मुंबई : कॉंग्रेस नेते राहुल गांधी यांची ‘भारत जोडो न्याय यात्रा’ महाराष्ट्रामध्ये आली आहे. यामुळे मनसेने कॉंग्रेस व राहुल गांधी यांना इशारा दिला आहे. स्वातंत्र्यवीर सावरकर यांच्याबद्दल काही अपमानजनक बोलाल तर खपवून घेणार नाही, महाराष्ट्रात फिरू देणार नाही असा स्पष्ट इशारा मनसे नेते संदीप देशपांडे यांनी राहुल गांधी यांना दिला आहे. माध्यमांशी संवाद साधत संदीप देशपांडे यांनी मुंबईतील सभेवरुन इशारा दिला.
कॉंग्रेस नेते राहुल गांधी यांच्यावर टीका करताना मनसे प्रवक्ते संदीप देशपांडे यांनी त्यांच्या मुंबईतील सभेवरुन इशारा दिला आहे. देशपांडे म्हणाले, “छत्रपती शिवाजी पार्क हे स्वातंत्र्यवीर सावरकरांच्या स्मारकासमोर आहे. स्वातंत्र्यवीर सावरकरांचं घर हे या मैदानाच्या जवळ आहे. तुम्ही महाराष्ट्रात येताय, तुमचं जे म्हणणं आहे ते मांडा, त्याला आमची ना नाही. पण इथे येऊन जर मागच्या वेळेसारखं स्वा. सावरकर यांच्याबद्दल कुठलंही अपमानजक वक्तव्य केलं किंवा काही अद्वातद्वा बोललात तर ही महाराष्ट्राची 14 कोटी जनता राहुल गांधींना महाराष्ट्रात फिरायला देणार नाही, महाराष्ट्रात येऊन शिवाजी पार्क मैदानात स्वातंत्र्यवीर सावरकरांवर बोलाल तर खपवून घेतलं जाणार नाही,” असा थेट इशारा संदीप देशपांडे यांनी दिला आहे.
ठाकरे गटाला देखील मनसे प्रवक्ते संदीप देशपांडे यांनी खडेबोल सुनावले आहेत. ‘आणि या कोल्ह्यांसोबत जे लांडगे सामील झाले आहेत, त्यांनीपण हे लक्षात ठेवावं, महाराष्ट्रात त्यांची मग काही खैर नाही. त्या कोल्हेकुईला साथ देणाऱ्या लांडग्यांनाच सांगतोय. आमचा इशारा आहे” अशा स्पष्ट शब्दांत मनसेने ठाकरे गटालाही सुनावले आहे. हा ईशारा देत असताना देशपांडे यांनी काँग्रेसचा कोल्हे म्हणून तर ठाकरे गटाचा लांडगे म्हणून उल्लेख केला.
.png "Videos"){kind=small}
