले की, आज वाचनाचे स्वरुप जरी बदलले तरी छापील ग्रंथाला मरण नाही. एस. आर. रंगनाथन यांनी अनेक ग्रंथालय कायद्याचा मसुदा तयार केला आहे. ग्रंथ, ग्रंथपाल व वाचक यांचा एकोपा चांगला राहिला तर ग्रंथालय नावाची संस्था चांगली काम करु शकते. सध्या १८ ते १९ राज्यात ग्रंथालय कायदा तयार असून त्यामध्ये ग्रंथालय कर लागू केला आहे. महाराष्ट्रामधील ग्रंथालये ही सार्वजनिक ग्रंथालय असल्यामुळे ती स्वयंसेवी संस्थांनी चालविल्या शासन फक्त सहकार्य करेल असे ग्रंथालय कायद्यात नमूद आहे. ग्रंथालयाच्या प्रश्नाकडे शासनाचे दुर्लक्ष आहे.
ग्रंथपाल दिनानिमित्ताने स्वामी विवेकानंद वाचनालयाचे ग्रंथपाल प्रवीण देशपांडे व जे.ई.एस. महाविद्यालयाच्या इंग्रजी विभाग प्रमुख भाग्यश्री बियाणी-सोमाणी यांनी इंग्रजी साहित्यात पीएच. डी. पदवी संपादन केल्याबद्दल राजशेखर बालेकर यांच्या हस्ते व मान्यवरांच्या उपस्थिती दोघांचा विशेष सत्कार करण्यात आला.
सुत्रसंचालन शाम शैलगांवकर तर आभार प्रदर्शन देविदास जिगे यांनी केले. याप्रसंगी श्रीकात शेलगावकर, सुधाकर वाहेगावकर, जयबी कुलकर्णी, सुशिल सोमाणी, मनोहर कुलकर्णी, सुनिता बियाणी, नंदकुमार सानप, नंदकुमार मुरगे, सखाराम बोरुळ, सुखदेव उघडे, काशिनाथ गायकवाड, मिलिंद सावंत, मुकुंदा खंदारे, कांतराव डांगे, रत्नाकर नंद, शैलेंद्र बनापूरकर, श्रीकांत काळे, प्रणव किनगांवकर यासह वाचक वर्ग मोठ्या संख्येने उपस्थित होता.
