bjp yuva gopichand padalkar
जेजुरी : भारतीय जनता पक्षाची ताकद ही घराणेशाहीत नसून सामान्य कार्यकर्त्याच्या कर्तृत्वाला संधी देणाऱ्या संघटनात्मक विचारधारेत आहे. गावागाड्यातील, उपेक्षित व वंचित घटकांतील होतकरू तरुणांना संघटनेत व्यासपीठ देऊन त्यांना पुढे आणण्याची जबाबदारी युवा मोर्चाच्या कार्यकर्त्यांनी स्वीकारावी. शासनाच्या विविध योजनांचा अभ्यास करून त्याचा लाभ तळागाळातील नागरिकांपर्यंत पोहोचवण्यासाठी सक्रियपणे काम करा, असे आवाहन आमदार गोपीचंद पडळकर यांनी केले.
भारतीय जनता युवा मोर्चा, पुणे ग्रामीणच्या वतीने जेजुरी येथे आयोजित ‘युवा निर्धार मेळाव्या’त ते बोलत होते. या मेळाव्यास हजारो युवा कार्यकर्त्यांची उपस्थिती होती. युवा प्रश्न, रोजगार, शिक्षण, कौशल्य विकास, शासकीय योजना आणि संघटनात्मक विस्तार या विषयांवर यावेळी मार्गदर्शन करण्यात आले.
पडळकर म्हणाले, “भारतीय जनता पार्टी ही घराणेशाहीवर नव्हे, तर कार्यकर्त्यांच्या कर्तृत्वावर विश्वास ठेवणारी संघटना आहे. सामान्य कुटुंबातील कार्यकर्त्याला पक्षातील महत्त्वाच्या जबाबदाऱ्यांपासून देशाच्या नेतृत्वापर्यंत पोहोचण्याची संधी भाजपमध्ये मिळते.” बिहारमधील सामान्य कार्यकर्ता पक्षाच्या राष्ट्रीय अध्यक्षपदापर्यंत पोहोचतो, तर पडळकरवाडीसारख्या छोट्या गावातील सामान्य कुटुंबातील तरुण विधिमंडळात पोहोचतो, हे कार्यकर्त्यांच्या कर्तृत्वाला संधी देणाऱ्या भाजपच्या विचाराचे उदाहरण असल्याचे त्यांनी सांगितले.
“युवा मोर्चाच्या कार्यकर्त्यांची जबाबदारी मोठी आहे. गावागाड्यातील तरुणांशी संपर्क वाढवा, त्यांच्या अडचणी समजून घ्या आणि शासनाच्या योजनांचा लाभ त्यांच्यापर्यंत पोहोचवा. संघटनेत नव्या आणि होतकरू तरुणांना संधी देत त्यांना नेतृत्वासाठी तयार करा,” असे पडळकर यांनी सांगितले.
भाजप युवा मोर्चाचे जिल्हाध्यक्ष वैभव. सोलनकर सोलनकर यांनी आमदार रोहित पवार यांच्यावर टीका केली. “तरुणांच्या प्रश्नांना योग्य दिशा देण्याऐवजी तरुणांची माथी भडकवण्याचे काम केले जात आहे. युवकांना भडकावण्यापेक्षा त्यांच्या हाताला रोजगार, शिक्षण आणि कौशल्याची ताकद देण्याची गरज आहे,” असा आरोप सोलणकर यांनी केला.
भाजप पुणे ग्रामीणचे जिल्हाध्यक्ष शेखर वढणे यांनी भाजपच्या संघर्षातून उभ्या राहिलेल्या पक्षाच्या प्रवासाचा आढावा घेत कार्यकर्त्यांनी पक्षाची विचारधारा आणि संघटन तळागाळापर्यंत पोहोचविण्याचे आवाहन केले.
भाजप युवा मोर्चाचे प्रदेशाध्यक्ष कृष्णराज महाडीक यांनी युवकांच्या रोजगाराच्या प्रश्नावर भर दिला. यावेळी युवाशक्तीच्या माध्यमातून संघटन विस्तार, युवकांच्या प्रश्नांवर काम आणि गावपातळीवर संघटन अधिक मजबूत करण्याचा निर्धार करण्यात आला.
या प्रसंगी भाजप युवा मोर्चाचे प्रदेशाध्यक्ष कृष्णराज महाडीक, भाजप पुणे ग्रामीणचे प्रभारी सदाशिव खाडे, आमदार गोपीचंद पडळकर, पुरंदरचे माजी आमदार संजय जगताप, भाजप पुणे जिल्हा दक्षिण ग्रामीणचे जिल्हाध्यक्ष शेखर वढणे, भाजप युवा मोर्चा पुणे जिल्हा ग्रामीणचे जिल्हाध्यक्ष वैभव सोलणकर, भाजप सरचिटणीस बाळासाहेब गरुड, वैशाली सणस, अविनाश मोठे, पांडुरंग कचरे, भाजप नेते खलिल काजी, गोविंद देवकाते, युवा मोर्चा महामंत्री स्वप्नील मोडक, अमर बुदगुडे, विवेक साळुंके, ओंकार कड्डे, मयूर शिंदे, अनिकेत भालेराव, युवती अध्यक्ष रसिका सणस, संदीप केसकर, शुभम रणवरे यांच्यासह भाजप व युवा मोर्चाचे विविध पदाधिकारी, मंडल पदाधिकारी आणि हजारो युवा कार्यकर्ते उपस्थित होते.
.png "Videos"){kind=small}
