पाचगणी राज्य मार्गावरील करहर पूल वाहतुकीस खुला
मेढा : राज्याचे सार्वजनिक बांधकाममंत्री शिवेंद्रसिंहराजे भोसले यांच्या विशेष प्रयत्नातून जावळी तालुक्यातील पाचवड-पाचगणी राज्य मार्गावरील करहर नजीक असलेला पुलासाठी जवळपास ९९ लाखांचा निधी मंजूर करण्यात आला होता. त्यानुसार, या पुलाचे काम बांधकाम विभागाकडून पूर्ण करण्यात आले आहे. हा पूल वाहतुकीस खुला करण्यात आला आहे. पुलाची उंची व रुंदी वाढल्याने वाहतूक सुरळीत होण्यास आता मदत होणार आहे.
पाचवड-पाचगणी राज्य मार्गावर वाहतुकीची वर्दळ वाढलेली पाहायला मिळते. पाचगणी, महाबळेश्वर पर्यटनस्थळांकडे जाणारा हा मुख्य मार्ग असून या मार्गावरून दिवसेंदिवस वाहतूक वाढत चालली आहे. करहर नजीक मोठ्या ओढ्यावर असलेला पूल हा अरुंद व उंचीने कमी असल्याने पावसाळ्यात हा पूल पाण्याखाली जात होता. त्यामुळे या पुलाची उंची वाढवली जावी, अशी मागणी या विभागातील लोकप्रतिनिधी नागरिकांकडून होत होती. त्यानुसार बांधकाम मंत्री शिवेंद्रसिंहराजे भोसले यांनी या पुलासाठी निधी मंजूर केला होता.
पावसाळ्यात पूल वाहतूक आता सुरळीत
हातगेघर धरणातून पाण्याचा विसर्ग वाढल्यानंतर या ओढ्याला महापूर येत असल्याने हा पूल पावसाळ्यात पाण्याखाली जात होता. वाहतुकीचा खोळंबा होत होता. हा पूल अरुंद असल्याने व दोन्ही बाजूंनी उतार असल्याने वाहतुकीस अडथळादेखील निर्माण होत होता. मात्र, नव्याने बांधण्यात आलेल्या पुलाची उंची १२ मीटरने वाढली असून रुंदी अडीच मीटरने वाढली असल्याने पावसाळ्यात हा पूल वाहतूक आता सुरळीत राहील.
असा आहे करहर नवीन पूल
पुलाचा निधी जवळपास ९९ लाख रुपये, पुलाची रुंदी उंचीअस्तित्वातील करहर पुलाच्या उंचीपेक्षा अडीच मीटरने उंची वाढविण्यात आलेली आहे. तसेच भविष्यातील वाहतुकीचा विचार करता सदर पुलाची रुंदी बारा मीटर करण्यात आली असून, सदर पुलाची लांबी ११.६६ मीटर आहे. पुलाच्या दोन्ही बाजूकडील भरावा तीन ते चार मीटर उंच करण्यात आलेला असून, सदर ठिकाणी तयार होणारा चढ व उतार कमी करण्यात आलेला आहे.
“सध्या या पुलाचे काम पूर्ण झाले असून, या पुलाच्या दोन्ही बाजूस मुरूम भराव टाकून वाहतूक सुरू आहे. परंतु, पुलाच्या दोन्ही बाजूंना डांबरीकरण लवकरच केले जाणार आहे.”
– एस. एस. अटकेकर, शाखा अभियंता, सार्वजनिक बांधकाम विभाग, मेढा
.png "Videos"){kind=small}
