बुधवार, 28 ऑक्टोबर 2026
फोटो सौजन्य सोशल मीडिया
कृष्णा मोहिते यांच्याविरुद्ध त्यांच्या नातेवाईक असलेल्या महिलेने पोक्सो कायदा आणि माहिती व तंत्रज्ञान कायद्यांतर्गत तक्रार दाखल केली होती. या तक्रारीच्या आधारे त्यांच्याविरुद्ध गुन्हा नोंदवण्यात आला. त्यानंतर २० ऑक्टोबर २०२६ रोजी पोलिसांनी त्यांना अटक केली. न्यायालयाने त्यांना पोलीस कोठडी सुनावली होती.
पोलीस कोठडीतील पहिल्याच दिवशी, म्हणजे २० ऑक्टोबर रोजी कृष्णा मोहिते यांनी भिंतीवर डोके आपटून स्वतःला जखमी करून घेतल्याची माहिती आहे. त्यानंतर त्यांना तातडीने करमाळा येथील कुटीर रुग्णालयात दाखल करण्यात आले. प्रकृती गंभीर असल्याने पुढील उपचारासाठी त्यांना सोलापूर येथील शासकीय रुग्णालयात हलवण्यात आले. मात्र, उपचार सुरू असताना २३ ऑक्टोबर रोजी त्यांचा मृत्यू झाला.
कोठडीतील आरोपीच्या मृत्यूची गंभीर दखल घेत या प्रकरणाचा तपास सीआयडीकडे सोपवण्यात आला. नातेवाईकांनीही मृत्यूच्या परिस्थितीची सखोल चौकशी करण्याची मागणी केली होती. तपासादरम्यान संबंधित पोलीस अधिकारी आणि कर्मचाऱ्यांच्या भूमिकेची पडताळणी सुरू आहे.
या प्रकरणाच्या अनुषंगाने संबंधित दिवशी कर्तव्यावर असलेले पोलीस उपनिरीक्षक उघडे, पोलीस कॉन्स्टेबल रणदील आणि कादगे यांना निलंबित करण्याची शिफारस तपास अधिकाऱ्यांनी केली होती. त्यानुसार वरिष्ठ अधिकाऱ्यांनी तिघांच्या निलंबनाचे आदेश दिल्याचे समजते.
कृष्णा मोहिते यांच्या मृत्यूची नेमकी परिस्थिती काय होती आणि या घटनेत कोणाची जबाबदारी निश्चित होते, हे सीआयडीच्या तपासानंतर स्पष्ट होणार आहे. या कारवाईमुळे करमाळा परिसरासह पोलीस विभागात चर्चेला उधाण आले आहे.
