Mahabaleshwar Crime news: रिसॉर्ट चोरी प्रकरणी मुख्य आरोपी महिलेला कारावास, ५ जण निर्दोष
फिर्यादी विशाल रतिकांत तोषणीवाल (रा. डॉ. साबणे रोड, महाबळेश्वर) यांच्या रिसॉर्टवर हा धक्कादायक प्रकार घडला. तोषणीवाल यांच्या विवर रोड, तळदेव येथील ऑक्सिजन रिसॉर्टमधून २५ जून २०२५ रोजी दुपारी ४ वाजल्यापासून ते २८ जून २०२५ दुपारी १२ वाजेपर्यंत रिसॉर्टमधील साहित्याची चोरी झाली होती. यामध्ये गाद्या, बेड, फ्रिज, टीव्ही, एसी, स्वयंपाकघरातील साहित्य, डीव्हीआर, प्रोजेक्टर, संगणक यांसह तब्बल ८८ प्रकारच्या वस्तूंचा समावेश होता.
आरोपींनी आपापसांत संगनमत करून ही चोरी केल्याप्रकरणी महाबळेश्वर पोलीस ठाण्यात गुन्हा दाखल करण्यात आला होता. गुन्हा रजिस्टर क्रमांक ५८/२०२५, कोर्ट केस नंबर RCC ३०/२०२५, BNS कलम ३०५, ३३१(३)(४), ३०६ आणि ३१७(२) अन्वये हा गुन्हा दाखल करण्यात आला.
या खटल्यात एकूण सात साक्षीदारांची चौकशी करण्यात आली. दोन्ही बाजूंचा युक्तिवाद ऐकल्यानंतर न्यायालयाने आरोपी क्रमांक १ कांचन कालीप्रसाद बॅनर्जी (वय ५४, राठी नालासोपारा, वसई ईस्ट, ठाणे-मुंबई) या महिलेवरील आरोप सिद्ध झाल्यानंतर तिला दोषी ठरवण्यात आले. तसेच, संबंधित आरोपी महिलेला १ वर्ष ३ महिन्यांच्या साध्या कारावासाची शिक्षा सुनावली आहे.
Nita Ambani: नथ, चांदबालीचा शाही हार, तब्बल 3 वर्षात झाला तयार; नीता अंबानीच्या नेकलेसने दिपतील डोळे
दरम्यान, या प्रकरणातील आरोपी क्रमांक २ करण दशरथ घाडगे, आरोपी क्रमांक ३ गौतम सुरेश जाधव, आरोपी क्रमांक ४ भूपाल किसन घाडगे, आरोपी क्रमांक ५ राहुल भूपाल गाडगे आणि आरोपी क्रमांक ७ सागर यशवंत घाडगे (सर्व रा. सैदापूर, ता. सातारा) यांची न्यायालयाने निर्दोष मुक्तता केली.
आरोपी क्रमांक ६ आणि ८ हे अद्याप फरार असून, त्यांच्याविरुद्ध महाबळेश्वर पोलीस ठाण्याने स्वतंत्र दोषारोपपत्र तीन महिन्यांच्या आत दाखल करावे, असे आदेश न्यायालयाने दिले आहेत. या प्रकरणाचा तपास महाबळेश्वर पोलीस ठाण्याचे तपासी अंमलदार आर. एम. काळे यांनी केला. खटल्यात सरकारी वकील म्हणून डी. एम. शेख यांनी काम पाहिले. कोर्ट पैरवी म्हणून हेड कॉन्स्टेबल जाधव आणि पोलीस कॉन्स्टेबल कुंभार यांनी सहकार्य केले.
या प्रकरणाच्या तपासात वाई विभागाचे उपविभागीय पोलीस अधिकारी सुनील साळुंखे आणि महाबळेश्वर पोलीस ठाण्याचे पोलीस निरीक्षक हर्षद गालिंदे यांचे विशेष मार्गदर्शन लाभले.
.png "Videos"){kind=small}
