Maval Hyundai Company Fraud : मावळातील उद्योजकांची दिशाभूल? स्थानिक दलाल अन् PMRDA अधिकाऱ्यांविरोधात आमदार शेळके आक्रमक

मावळमध्ये हुंदाईसारखी कोरियन कंपनीची फसवणूक झाली आहे. या प्रकरणी आमदार सुनील शेळके यांनी नागपूर हिवाळी अधिवेशनात आक्रमक भूमिका घेतली.

• मावळमध्ये हुंदाई कोरियन कंपनीची फसवणूक
• स्थानिक दलाल आणि पीएमआरडीए अधिकाऱ्यांमुळे ही फसवणूक
• आमदार सुनील शेळके यांचा आक्रमक पवित्रा

Maval Hyundai Company Fraud : वडगाव मावळ : मावळ तालुक्यात गुंतवणुकीसाठी येणाऱ्या मल्टिनॅशनल कंपन्यांची काही दलालांकडून कोट्यवधी रुपयांची फसवणूक करण्यात आल्याचे धक्कादायक प्रकरण उघडकीस आले. याबाबत गंभीर आरोप आमदार सुनील शेळके यांनी नागपूर हिवाळी अधिवेशनात केले आहेत. हुंदाईसारखी कोरियन कंपनी महाराष्ट्रात आणणाऱ्या महायुती सरकारचा उद्देश रोजगारनिर्मिती असताना, काही दलालांनी कंपनीच्या व्हेंडरना बेकायदेशीर व फसवे दस्तऐवज दाखवून मिळकतीची विक्री करून आंतरराष्ट्रीय कंपनीलाच आर्थिक गंडा घातला, असे त्यांनी स्पष्ट केले.

फसवणुकीत सामील दलालांनी खोट्या मोजणी नकाशावर बांधकाम परवानगी घेतल्याचे, कोणताही पूर्णत्वाचा दाखला (OC) न घेता प्रकल्पांची विक्री केल्याचे, शिवाय वनीकरण झोनमध्ये बेकायदेशीर बांधकाम करून हजारो ब्रास उत्खननही केल्याचे समोर आले आहे. अशा प्रकारे अनेक कंपन्यांची फसवणूक झाल्याने, संबंधित दलालांवर फौजदारी गुन्हे दाखल करण्याची मागणी आमदार शेळके यांनी मांडली. पीएमआरडीएनेही या प्रकरणांवर नोटीस बजावल्यानंतर या व्यवहारांमधील धांदली अधिक स्पष्टपणे बाहेर आली आहे.

हे देखील वाचा : वाढत्या थंडीने बारामती परिसरात हुडहुडी; व्यायामासाठी तरुणांची वाढती गर्दी

मावळातील एमआयडीसी परिसरात वाढत्या गुंतवणुकीच्या पार्श्वभूमीवर अनेक मोठ्या कंपन्या येथे व्यवसाय उभारण्यास इच्छुक आहेत. मात्र काही दलाल बनावट झोन दाखले, नकाशे बदलणे, चुकीची परवानगी दाखवणे, आणि गुंतवणूकदारांना दिशाभूल करून मिळकतीची विक्री करीत असल्याचे शेळके यांनी निदर्शनास आणले. “मी मागील सहा वर्षांत माझ्या मतदारसंघातील उद्योगांच्या ठाम पाठीशी उभा राहिलो आहे. कोणत्याही कंपनीचा ठेका घेतलेला नाही,” असे सांगत त्यांनी स्वतःवरील आरोपांनाही उत्तर दिले. पुढे ते म्हणाले की, “मावळ तालुक्यात येणाऱ्या उद्योगांशी फसवणूक करणाऱ्या दलालांना आम्ही सुट्टी देणार नाही,” असा कठोर इशारा देत आमदार शेळके यांनी या सर्वांवर तातडीने गुन्हे दाखल करून कठोर कारवाईची मागणी केली आहे.

हे देखील वाचा : पुत्र प्रेमापोटी कोकणातील ‘या’ नेत्याला डावललं? विरोधी पक्षनेतेपदावरून ठाकरे गट पुन्हा फुटीच्या उंबरठ्यावर

याचदरम्यान, या गंभीर फसवणूक प्रकरणाची सविस्तर माहिती देण्यासाठी आमदार सुनील शेळके यांनी नागपूर येथे मुख्यमंत्री देवेंद्र फडणवीस यांची भेट घेऊन प्रकरणाची संपूर्ण माहिती सादर केली. मुख्यमंत्र्यांनी हे प्रकरण गांभीर्याने घेत तत्काळ कारवाईचे संकेत दिल्याचे समजते. त्यामुळे पुढील काही दिवसांत संबंधित दलालांवर कठोर कारवाई होण्याची शक्यता अधिक बळकट झाली आहे. या भेटीमुळे संपूर्ण प्रकरणाला आता राज्यस्तरावरून गती मिळणार असल्याची चर्चा राजकीय व औद्योगिक क्षेत्रात सुरू आहे.