म्हाडाच्या प्रश्नांवर सचिन अहिर यांच्या अध्यक्षतेखाली बैठक
MHADA Redevelopment : म्हाडा प्राधिकरणाशी संबंधित गृहनिर्माण संस्थांच्या पुनर्वसन आणि पुनर्विकासाच्या प्रलंबित प्रश्नांवर विधानपरिषद उपसभापती सचिन अहिर यांच्या अध्यक्षतेखाली विधान भवन येथे बैठक झाली. मुंबईतील विविध गृहनिर्माण संस्थांच्या समस्या आणि नागरिकांच्या मागण्यांवर यावेळी सविस्तर चर्चा करण्यात आली. संबंधित नागरिकांचे म्हणणे ऐकून घेऊन त्यांच्या प्रश्नांवर सकारात्मक मार्ग काढण्याचे निर्देश सचिन अहिर यांनी अधिकाऱ्यांना दिले.
बीडीडी चाळ पुनर्विकास प्रकल्पातील लॉटरीद्वारे होणाऱ्या घरवाटपातील अडचणी, वरळी बीडीडी चाळीतील कुटुंबांना पर्यायी निवास आणि संक्रमण शिबिरातील नागरिकांच्या विविध मागण्या बैठकीत मांडण्यात आल्या.
लोअर परळ येथील सरस्वती बिल्डिंगमधील दहा रहिवाशांना पर्यायी सदनिका देण्याचा प्रश्नही चर्चेत आला. याशिवाय ना. म. जोशी मार्गावरील ३६५ आणि शिवशक्ती पार्क येथील तानवडे यांच्यासह अन्य ३० रहिवाशांनी केलेल्या निवेदनांवरही चर्चा करण्यात आली.
भायखळा येथील गीतांजली बिल्डिंगचा पाच म्हाडा इमारतींच्या क्लस्टरमध्ये समावेश करण्याच्या मागणीवरही बैठकीत चर्चा झाली. एसव्हीपी नगर सोसायटीतील एचआयजी आणि एलआयजी पुनर्वसनाचा मुद्दा तसेच टागोर नगरमधील घरकुल सोसायटीतील कुटुंबांना कायमस्वरूपी मालकी हक्क देण्याचा प्रश्नही मांडण्यात आला. अभ्युदयनगरमधील इमारतींचा पुनर्विकास, रुस्तम ताडीवाला चाळ आणि शाहसदन सोसायटीशी संबंधित निवेदनांवरही संबंधित अधिकाऱ्यांकडून माहिती घेण्यात आली.
मुंबईतील जुन्या आणि पुनर्विकासाच्या प्रतीक्षेत असलेल्या अनेक इमारती तसेच गृहनिर्माण संस्थांमधील रहिवाशांचे प्रश्न अनेक दिवसांपासून प्रलंबित आहेत. त्यामुळे प्रत्येक प्रकरणातील अडचणी समजून घेऊन कायदेशीर आणि प्रशासकीय पातळीवर तोडगा काढण्याच्या दृष्टीने कार्यवाही करण्याचे निर्देश बैठकीत देण्यात आले.
बैठकीस म्हाडाचे उपाध्यक्ष तथा मुख्य कार्यकारी अधिकारी संजीव जयस्वाल, मुंबई इमारत दुरुस्ती व पुनर्रचना मंडळाचे मुख्य अधिकारी मिलिंद शंभरकर, मुंबई मंडळाचे मुख्य अधिकारी मिलिंद बोरीकर यांच्यासह म्हाडाचे संबंधित अधिकारी आणि विविध गृहनिर्माण संस्थांचे प्रतिनिधी उपस्थित होते.
.png "Videos"){kind=small}
