‘तुम्ही स्वतःला देव समजता का?’ हायकोर्टाचा FDA ला सवाल; मुंबई क्रिकेट असोसिएशनला मोठा दिलासा

MCA आणि FDA यांच्यातील वादात मुंबई क्रिकेट असोसिएशनला हायकोर्टाकडून मोठा दिलासा मिळाला आहे. BKC येथील MCA क्लबच्या किचनवरील बंदी उठवताना न्यायालयाने FDA च्या कारवाईवर तीव्र नाराजी व्यक्त केली.

• MCA क्लबच्या किचनवरील FDA ची बंदी हायकोर्टाने उठवली
• 87 वरून किचनचे गुणांकन 95 वर; तरी कारवाईवर न्यायालयाचे सवाल
• ‘तुम्ही स्वतःला देव समजता का?’ हायकोर्टाचा FDA ला सवाल

मुंबई : अन्न व औषध प्रशासनाच्या (FDA) कारवाईविरोधात मुंबई क्रिकेट असोसिएशनने (MCA) मुंबई उच्च न्यायालयात धाव घेतल्यानंतर न्यायालयाने MCA ला मोठा दिलासा दिला आहे. वांद्रे-कुर्ला कॉम्प्लेक्स (BKC) येथील MCA क्लबच्या किचनवर FDA ने केलेली कारवाई आणि बंदीच्या निर्णयावर न्यायालयाने तीव्र नाराजी व्यक्त केली. FDA ने कायदेशीर स्थितीचा पूर्ण विचार न करता घाईघाईने कारवाई केल्याचे निरीक्षण न्यायालयाने नोंदवले.

मुख्य न्यायमूर्ती रवींद्र घुगे आणि न्यायमूर्ती गौतम अंखड यांच्या खंडपीठासमोर या प्रकरणाची सुनावणी झाली. यावेळी FDA च्या कार्यपद्धतीवर न्यायालयाने कठोर शब्दांत प्रश्न उपस्थित केले. यापूर्वीही न्यायालयाने प्रकरणाचा फेरविचार करण्याचे निर्देश दिले होते. मात्र, त्यानंतरही FDA ने व्यावहारिक दृष्टिकोन न स्वीकारता केवळ तांत्रिक बाबींवर भर दिल्याचे न्यायालयाने म्हटले.

‘तुम्ही देव आहात, काहीही करू शकता असं वाटतं का?’

सुनावणीदरम्यान न्यायालयाने FDA आणि संबंधित अधिकाऱ्यांच्या भूमिकेवर तीव्र नाराजी व्यक्त केली. कायदेशीर परिस्थितीचा पूर्ण अभ्यास न करता अनावश्यक घाई का करण्यात आली, असा सवाल खंडपीठाने केला.

Amit Shah–Eknath Shinde Meeting : अमित शाह-एकनाथ शिंदेंमध्ये विमानतळावर 10 मिनिटं चर्चा; शिवसेना मंत्र्यांच्या नाराजीवर खलबतं?

तसेच, FDA च्या अधिकाऱ्यांना यापूर्वीही वारंवार फटकारण्यात आले असल्याचे न्यायालयाने नमूद केले. ‘तुम्ही स्वतःला देव समजता का?’ अशा कठोर शब्दांत न्यायालयाने FDA च्या कारवाईवर प्रश्नचिन्ह उपस्थित केले. न्यायालयाच्या आदेशाचे पालन न केल्यास संबंधित अधिकाऱ्यांविरोधात अवमानाची कारवाई करण्याची शक्यताही व्यक्त करण्यात आली.

87 वरून किचनचे गुण 95 वर

MCA क्लबच्या किचनवरील FDA कारवाईच्या टाइमलाइनकडे पाहिल्यास हा वाद अधिक स्पष्ट होतो. 20 ऑगस्ट रोजी FDA ने केलेल्या तपासणीत किचनला 110 पैकी 87 गुण मिळाले होते. त्यानंतर 25 ऑगस्ट रोजी पुन्हा तपासणी करण्याचे निर्देश देण्यात आले.

27 ऑगस्ट रोजी झालेल्या पुनर्तपासणीत किचनचे गुणांकन वाढून 95 झाले. त्यामुळे किचनच्या स्थितीत सुधारणा झाल्याचे दिसून येत असतानाही कारवाई सुरू राहिल्याने MCA ने न्यायालयाचा दरवाजा ठोठावला.

सुनावणीदरम्यान समाधानकारक गुणांकन असतानाही किचनवर बंदी कायम ठेवण्याच्या FDA च्या निर्णयावर न्यायालयाने सवाल उपस्थित केले. अखेर BKC येथील MCA क्लबच्या किचनवरील बंदी उठवण्याचे आदेश देण्यात आले.

Parliament Special Session: सप्टेंबरच्या पहिल्या आठवड्यात संसदेचे विशेष अधिवेशन होणार? सरकार मोठा निर्णय घेण्याच्या तयारीत

MCA कडून निर्णयाचे स्वागत

न्यायालयाच्या निर्णयानंतर MCA BKC चे अध्यक्ष अजय देसाई यांनी समाधान व्यक्त केले. प्रतिष्ठित संस्थांवर अशा प्रकारची कारवाई करून नेमके काय सिद्ध करायचे आहे, असा सवाल त्यांनी उपस्थित केला. न्यायालयाने अखेर न्याय दिल्याचेही त्यांनी म्हटले.

दरम्यान, तुकाराम मुंढे यांच्या नेतृत्वाखाली FDA कडून राज्यभरात खाद्य सुरक्षा नियमांच्या उल्लंघनाविरोधात कारवाई सुरू आहे. मात्र, MCA प्रकरणात न्यायालयाने FDA च्या कार्यपद्धतीवरच प्रश्न उपस्थित केल्याने हे प्रकरण चर्चेत आले आहे.