मुंबईतील ८७ बेकऱ्यांवर कारवाईचा बडगा? लाकूड-कोळशाचा वापर बंद करण्यासाठी पालिका आक्रमक

मुंबईतील वाढत्या वायुप्रदूषणाला आळा घालण्यासाठी महापालिकेने बेकऱ्यांबाबत कठोर भूमिका घेतली आहे. न्यायालयाने दिलेली मुदत संपल्यानंतरही ८७ परवानाधारक बेकऱ्यांमध्ये लाकूड आणि कोळशाचा वापर सुरू असल्याने त्यांच्यावर कारवाई होण्याची शक्यता आहे.

• मुंबईतील ८७ बेकऱ्यांमध्ये अद्याप लाकूड आणि कोळशाचा वापर सुरू आहे.
• बेकऱ्यांमधून होणाऱ्या प्रदूषणाचा मुंबईच्या हवेच्या गुणवत्तेवर परिणाम होत आहे.
• स्वच्छ इंधनाचा वापर न करणाऱ्या बेकऱ्यांवर महापालिका आणि अग्निशमन दल संयुक्तपणे कारवाई करू शकतात.

शहरातील वाढत्या हवेच्या प्रदूषणाला आळा घालण्यासाठी मुंबई उच्च न्यायालयाने दिलेली मुदत संपल्यानंतरही मुंबईतील ८७ परवानाधारक बेकऱ्यांनी अद्याप लाकूड आणि कोळशाचा वापर पूर्णपणे बंद केलेला नाही. न्यायालयाने मुदतवाढीची मागणी फेटाळून लावल्याने आता बृहन्मुंबई महानगरपालिकेने आक्रमक पवित्रा घेतला असून, स्वच्छ इंधनाकडे न वळणाऱ्या या ८७बेकऱ्यांसह अनधिकृतपणे लाकूड जाळणाऱ्या इतर बेकऱ्यांवरही थेट कारवाईचा बडगा उगारण्याची तयारी सुरू केली आहे. महापालिकेचा आरोग्य विभाग आणि अग्निशमन दल संयुक्तपणे ही मोहीम राबवणार आहे. शहरात एकूण ५८३ परवानाधारक बेकऱ्यांची नोंद असून, त्यापैकी पाच बेकऱ्या कायमस्वरूपी बंद झाल्या आहेत.

Mumbai News: अस्वस्थतेचे छुपे कारण आर्द्रता; शहरात उकाडा कायम! आकाश निरभ्र असल्याने सूर्यकिरणांचा थेट परिणाम

उर्वरित आस्थापनांपैकी बहुसंख्य बेकऱ्यांनी सुधारणा केली असली तरी अद्याप ८७ बेकऱ्यांमध्ये पारंपरिक इंधनाचाच वापर सुरू आहे. या बेकऱ्यांचा मुंबईतील ‘पीएम १०’ प्रदूषणात सुमारे ३.५ टक्के वाटा असल्याचे समोर आले आहे. धक्कादायक बाब म्हणजे, ‘बॉम्बे एन्व्हायर्नमेंट अॅक्शन ग्रुप’च्या अभ्यासानुसार अनेक बेकऱ्यांमध्ये जुन्या फर्निचरमधील रंगवलेले व प्रक्रिया केलेले टाकाऊ लाकूड जाळले जाते. या धुरामुळे हवेत घातक अस्थिर सेंद्रिय संयुगे मिसळतात, ज्यामुळे मुंबईकरांमध्ये श्वसनविकारांचा धोका वाढण्यासह धुरके व घातक ओझोनची पातळी वाढण्यास हातभार लागत आहे.

मार्गदर्शनानंतरही नियम बसवले धाब्यावर

जानेवारी २०२५ मधील जनहित याचिकेवरील सुनावणीदरम्यान न्यायालयाने बेकऱ्याऱ्यांना एलपीजी, पीएनजी किंवा वीज यांसारख्या स्वच्छ इंधनाचा वापर सुरू करण्यासाठी सहा महिन्यांची मुदत दिली होती. यानंतर पालिकेने संबंधितांना नोटिसा बजावण्यासोबतच ‘पीएमएफएमई” योजनेतून आर्थिक साह्य मिळवून देण्यासाठी मार्गदर्शन शिबिरेही घेतली, मात्र तरीही ८७ बेकऱ्यांनी नियम धाब्यावर बसवले आहेत.

ड्रिंक अँड ड्राइव्हची कारवाई टाळण्यासाठी ५ हजारांची लाच मागितल्याचा आरोप; व्हिडिओ व्हायरल होताच ए एस आय निलंबित

दरवाढीमुळे कंबरडे मोडल्याची व्यथा व्यक्त

• स्वच्छ इंधन स्वीकारलेल्या व्यावसायिकांनी मात्र दरवाढीमुळे कंबरडे मोडल्याची व्यथा मांडली आहे.
• भायखळ्यातील बेकरीचालक मिर्झा गयासुद्दीन बेग यांच्या म्हणण्यानुसार, स्वच्छ इंधनावर आधारित यंत्रणा उभारण्यासाठी २० लाखांपर्यंत भांडवली खर्च करावा लागला असून, एलपीजीच्या दरांमुळे मासिक इंधन खर्च तिप्पट झाला आहे.
• त्यामुळे पर्यावरणाचे रक्षण करत असतानाच व्यवसायाचे अस्तित्व टिकवण्यासाठी प्रशासनाने स्वच्छ इंधनावर अनुदान द्यावे, अशी मागणी बैंकरीचालक करत आहेत.
• एकीकडे वाढत्या खर्चाचे आव्हान आणि दुसरीकडे पालिकेचा संभाव्य बहगा, अशा कात्रीत आता हे बेकरी व्यावसायिक अडकले आहेत.

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.