मुंबईच्या क्रूझ पर्यटनाला मिळणार नवी झेप; ५ वर्षांनी दुसरे जहाज दाखल, २३ ऑक्टोबरपासून प्रवाशांच्या सेवेत

मुंबईच्या क्रूझ पर्यटनाला आता नवी चालना मिळणार आहे. तब्बल पाच वर्षांनंतर मुंबईच्या क्रूझ ताफ्यात दुसरे जहाज दाखल होत असून, प्रवाशांना देशांतर्गत तसेच पुढील टप्प्यात आंतरराष्ट्रीय समुद्री सफरीचे पर्याय उपलब्ध होणार आहेत.

• तब्बल पाच वर्षांनी मुंबईच्या क्रूझ ताफ्यात दाखल होणार नवे जहाज
• गोवा, लक्षद्वीपसह विविध समुद्री सफरींचे पर्याय मिळणार
• जहाजावर प्रवाशांसाठी मनोरंजन, डायनिंग आणि गेमिंगच्या सुविधांचीही व्यवस्था

मुंबईच्या क्रूझ पर्यटनाला तब्बल पाच वर्षांनी दुसऱ्या जहाजाची साथ मिळणार आहे. कॉरडेलिया क्रूझचे ‘कॉरडेलिया स्काय’ २३ ऑक्टोबरपासून मुंबईहून प्रवाशांच्या सेवेत दाखल होणार असून, गोवा, लक्षद्वीपसह विविध समुद्री सफरींचे पर्याय उपलब्ध होणार आहेत. पुढील टप्प्यात याच जहाजातून फुकेत, लंगकावी, क्वालालंपूर आणि सिंगापूरपर्यंतचा प्रवास करता येणार आहे. कॉरडेलिया क्रूझचे पहिले जहाज ‘एम्प्रेस’ सप्टेंबर २०२१ मध्ये मुंबईहून सेवेत दाखल झाले होते. त्यापूर्वी हे जहाज ‘एम्प्रेस ऑफ द सीज’ या नावाने कार्यरत होते. १६ सप्टेंबर २०२१ रोजी ‘एम्प्रेस’ने मुंबईहून पहिला प्रवास केला. आता ५ वर्षांनंतर कॉरडेलियाच्या ताफ्यात दुसरे जहाज दाखल होत आहे.

Mumbai News: प्रदूषण नियंत्रणाची जबाबदारी वास्तुविशारदांवर का? आक्षेप ‘वास्तुकला परिषदे’चा मुंबई पालिकेच्या निर्णयाला आक्षेप

मुंबईच्या क्रूझ प्रवासातील टप्पे

• २०२१ – ‘एम्प्रेस व्या माध्यमातून मुंबईहून क्रूझ सेवा सुरू
• १६ सप्टेंबर २०२१ एम्प्रेस’चा मुंबईहून पहिला प्रवास
• २०२६- ‘कॉरडेलिया स्काय’ ताफ्यात दाखल
• २३ ऑक्टोबर २०२६ स्काय’चा मुंबईहून पहिला प्रवास
• २०२७ – ‘कॉरडेलिया सन’ दाखल करण्याचे नियोजन

२,००४ प्रवाशांची क्षमता

‘कॉरडेलिया स्काय’ची लांबी २५८ मीटर असून, त्याचे वजन ७७ हजार १०४ ग्रॉस टन आहे. दोन प्रवाशांच्या ऑक्युपन्सीवर जहाजाची क्षमता दोन हजार चार प्रवाशांची आहे.
जहाजावर एक हजार दोन स्टेटरूम्स आहेत. प्रवाशांसाठी १० डायनिंग व्हेन्यूज, ११ बार आणि लाउज, दोन जलतरण तलाव आणि पाच हॉट टब आहेत.

वीकेंडपासून लक्षद्वीपपर्यंत

मुंबईहून ‘कॉरडेलिया स्काय’च्या माध्यमातून दोन रात्रीची वीकेंड क्रूझ, तीन रात्रीची गोवा कुझ आणि चार रात्रीची लक्षद्वीप क्रूझ करता येणार आहे. गोवा आणि लक्षद्वीप या दोन्ही ठिकाणाचा समावेश असलेली पाच रात्रीची क्रूझही प्रस्तावित आहे.

पुढचा टप्पा आग्नेय आशिया

चेन्नईहून सात रात्रीच्या आग्नेय आशिया क्रूझाचे नियोजन करण्यात आले आहे. या प्रवासात फुकेत, लंगकावी, क्वालालंपूर आणि सिंगापूरचा समावेश असेल. त्यामुळे देशांतर्गत प्रवासासोबत आंतरराष्ट्रीय समुद्री सफरीचा पर्यायही उपलब्ध होणार आहे.

मोठी बातमी ! रस्त्यांवर फटाके फोडण्यास आता बंदी; डीजे, लेझर बीमलाही विरोध

मनोरंजन, गेमिंगचीही व्यवस्था

जहाजावर पिकलबॉल, सी क्रिकेट, जलतरण, गेमिंग आणि फिटनेसच्या सुविधा आहेत. लाइव्ह संगीत, विविध शो आणि कार्यक्रमांचे आयोजन केले जाणार आहे. भारतीय प्रादेशिक खाद्यपदार्थासह सुशी आणि इटालियन खाद्यपदार्थांचे पर्यायही उपलब्ध असतील.

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)