काँग्रेसमध्ये पुन्हा इनकमिंग; प्रदेशाध्यक्ष हर्षवर्धन सपकाळांच्या उपस्थितीत बड्या नेत्यांचा प्रवेश

काँग्रेसचे नवनियुक्त प्रभारी डॉ. सिरिवेल्ला प्रसाद व काँग्रेस प्रदेशाध्यक्ष हर्षवर्धन सपकाळ यांच्या प्रमुख उपस्थितीत सलग दुसऱ्या दिवशी विविध पक्षातील नेते व पदाधिकारी यांनी काँग्रेस पक्षात प्रवेश केला आहे.

मुंबई : काँग्रेसचे नवनियुक्त प्रभारी डॉ. सिरिवेल्ला प्रसाद व काँग्रेस प्रदेशाध्यक्ष हर्षवर्धन सपकाळ यांच्या प्रमुख उपस्थितीत सलग दुसऱ्या दिवशी विविध पक्षातील नेते व पदाधिकारी यांनी काँग्रेस पक्षात प्रवेश केला आहे. टिळक भवन येथे आज पार पडलेल्या पक्ष प्रवेश सोहळ्यात बीड जिल्ह्यातील राष्ट्रवादी काँग्रेस (श.प.) पक्षाचे नेते ॲड. नरसिंह जाधव यांनी आपल्या कार्यकर्त्यांसह काँग्रेसमध्ये प्रवेश केला. त्यांच्यासोबत माजी मंत्री वामनराव नाईक यांची नात गितांजली नाईक यांनीही काँग्रेसमध्ये प्रवेश केला आहे.

 

भाजप शिक्षक आघाडी व उत्तर महाराष्ट्र खान्देश विकास मंडळ कल्याणचे अध्यक्ष विकास मुकुंदराव पाटील यांनीही आपल्या शेकडो कार्यकर्त्यांसह काँग्रेस पक्षात प्रवेश केला आहे. प्रभारी डॉ. सिरिवेल्ला व प्रदेशाध्यक्ष हर्षवर्धन सपकाळ यांनी या सर्वांचे स्वागत केले. यावेळी CWC चे सदस्य राज्यसभा खासदार चंद्रकांत हंडोरे, AICC चे सचिव, बी.एम. संदीप, रेहाना चिस्ती, ज्येष्ठ नेते अशोक पाटील, प्रदेश उपाध्यक्ष सिद्धार्थ हत्तीअंबिरे, प्रदेश सरचिटणीस ऍड. संदेश कोंडविलकर, प्रवेश काँग्रेसचे वरिष्ठ प्रवक्ते अतुल लोंढे, धीरज देशमुख, बीड जिल्हा काँग्रेसचे अध्यक्ष राहुल सोनावणे, प्रवीणकुमार शेप आदी उपस्थित होते.

यावेळी बोलताना प्रभारी डॉ. सिरिवेल्ला प्रसाद म्हणाले की, बीड जिल्ह्यासह ज्या जिल्ह्यात काँग्रेस संघटनेची ताकद कमी आहे तेथे संघटन मजबूत करण्याची गरज आहे. पडीक जमीन कसण्याचे प्रयत्न शेतकरी कधीच सोडून देत नाही, ती जमीन सुपिक होईपर्यंत मशागत करतच राहतो, त्याप्रमाणे जेथे काँग्रेस पक्षाची ताकद कमी आहे तेथे जोमाने काम करा, संघटनेची ताकद वाढवा. लोकशाही व संविधान वाचवणे व सर्वसामान्य जनतेचे मुलभूत हक्क व अधिकार कायम रहावेत यासाठी केंद्रात काँग्रेसचे सरकार व राहुल गांधी यांना पंतप्रधान करण्यासाठी त्यांचे हात बळकट करायचे आहेत, २०२९ च्या लोकसभा निवडणुकीसाठी आपल्याकडे ८८२ दिवस आहेत, जोमाने काम करा, असे आवाहन प्रसाद यांनी केले.

हे सुद्धा वाचा  : घरातच थाटला तंबाखूचा कारखाना! अमूलच्या नावाने बनावट चीजही बनविले; पोलिसांनी केली मोठी कारवाई

प्रदेशाध्यक्ष हर्षवर्धन सपकाळ यावेळी म्हणाले की, आपल्या आजोबा पंजोबांनी आरएसएस-भाजपाचा कुटील डाव ओळखला होता म्हणून ७० वर्षे त्यांना सत्तेपासून दूर ठेवले होते, आरएसएस-भाजपाचा अजेंडा समाजात फुट पाडण्याचा, भेदाभेद करण्याचा आहे, हा डाव आता तरुणाईनेही ओळखला आहे. काँग्रेस पक्षाला मोठा इतिहास आहे आणि काँग्रेसचा विचारच देशाला तारू शकतो, त्यामुळे गावागावात काँग्रेसचा विचार पोहचवा, असे सपकाळ म्हणाले. आजच्या पक्ष प्रवेशाने बीड जिल्हृयात व खान्देशात काँग्रेस पक्षाची ताकद आणखी वाढण्यास मदत होईल असेही सपकाळ म्हणाले.