Satara News : मुंबईसारख्या आर्थिक राजधानीत जावली बँकेची भरारी; शिवेंद्रसिंहराजे यांच्याकडून कौतुक

जावली बँक ही आपल्या तालुक्याचे वैभव असून, बँकेचे संचालक मंडळ उत्कृष्ट काम करत असून, तीन नवीन शाखा सुरू करण्यात आल्या आहेत. लवकरच डीएमके जावली बँक शेड्युल बँकेकडे वाटचाल करेल, असा विश्वास मानकुमरे यांनी व्यक्त केला.

मेढा : जावली-महाबळेश्वर यासह मुंबईस्थित कष्टकऱ्यांची अर्थवाहिनी असलेल्या दत्तात्रय महाराज कळंबे डीएमके जावली सहकारी बँकेने मुंबईसारख्या आर्थिक राजधानीत उत्तुंग यशस्वी भरारी घेतली, असे उद्गार सार्वजनिक बांधकाममंत्री शिवेंद्रसिंहराजे भोसले यांनी काढले. नुकत्याच तीन नवीन शाखा सुरू करण्यात आल्या आहेत. यात एकूण २७ शाखा कार्यरत असून, जावली बँकेने १००० कोटींचा व्यवसायाचा टप्पा नुकताच पार केला. बँकेच्या या यशस्वी घोडदौडसाठी प्रयत्न करणारे बँकेचे चेअरमन विक्रम भिलारे व व्हाईस चेअरमन चंद्रकांत दळवी आणि संचालकांचा जावली तालुक्याच्या वतीने गौरव करण्यात आला.

कावडी येथील कार्यक्रमात मंत्री शिवेंद्रसिंहराजे, जिल्हा परिषद अध्यक्ष डॉ. प्रिया शिंदे, उपाध्यक्ष राजू भैय्या भोसले, जिल्हा परिषद सदस्य वसंतराव मानकुमरे आदींच्या उपस्थित जावली बँकेच्या संचालक मंडळाचा सन्मान करण्यात आला. यावेळी पंचायत समिती सभापती सौरभ शिंदे, उपसभापती गोरख महाडिक, जिल्हा बँक संचालक ज्ञानदेव रांजणे, बाजार समिती सभापती जयदीप शिंदे, अभिनेत्री संजना काळे, अभिनेता संदीप पाठक, भाजपा तालुकाध्यक्ष संदीप परामणे, सागर धनावडे, समीर आतार, हणमंतराव पार्टे, रवी परामणे आदी मान्यवर उपस्थित होते.

यावेळी बोलताना वसंतराव मानकुमरे म्हणाले, जावली बँक ही आपल्या तालुक्याचे वैभव असून, बँकेचे संचालक मंडळ उत्कृष्ट काम करत असून, तीन नवीन शाखा सुरू करण्यात आल्या आहेत. लवकरच डीएमके जावली बँक शेड्युल बँकेकडे वाटचाल करेल, असा विश्वास मानकुमरे यांनी व्यक्त केला.

बँकेचे चेअरमन विक्रम भिलारे म्हणाले, बँकेचे सभासद खातेदार ठेवीदार यांच्या सहकार्याने माझं संचालक मंडळ आटोकाठ प्रयत्न करत आहे. अडचणीच्या काळातून आणि कठीण परिस्थितीतून जावली बँक बाहेर पडली असून, आता बँकेची आर्थिक स्थिती मजबूत आहे. जावली बँकेला बृहन्मुंबई नागरी सहकारी बँकेचे उत्कृष्ट नागरी बँक म्हणून द्वितीय क्रमांकाचे पारितोषिक यावर्षी मिळाले आहे. गतवर्षी सुद्धा बँकेने प्रथम पारितोषिक मिळवले होते.

मंत्री भोसलेंकडून विक्रम भिलारे यांचे कौतुक

जावली बँकेचे चेअरमन विक्रम भिलारे हे सर्वांना सोबत घेऊन बँकेचे उत्कृष्ट कामकाज करत आहेत. त्यामुळेच आर्थिक राजधानीत डीएमके बँकेचे नाव उज्ज्वल होत आहे, असे विशेष कौतुक मंत्री भोसले यांनी केले.

हेदेखील वाचा : Marathi Sahitya Sammelan : अवघी सातारानगरी साहित्यमय! ९९ व्या अखिल भारतीय मराठी साहित्य संमेलनाची भव्य ग्रंथदिंडी