रविवारी 'या' मार्गांवर असणार मेगाब्लॉक, वेळापत्रक वाचूनच घराबाहेर पडा
Central Railway Mega Block : मुंबईकरांसाठी महत्त्वाची बातमी असून रविवारी (19 जानेवारी) रेल्वेकडून अभियांत्रिकी आणि देखभालीची कामे पूर्ण करण्यासाठी मेगाब्लॉक घेण्यात येणार आहे. मध्य रेल्वेने माटुंगा ते मुलुंड अप आणि डाऊन जलद मार्गावर ब्लॉक जाहीर केला आहे. तर पश्चिम रेल्वेने भाईंदर-बोरिवली दरम्यान अप फास्ट मार्गावर ब्लॉक घेतला आहे. या ब्लॉकमुळे काही गाड्या उशिरा धावणार आहेत. तर काही गाड्या रद्द करण्यात आल्या आहेत.
माटुंगा-मुलुंड (अप आणि डाउन जलद मार्ग)
वेळ: सकाळी ११:३० ते दुपारी ३:३० (अप-डाऊन फास्ट)
छत्रपती शिवाजी महाराज टर्मिनस (सीएसएमटी) येथून सकाळी १०:५८ ते दुपारी ३:१० दरम्यान सुटणाऱ्या जलद गाड्या माटुंगा येथे डाउन स्लो मार्गावर वळवल्या जातील. या गाड्या माटुंगा आणि मुलुंड दरम्यानच्या सर्व स्लो मार्गावरील स्थानकांवर थांबतील आणि मुलुंड येथे पुन्हा जलद मार्गावर सामील होतील. या गाड्या त्यांच्या गंतव्यस्थानी पोहोचण्यास सुमारे १५ मिनिटे उशिराने येतील.
तर सकाळी ११:२५ ते दुपारी ३:२७ दरम्यान ठाण्याहून सुटणाऱ्या जलद गाड्या मुलुंड येथे अप स्लो मार्गावर वळवल्या जातील. या गाड्या मुलुंड आणि माटुंगा दरम्यान धीम्या मार्गावरील स्थानकांवर थांबतील आणि नंतर माटुंगा येथे अप फास्ट मार्गावर परत येतील. या गाड्यांमध्येही १५ मिनिटांपर्यंत विलंब होईल.
ट्रान्स-हार्बर लाईन (ठाणे-वाशी/नेरुळ)
वेळ: सकाळी ११:१० ते दुपारी ४:१०
ठाणे आणि वाशी/नेरुळ स्थानकांदरम्यानच्या सर्व अप आणि डाउन ट्रान्स-हार्बर मार्गावरील सेवा या काळात तात्पुरत्या स्वरूपात बंद राहतील. ब्लॉकदरम्यान सकाळी १०:३५ ते दुपारी ४:०७ दरम्यान ठाणे ते वाशी/नेरुळ/पनवेल येथे जाणाऱ्या सर्व सेवा रद्द राहतील. तर सकाळी १०:२५ ते दुपारी ४:०९ दरम्यान पनवेल/नेरुळ/वाशीहून ठाणेला जाणाऱ्या सर्व सेवा रद्द राहतील.
पश्चिम रेल्वेवरील भाईंदर ते बोरिवली या स्थानकांदरम्यान अप जलद मार्गावर सकाळी 9.30 ते दुपारी 1.30 वाजेपर्यंत मेगाब्लॉक घेण्यात येणार आहे. या ब्लॉकच्या काळात विरार/वसई रोड ते बोरिवलीदरम्यान अप जलद मार्गावरील सर्व लोकल धीम्या अप मार्गावर वळवण्यात येणार आहेत. त्यामुळे या गाड्या इच्छित स्थळी उशिरा पोहोचणार आहेत. तयेच या काळात काही लोकल रद्द करण्यात येणार आहेत. त्यामुळे प्रवाशांनी सहकार्य करण्याचे आवाहन रेल्वे प्रशासनाकडून करण्यात आले आहे. रेल्वे प्रशासनाने प्रवाशांना या मेगा ब्लॉकला लक्षात घेऊन त्यांच्या प्रवासाचे नियोजन करण्याची विनंती केली आहे.
